Un cacho dera cu diferente artefacto acerca ta marca como un descubrimento historico, asina arkeologo Raymundo Dijkhoff ta declara.
Ayera mainta Bon Dia Aruba tabata presente na e parcela Sta. Cruz 35, patras di Notario M. Tromp, caminda un team di experto, tanto di Museo Arkeologico di Aruba (MAA) como di Universidad di Leiden a realisa trabou di excavacion di sondeo di hallazgonan di balor arkeologico y historico den cuadro di e proyecto NEXus 1492
Hefe di departamento Educativo di MAA, Marguerita Wever a bisa cu nan lo ta trahando un par di dia pa realisa un excavacion di sondeo haciendo uzo di tecnologia moderno.
Descubrimento historico
Den e excavacion cu nan a haci nan a yega di haya rastronan prehistorico cu no tin nada di haber cu e santana historico. Pero di otro banda e santana historico mes ta mustra hopi prometedor riba produccion di informacionnan valioso. E caracteristica aki ta haci e area aki interesante den wowonan di e profesionalnan aki.
Sr. Dijkhoff a bisa cu den e area aki tin rastro di actividad humano di mil aña atras. “Nos ta para den centro di ciudad cu tabata e capital di Aruba den e prehistoria cu tabata Sta. Cruz.” Den e area aki nan ta bay haya diferente rastro como testimonio di e presencia di nos antepasado manera restonan di cas, fogon, entiero, dump, etc..
Sr. Dijkhoff a destaca e descubrimento di un skelet di un cacho como un descubrimento historico importante. Den pasado den contexto arkeologico nan a yega di descubri e restonan di animal no endemico manera bina, macaco, ocelot, etc. y endemico manera turtuga, lagadishi, pisca, etc..
Aunke cacho tabata existi den prehistoria; pero nunca nan no a yega di descubri resto di un cacho prehistorico. Dialuna ultimo den e tereno aki nan a descubri e resto di un cacho; y a base di nan investigacion a indica cu deliberadamente e cacho aki a wordo dera eynan. Nan a haye dera cu diferente artefacto acerca cu ta mustra cu e tabata un bestia importante pa un persona of famia e tempo aya. E tabata dera den un santana historico tambe.
“Prome biaha na Aruba nos ta haya den un contexto arkeologico nos ta haya un cacho, y e ta un cacho historico.” Si e cacho ta parti di e santana el a wordo dera entre 1730 pa 1810, pero eventualmente e por ta mas bieu hasta 400 aña pasa.
Mina di balor arkeologico
Na aña 2001 y 2012 e team di e departamento di investigacion di MAA a yega di realisa trabou di excavacion na Sta. Cruz 35 caminda nan a descubri un santana historico cu ta data entre 1730 pa 1810. E tereno aki a bira un mina valioso di informacion desconoci pa nos historia, segun sr. Dijkhoff.
Na momento cu nan a descubri e sitio aki na 2001, MAA a saca e restonan di tres individuo y nan a laga cuater atras. Na 2012 nan a habri den total 19 graf pa un total di 26 individuo; y nan a laga 15 pa 16 graf atras. Sr. Dijkhoff ta expresa cu MAA ta hopi agradecido cu notario Marion Tromp kende ta propietario di e tereno y kende for di prome instante a mustra su cooperacion pa nan y un curason grandi pa arkeologia di Aruba.
E ta bisa cu den e maneho di museo, ora cu tin sitio importante cu un balor arkeologico particular cu tin cas, nan ta purba di yega na un cambio di tereno cu e propietario. Den e caso aki nan ta kedando cla cu e notario pa haya otro tereno; pa asina esun di Sta. Cruz 35 keda tereno di gobierno. E tereno aki lo wordo desaroya solamente pa bienestar di arkeologia Arubano y logicamente pa e pueblo di Aruba.
Eventualmente e lo por bira un sitio unda nan por laga cierto parti di excavacion habri caminda e hendenan por bin wak diferente fase di e trabou arkeologico. E ta haya cu ta importante pa salvaguardia e sitio aki pasobra e ta “un perla pa historia di Aruba”.
NEXus
Na 2001 nan no tabata sa cu e sitio aki tabata asina importante. Awor e ta parti di e proyecto NEXus 1492, y e ta hungando un rol relevante pa full historia di Caribe. E importancia aki ta debi na e contexto relaciona cu e encuentro entre dos cultura di e parti di prehistoria y e brug pa e periodo historico tempran. E pida di tereno aki eventualmente lo por splica con e encuentro a bay entre e cultura indigena cu e cultura Europeo; y te hasta cu e cultura Africano tambe.
Tambe kico realmente nan a experiencia pasobra hopi cos cu nos ta siña of nos sa ta for di e bista Europeo.
Aworaki e proyecto NEXus cu ta den full Caribe incluyendo Aruba, ta purba di haya sa kico berdaderamente a pasa, independientemente di loke ta wordo conta den e bukinan di historia. “Kere mi e historia di e santana aki ta bay cambia e historia di Aruba. E ta bay cambi’e!,” segun sr. Dijkhoff.
E proyecto NEXus 1492 ta haci posibel loke eventualmente lo resulta dificil pa nos pa falta di recurso. E presencia multi disciplinario di expertonan entre otro di Europa riba diferente area cu tin di haber cu arkeologia, entre nan prof. dr. Corinne Hofman di e facultad di Arkeologia di Universidad Leiden, ta un sosten grandi.
Nan a bin cu sistema mas avansa pa realisa e trabou aki cu ta encera tres meta importante: E prome ta cu nan kier haya sa e dimension di e santana aki, y esaki lo wordo haci cu ekipo special te hasta cu robot. Nan lo bay habri full e tereno aki, pero nan no tin pensa di saca material descubri afo, entre nan skeletnan. E di dos parti ta relaciona cu e trabou di documentacion cu sistema 3D y sistema hopi moderno y innovativo den arkeologia y documentacion cientifico.
Y e di tres meta ta pa medio di e trabou aki e personal di e departamento di Investigacion di MAA lo update nan mes cu uzo di strategia moderno di excava. Tambe nan ta busca cierto meta specifico cu e profesornan cu a bin di afo ya cu nan tin hopi conocemento pa comparti cu nos expertonan local.
Nan ta documentando tur e trabou aki cu video y potretnan cu lo wordo divulga via e Facebookpage di MAA.
