Situacion na Venezuela: Entre miedo y realismo

Di repente e situacion na otro banda di awa a bira hopi mas tenso, motibo pa bastante preocupacion aki na nos isla, principalmente despues di e noticia cu gobierno Venzolano a cera frontera cu e tres islanan ABC via lama y via aire. No pa prome biaha nos mester atende un situacion asina, aunke e biaha aki e motibo ta diferente.

Nos a bira parti seriamente di e conflicto cu mas ta hala atencion di mundo. Hasta situacion genuino di guera, manera na Siria actualmente, mester tuma asiento na segundo rango pa duna prioridad na e conflicto dilanti nos porta. Esaki ta causa cierto angustia den comunidad, y ta aumenta e urgencia y necesidad di informacion na tempo, y adecua. Den esaki, midi bo palabra ta esencial, tanto pa e voceronan gubernamental como pa prensa mes. Nos no tin di keha di e esfuerso di nos porome minister pa loke ta e informacion, pero si di e forma di maneha e situacion, creando mas tension innecesario. Diarason atardi redaccion di e medio aki a haya invitacion pa un rueda di prensa algun minuut prome cu e lo a cuminsa. Esey ta e miho manera pa crea impresion cu tin algo superurgente pa comunica, cu no ta permiti ningun retraso…

Pa despues bin tuma nota cu na e momento ey ainda no tabatin un confirmacion formal di banda di gobierno Venezolano. Loke tabata conoci na e momento ey tabata e accion na nivel di estado Falcon pa loke ta e limitenan di frontera estatal, segun medionan Venezolano. Despues si a bin e confirmacion formal cu tabata spera. E ambiente di tension ey a conduci na cantidad di pregunta cu no tabatin lugar, realmente. Pregunta agita pakico ta sinta warda riba kico ‘Den Haag’ ta laga sa, si nos mes no por tuma accion… En corto, un falta palpable di con mester actua den un situacion asina; esey ta, di banda di prensa. Prome minister na un manera calmo a purba pone tur cos den e contexto adecua. Y nos ta kere cu den e dianan nos dilanti esey lo ta necesario na mas ocasion, segun e acontecimentonan lo bay sigui otro. Motibo tambe pa purba mira tur cos den e contexto corecto. Claro cu lo keda cada ken nan interpretacion di e situacion, ningun hende ta obliga di sigui opinion di nos como medio.

Importante ta e preocupacion mas grandi di hopi hende: e situacion na Venezuela, y e eventual rabia cerca gobierno di Maduro pa e posicion cu Reino Hulandes a tuma den e asunto aki, lo por tin repercusion pa nos den forma di algun acto di agresion? E contesta ta cu mester distingui hopi bon kico e corelacion di forsa y poder ta den e asunto aki. Pregunta: kico nos a mira di agresion contra e protagonistanan di e insureccion no arma aki dentro di e pais mes? Imagina bo un pais unda un poder absoluto, y absolutamente arogante y ‘todopoderoso’ mester tolera cu un grupo di hende cu nan a bringa y odia profundamente, a bira ‘untouchable’ sin un solo arma den nan man. Kico esaki ta? Un di e poco biahanan den historia di humanidad cu un poder politico-militar, cu a aresta, tortura, y mata na nan antoho, a haya un ‘warning’ asina fuerte cu nan a dicidi cu nan no por usa nan poder sanguinario contra nan adversarionan politico. Esey ta un victoria riba su mes. E hecho cu tanto e poder politico, Maduro y Cabello na prome lugar, y e cupula militar a comprende masha bon cu agresion dentro y fuera di e pais lo ta un sentencia di morto pa nan. Un acto di agresion contra Aruba, o un di e otro islanan, lo ta un agresion contra un teritorio perteneciente na un miembro di NATO, y pa e actual presidente Mericano, cu no ta conta cu nos admiracion den un cantidad di otro asunto, e agresion ey lo ta nada menos cu un regalo pa por cuminsa actua.

Esey ta hustificable segun normanan di derecho internacional? Talvez si, talvez no, pero esaki no ta momento unda derecho internacional ta manda, sino puro poder. Y den e situacion actual e aliadonan Rusia y China no lo ta bay haci mucho. China di mes no y ya a laga sa di ta traha cu cualkier gobierno cu sinta despues. Nan kier nan placa cu a fia Venezuela, punto. Pa Rusia ta dificil pa haci algo, mescos cu algun aña pasa nan a anexa parti di Ucrania, y Merca mester a para wak, sin haci nada. Den e contexto aki, awor ta ‘payback time’ pa e Rusonan…

Cu esey, nos a kita tur preocupacion for di caminda? Sigur cu no, pero e miho alternativa ta pa sigui tur e acontecimentonan cu atencion y tuma e decisionnan corecto, na tempo y dunando amplio informacion na e ciudadania. Ademas cu den e asunto aki, nos no ta para nos so. Es mas, gran parti di e decisionnan clave lo no ta di nos mes. Tanto cu na Hulanda a papia cu nos mester ‘dop onze eigen boontjes’ e tayo grandi awor ta nan dilanti. Ta di spera cu nan lo sa di consulta si.

LJMADURO – 20-FEB-2019

 

You May Also Like

Definitivo: Venezuela no ta habri frontera

Tempo no ta na nos desbentaha Venezuela ta keda atrae atencion tur dia. Y ...

Kico mester ta nos maneho di refugiado?

Den nos edicion di ayera un di nos editornan a bay riba e tema ...

Transparencia den bon direccion?

Ainda falta… E siman aki nos prome minister a tuma un bon decision: el ...

Trabao grandi y presion di tempo

Caya Grandi y Dump no ta warda… Diligencia y actuacion fuerte ta loke generalmente ...

editorial 2_15_1.jpg

Circo ta sigui, tur payaso ta keda… No tin señal di algun accion positivo…

Manera tabata di spera, e pelea den parlamento entre presidente y su vice presidente ...

Aruba den centro di atencion di mafia internacional

Historia ta ripiti? Den añanan sesenta di siglo pasa, Aruba a logra subi lista ...