Sindicato ta pidi indexa salario di trahadonan di hospital

ORANJESTAD – E ultimo tres siman a tene un serie di reunion entre gerencia di hospital y sindicato AVB, caminda cu intermediacion di mediador di gobierno, e partidonan a palabra e mecanismo con nan lo continua cu e negociacionnan.

E negociacion aki ta tumando luga den bon ambiente, superando e impasse cu a surgi na inicio di esaki, caminda sindicato a yega di acusa gerencia di Horacio Oduber Hospital (HOH) di intimidacion.

Diamars ultimo, nan a tene un combersacion caminda nan a pone enfasis pa concentra riba puntonan specifico, cu ta e aspecto financiero. Tin dos seccion di reunion programa entrante otro siman. Mediador di gobierno, Anselmo Pontilius, ta haya importante pa gerencia di HOH bin cu reaccion specifico ariba e puntonan cu tin cu aspecto financiero, pa purba di cera e CAO nobo.

E punto crucial aki ta esun cu ta determina con largo e contracto colectivo (CAO) ta bay. E partidonan ta desea pa tin tres aña di duracion di e CAO nobo. Gerencia di hospital tabatin programa un reunion interno cu e hunta di supervision, pa wak cual espacio financiero mas lo tin disponibel.

E institucion aki, cu ta brinda su servicio pa mas cu 100 mil habitante, no ta uno cu ta genera ganashi. Hospital ta haya un suma di placa anual pa nan opera via AZV a base di e presupuesto di pais Aruba. Cu e placa aki, hospital tin cu atende cu tur su gastonan.

Hospital tin mas cu mil trahado, caminda cualkier cambio den nan CAO tin un impacto riba gasto di personal. Aparte cu sindicato ta haya cu ta necesario pa indexa e salarionan, ya cu nan ta sali for di punto di bista cu e salario di e trahadonan a keda atras.

Scala salario y pensioen

Di otro banda, nan ta calcula cu un grupo grandi di e mil trahado a yega na e blafon di salario. Esaki ta un fenomeno conoci na hopi caminda. Pues kiermen, cu nan a yega na e nivel mas halto den scala di salario. Pero esaki no tin di haber cu salario y pension so, sino cu e ambiente laboral, con e trahadonan ta wordo trata y con e situacion cu ta traha aden ta.

Segun Pontilius, den un sistema manera esey, no ta sin mas bo ta cambia di scala, pa motibo cu nos ta papiando di trahadonan profesional masha specifico na servicio di hospital. E ta haya cu mester ta creativo pa busca alternativa con ta bay atende cu e hendenan cu a pega den scala aki, y cu ainda tin hopi aña mas pa bay cu pension. Si antes un trahado tabata bay cu 62 aña cu pension, aworaki e acuerdo di pension a bay 65. Mediador di gobierno ta considera cu nan ta puntonan cu tin impacto ariba e totalidad di e negociacion di e CAO.

Hospital lo haci un sondeo unda nan lo por tin gasto excesivo, y ta wordo spera cu e sondeo aki no lo tarda hopi pa por yega na un acuerdo. Tambe riba asunto di pension, e compania Guardian lo percura pa duna informacion adicional tambe. Pues aparte di e punto di indexa e salario di e trahadonan, tin puntonan relaciona cu e acuerdo di pension, den cual departamento di mediador di gobierno ta conseha pa tin un plan, ya sea di 5 of 10 aña, pa atende cu e personal cu ta subi na un edad pa bay cu pension. Tambe lo bin cu un seccion special cu e trahadonan riba e parti di spaar y pension, y con nan mester atende cune.

Den sintesis, gran cantidad di trahado di hospital ta pega den nan scala di salario, mientras di otro banda, e trahadonan di un cierto edad –despues di a traha 25 pa 30 aña- con lo por atende cune trahando diferente warda den un hospital. Cada un di e situacionnan aki mester wordo atendi debidamente, den e proceso di negociacion aki, y e ta bira un reto pa e sindicato y e dunado di trabou.

 

 

You May Also Like

cc-machine.jpg

Comerciante local cometiendo fraude cu machine di swipe

ORANJESTAD – Fraude masal cu e aparatonnan ‘di swipe’, a pone cu banconan a cuminsa ...

ARESTO DIADUMINGO MAY 1 2016 2.JPG

Cuerpo Policial a haya menasa: ”Lo bay tira riba polis”

Dialuna atardi autoridad a bay mes ora den un alerta, esaki tabata momento cu ...

10 prioridad pa accion sostenibelidad Caribense

E prome foro di Caribbean Sustainable Development Forum unda mas cu 25 paisnan y ...

Bendedonan di souvenir preocupa cu kiosconan nobo lo bay pa otro hendenan

E bendedonan di souvenir y artesania situa temporalmente patras di edificio bieu di DOW ...

Atraco Wayaca Foto4.JPG

Caso Wayaca: Polis no por confirma ainda cu ta trata di un atraco

Alrededor di 1:10 diamars merdia un homber arma a drenta un cas na Wayaca ...

Cambio di ley pa biyete di florin nobo; Biyete di 500 florin ta wordo reemplasa pa 200 florin

ORANJESTAD – Parlamento awe unanimamente a cambia e ley pa biyete di florin nobo. ...