Gobierno a informa sindicatonan SADA, SPA y SIMAR cu no por descarta cu den futuro lo tin otro medida. Asina Presidente di SADA Edward Maduro a bisa recientemente, den presencia di Josephine Albertus di SIMAR y Joselino Dirksz di SPA.

E sindicalistanan a mustra cu nan ta realistico y no ta exclui cu tin mas medida den futuro, pero no kier keda confronta cu un hecho. Kier pa Gobierno informa tur de inmediato y no laga un decision bin manera un baño di awa friu. “Nos kier pa Gobierno ta habri y sincero. No warda te na ultimo momento pa informa. Tin hopi rumor cu ta core rond, unda ta bisa cu Hulanda lo bin corta sin piedad. Nos lo keda vigila di cerca. Nos ta spera pa Gobierno cumpli cu su palabra, y keda sincero cu e ambtenaarnan.”

Pa e motibo aki e sindicatonan ta exigi cu tin dialogo continua cu Gobierno, pa mira con toch por yega na compensacion pa locual a perde. E por ta, manera a indica dia 6 di November, den forma financiero, of tambe traha menos ora. “Mi ta kere cu ta algo normal ora cu ta entrega,” Maduro a bisa. El a compara e peticion aki cu e inhaalmaneuvre y tambe dianan ATV cu a ricibi despues cu a entrega salario na 1985. Maduro ta admiti si cu e crisis awe ta mas severo cu na 1985, pero toch kier sa con Gobierno lo busca forma pa compensa locual a perde.“Mester tene cuenta cu ambtenaar tambe ta hende, y cu ta pasando den duro. Kizas un menos cu otro.”

Corta den toelage como ehempel

Como tal a urgi Gobierno pa fungi como ehempel, pa corta den e toelagen. Esta compensacionnan pa cierto funcionnan. SADA a manda un carta caba for di algun luna pasa pa pidi esaki, pa dirigentenan di pais actua como ehempel y entrega tur placa adicional cu nan ta cobra riba nan salario. “Tambe ‘tot nader order,’ mescos cu pa ambtenaarnan. Segun Maduro, e mandatarionan, pero tambe nan coordinadonan ta ricibi varios toelage cu ta compensa e perdida di salario. E ta conta pa Parlamentarionan, e coordinadonan pero tambe e pensionadonan cu ta trahado pa Gobierno y ta cobrando salario y toelage, e sindicalista a bisa.

“No ta husto cu e ambtenaar cu ta den schaal 4, cu tin 2 a 3 mil florin di entrada, ta perde 12.6 porciento, pero e Ministernan mes, e Coordinadornan, e Parlamentarionan ta gosa di toelage. Si Gobierno ta husto, lo para tur e toelagenan ‘tot nader order.’” Maduro a bisa cu si Mandatarionan, Parlamentarionan ta sincero, nan tambe ta solidario y husto. No por ta asina cu e ambtenaar chikito si mester entrega, pero esnan cu no ta traha y ta cana rond den Bestuurskantoor si ta cobra toelage, y como tal ta sinti e reduccion menos duro cu e ambtenaar regular, ta locual Maduro a splica.

Otro grupo di persona cu ta sintiendo e efectonan pisa ta e pensionadonan cu ta sacrifica caba na 1985, y awor atrobe ta corta den locual nan ta ricibi tur luna, “pero coordinadonan si ta cobra nan toelage. Mi por bisa cu mi ta haya hopi yamada di pensionadonan cu ta haya e reduccion algo hopi inhusto, net nan cu a traha pa e pais aki, atrobe nan mester pasa den e screment aki y ta mira cantidad di coordinado ta cana rond cu toelage.”

Otro sindicato di empleado publico ta keto

E tres sindicatonan ta representa un grupo di empleadonan publico y otronan cu ta ricibi salario subsidia di Gobierno. Pero tin ainda e otro sindicatonan di empleadonan publico cu pa un of otro manera no ta brinda e informacion na nan miembronan. Como tal, varios miembro di otro sindicatonan ta sigui yama SADA pa haya mas informacion, pa haya sa kico a pasa den e reunion cu Gobierno.

Sinembargo, te hasta Gobierno mes ta parce di no por duna mucho detaye, pasobra hopi di e plannan no ta detaya y ta pendiente di e Organo di Reforma y Desaroyo, COHO specifica esakinan. “Nos a haya e documentonan di COHO y tur cos a keda mescos. Pero no tin un splicacion adicional riba e landspakket.”

Maduro ta haya normal si cu Hulanda a determina cu no lo tin reduccion den presupuestonan di e asina yama orde diensten, esta cu Polis y Aduana, cu pa casualidad tin su sindicatonan cu si ta hiba palabra. “E ta mas cu logico, pasobra si ta bay corta den KIA, ken ta cuida e presonan. Si ta corta den Polis, ken ta bay ta encarga cu orden publico. E ta logico cu no por corta den e servicionan aki, pasobra ta trece destabilidad formal den e pais aki.”

Pero esey ta haci tambe cu net SADA, SEPPA y SIMAR ta relativamente fuerte para. Segun Maduro, ta e tres sindicatonan aki a tuma e iniciativa pa busca mas informacion, aunke cu tur otro tabata invita. “E ta bisto si cerca miembronan di e otro sindicatonan, pasobra nos di SADA ta haya hopi reaccion di miembronan di otro sindicatonan cu ta representa empleadonan publico. Mescos ta conta pa SIMAR y SPA. Tin algo pasando, pero no ta keda na nos pa investiga kico ta pasando den un sindicato. Nos tin nos reglamento pa cumpli cune.” Edward Maduro a bisa cu e no por specula pakico e otro sindicatonan no ta papia di e tema awor aki.

No ta haragan

Sindicatonan y ambtenaarnan no ta haragan, Albertus, Maduro y Dirksz a enfatisa. Edward Erasmus a ripiti cu e tres sindicatonan ta bon consciente di e situacion penoso di hopi Arubiano.

Nan ta consciente cu tin un cantidad di ciudadano cu no tin ningun entrada y cu ta depende di donacion di cuminda pa nan sobrevivencia. Pero e mandato di SADA, SIMAR y SPA ta pa para pa nan miembronan. Emocion of pensamento personal no ta parti di e trabou.

“Nos tur tin famia afecta. No tur ta ambtenaar. Nos tur tin famia cu ta afecta directamente. Pero nos no ta vocifera nos deseonan personal, sino locual nos miembronan kier. Locual nos ta mira ta e desbalansa entre e Ministernan, Parlamentarionan y Coordinadornan versus e ambtenaarnan,” Edward Maduro di SADA a bisa. “Esey ta locual nos ta evalua. No tur ambtenaar ta gana un schat di placa. Tin ambtenaar cu despues di 31 aña, no a sali di schaal 3, ganando como 3 mil florin pa aña. Nan ta perde, pero nan ta wak si con un hende cu Gobierno a nombra ta strike 8 mil florin mas toelage.” E ta enfatisa cu ta busca e balans, unda cu no sin mas un Gobierno por pidi pa ta solidario, pero den cas mes no ta aplica esaki. Maduro ta ilustra cu por ehempel Prome Minister mes ta haya como dos a tres mil florin di toelage pa luna. “E ta algo cu ta biba den comunidad. Ban haci’e honesto. Tin pensionado, no solamente ex Minister, pero otro cu tin pensioen cu ta traha como coordinador y ta cobra toelage.” Ehempel ta e Cumbre di 6 di November, unda “ma conta como 15 coordinado ta cana rond, unda tabatin 10 representante di sindicato. Entre nan pensionadonan cu ta ofrece bebida na Prome Minister. E ta insolito pa mira con ta nombra personanan pa 5 aña.”

Edward Maduro ta consciente cu ta bay tin hende cu ta critica e sindicatonan cu nan no ta tene cuenta cu e situacion actual. Pero locual e sindicatonan di nan banda ta mustra cu Gobierno ta sigui practicanan di pasado, unda ta sigui nombra hende y ta sigui traha cu cantidad di coordinado, algo cu e Gobierno actual a critica di esun anterior. “Personalmente mi ta spera cu Hulanda lo para nan. Un revision di aparato gubernamental lo por pone fin na patronahe.”