E acuerdo entre Hulanda y e islanan Aruba, Curaçao y Sint Maarten den ultimo version di e ‘Uitvoeringsagenda’ pa ultimo parti di e aña aki, ta mustra bon cla cu cierto decisionnan clave ta yegando mas cerca. Esaki a pesar di e tardanza cu e Agenda tabata mustra durante e aña aki. Nos no a mira tanto critica ainda di oposicion, den parlamento y pafor, y nos no sa si esey tin di haci cu e hecho cu lo ta dificil pa indica kico lo a propone na lugar di e Agenda, cu pa gran parti ta defini pa Hulanda. Di otro banda, kico otro a spera anto, si pa hopi aña nos subsiguiente gobiernonan no a haci nada pa resolve e problemanan cu awor lo haya solucion, si ta logra impone esakinan.

Na momento cu e problemanan, y nan respectivo solucion, ta riba mesa, lo bin un ferviente oposicion por ehemplo di sindicatonan, pero na e momento ey lo ta bon pa nan haci un reflexion sincero di kico tabata nan contribucion te awor, mirando e problemanan grandi cu nos ta enfrenta. Pasobra ta yega un momento cu un sindicato no por simplemente defende loke ta nan interpretacion di e interesnan di nan miembronan. Tin experiencia bon conoci kico a sucede durante e Dialogo Social di e gobierno anterior democrata cristian, unda tabatin un acuerdo caba entre gobierno y e gremionan empresarial, unda di ambos banda a guli proposicion propio pa yega na e cambio di edad di pension, y aumento di e gastonan pa empresario y empleado. E sindicatonan a keda sin firma y a para mira con gobierno a bay parlamento pa pasa e cambio di ley. Despues, silencio. Den e siguiente eleccion, na 2013, e tema aki no tabata relevante den campaña, aunke oposicion, e actual partido grandi den gobierno, a bin cu e promesa ridiculo di baha edad di pension atrobe te na 62 aña, algo cu cualkier conocedor di e materia lo considera completamente imposible. E cifranan di nos demografia y actual economia ta masha cla den e caso aki. Por tabatin un solucion si tempran den e proceso, den añanan 90 ya tabatin e promer señalnan cu e solidez di e fondonan tabata na peligro, lo a tuma medidanan pa logra mantene solvencia di e fondonan di AOV.

Ironia di bida ta cu e mesun partido cu tabata propaga e reduccion di edad di pension te na 62 aña, awor mester a sinta na mesa cu Hulanda y ‘guli manda abao’. Nos hasta ta bay 67 aña, a menos cu gobierno di Aruba indica otro manera pa resolve e asunto aki. Honestamente dicho, nos no ta mira tal posibilidad. E argumento debil cu toch ta bay wak si den futuro por tin un situacion unda por baha edad no ta make sense y por sirbi solamente pa tene e fanaticada mas leal contento. Un vez mas, e cifranan no ta sostene e pensamento aki.

Tin otro asunto unda tampoco nos ta mira tanto colaboracion di e sindicatonan. Esey ta riba tereno di enseñanza, unda e temanan cu a bin dilanti te awor ta mayoritariamente asunto di posicion huridico di e empleadonan den e sector. Mester bisa cu den un entrevista cu e presidente di sindicato el a referi na e experiencia na Bonaire, unda pa mas di 10 aña Hulanda a interveni fuertemente den enseñanza basico, pa aumenta e nivel escolar di e alumnonan, pa mehora nan oportunidadnan den continuacion di nan educacion y carera. E tabata di bishita aya, pero segun nos ta enfoca demasiado riba e recursonan financiero, cu na Bonaire no ta haci falta, y aki sigur ta un di e problemanan grandi. Pa mas di 90% presupuesto di enseñanza ta consisti di salario y otro gasto como empleador, cu consecuencia cu no ta keda placa pa inverti den innovacion. Pero esey no ta e problema grandi cu tin. Esey ta e falta di discusion, y pior, falta di consenso den ki direccion e desaroyo mester bay. Con nos ta bay mehora un sistema educativo, unda awor cada ken ta hopi liber pa dicidi kico nan ta haci. Lo mester bin un sistema hopi mas estricto, unda ta sigui e alumnonan desde e promer momento, y no ta warda pa interveni na final di scol basico, ora e daño ta haci caba. Esey no ta implica solamente mas supervision riba alumno pero riba maestro tambe, segun criterio obhetivo cu ta conta pa tur. Y ta aki tin e clabonan mas importante pa resolve, pasobra lo por tin hende cu no ta di acuerdo cu e decisionnan tuma pa yega na un enseñanza mas uniforme y mas controlable. E problemanan actual cu ta tratando ta keda chikito banda di loke mester bay tuma lugar ainda.

Ta keda ainda e interesnan di e empleado publico cu nos lo trata den mas detaye na otro. En general aki tambe no ta e aspecto financiero cu ta bay hunga un papel importante, sino e cambionan structural cu mester introduci pa logra un proceso mas profesional di contratacion, evaluacion di trabao y condicion di retiro. Esaki ta linea recta contra e interesnan politico actual, pero tambe contra e maneho cu e sindicatonan a yuda sostene tanto decada. Ta parce cu a yega e momento pa pone asunto di salario un banda, pa papia di e asuntonan strategico aki. Nan lo cumpli?

LEAVE A REPLY

Please enter your comment!
Please enter your name here