Durante un conferencia di prensa di diferente sindicato, nan a informa cu nan a dicidi di manda un carta na prome minister Evelyn Wever-Croes, den cual nan ta solicita un reunion pa asina nan por papia tocante e medidanan relaciona cu pandemia di coronavirus, cu a keda introduci aña pasa na luna di mei.

Edward Maduro, presidente di sindicato di Aduana (SADA) a trece dilanti cu prome cu eleccion na luna di juni y despues di eleccion na luna di juli, sindicatonan a sinta cu formador. Durante e reunionnan aki a keda palabra cu unabes cu gobierno lo a wordo formalisa, nan lo tin cu yama sindicatonan pa asina yega na diferente acuerdo pa lo cual ta trata inhouding di 12.6% y tambe e medidanan cu a bin na vigor pa pandemia di Covid for di aña pasa tocante e maatregelen.

Diescinco organisacion (FTA, ALVAST, IOWA, SADA, SIMAR, SINBA, SEPPA, UEA,TOPA,STT,STA SPA y OPPA) a uni pa manda e carta aki manera Maduro a anuncia lo cual e enfatisa cu esey ta lo cual nan tabata kier semper, e union sindical cu nan kier pa gobierno haya sa cu esaki ta un tema hopi importante no solamente pa trahadonan sino tambe pa pensionadonan mirando cu OPPA tambe ta forma parti di e diescinco organisacion aki cu a uni.

Maduro a informa cu nan a haya un reaccion di parti di prome minister indicando cu el a haya carta y otro organisacionnan a acerca na dje cu e mesun tema aki na unda el a bisa cu nan lo pidi pa Crisis Team reuni cu e sindicatonan.

Di esaki, Maduro a señala cu prome minister a papia di Crisis Team siendo cu esey ta un parti di e Covid maatregelen y inhouding di 12.6% entre otro temanan, esaki pa nan a trece cierto inkietud pa motibo cu segun Maduro mes a bisa un di e puntonan cu e sindicatonan ta wordo acerca constantemente y mas ainda ora cu economia a cuminsa pick up manera ATA a informa dianan pasa tocante recuperacion di turismo.

Asina mes el a bisa cu ta importante pa comunidad kico e sindicatonan ta bin haciendo y cu nan ta contento cu hopi di nan ta comparti e mesun opinion pa sinta cu gobierno na mesa di manera profesional pa asina conhuntamente yega na un solucion.

“Pa asina no laga nada pasa sin cu por a bisa cu nos no sa, cu manera bisa gobierno tuma decisionnan y pa mañan ta cay manera sorpresa, como lo cual a sucede aña pasa pa lo cual ta trata e 12.6%” Maduro a declara.

A pesar cu gobierno a keda forma mas cu un luna pasa, nan tambe kier laga gobierno pa nan tuma su espacio y por plania un reunion pa motibo cu nan ta 15 organisacion y pa esey Maduro a sigura cu nan mester un tiki tempo, “nos no kier pone un cuchiu na garganta pa pone presion, nos ta kere cu mester cumpli cu lo cual e mes a palabra cu nos y nan mes mester pone un fecha maximo pa dos siman”, el a afirma.

Pa loke ta e parti di Hulanda, Maduro a splica cu ta berdad cu Aruba tin cu atende cu nan e asunto di Landspakket pero no por ta asina cu gobierno mes ta bay duna na gobierno Hulandes kico ta nan decision “pasobra e no ta un decision conhuntamente nos a yega na dje”.

El a pone como por ehemplo e recorte di 12.6% cu a wordo introduci un aña pasa, na unda cu el a sigura cu esaki tabata un decision di gobierno.

Di su parti, Josephine Albertus presidente di sindicato SIMAR a expresa cu na Hulanda e caso ta diferente, nan mester corta salario cu 12.5% y na Aruba cu 12.6%, “ si nos tuma nota di nos islanan colega, nan por a sinta na mesa y nan por negocia unda ta corta y con, cerca nos el a wordo imponi”, Albertus a enfatisa.

Ta p’esey cu nan kier sinta na mesa pa motibo cu tur hende sa cu cosnan ta birando mas caro y e ora ey nan kier sinta na mesa pa wak si por haci e cortamento di un otro manera.

LEAVE A REPLY

Please enter your comment!
Please enter your name here