Aña escolar nobo casi ta cuminsa y te ainda ta existi mayornan cu no a yega di inscribi nan yiunan, asina tambe tin otro cu ya a cuminsa prepara e materialnan y uniform pa bay scol.

Bon Dia Aruba a haya un entrevista cu Anuesca Baly, Director General di Stichting Katholiek Onderwijs Aruba (SKOA), kende a splica con ta bayendo cu e inscripcion di muchanan pa aña escolar 2019-2020 y e retonan cu nan a asumi desde haci algun tempo y tambe aworaki.

Baly a bisa cu aña escolar nobo ta presenta hopi reto, compara cu aña pasa. El a expresa cu SKOA ta contento cu e resultadonan di e muchanan cu a pasa nan examen, pero ainda ta existi un espacio pa mehoracion.

Di mesun manera, Baly a expresa cu aña pasa nan a introduci inscripcion online pa medio di website di SKOA: Esaki tambe ta trece su reto cune pa via di SKOA su tamaño. SKOA ta un organisacion basta grandi cu 46 scol na Aruba riba nivel primario, secundario, kleuter y basico, por lo tanto haci inscripcion online ta un reto pasobra no tur mayor ta adapta cu medio digital ainda, pero e pensamento pa 2021 ta cu tur scol y tur asunto escolar lo bay digital. Si mayornan no ta bon cu tecnologia, tambe tin e opcion di bay na oficina di SKOA pa inscribi nan yiu.

Tabata existi un rumor unda ta bisa cu SKOA ta scoge cua alumno tin mag di cuminsa scol y ki tempo. Baly a aclaria cu, pa ley, te ainda un alumno cu ta drenta scol primario mester tin cuater aña, sinembargo, e mayor por inscribi su yiu den un lista di espera si e mucha lo bay cumpli cuater aña prome cu december y ora cu SKOA ta caba di procesa tur e alumnonan di cuater aña y ainda tin luga e mucha por haya un espacio.

Igualmente, el a destaca cu na e momentonan aki tur nan scol ubica pabou di brug ta yen. Pero ora ta papia di MAVO, Filomena College y San Agustin ainda tin par di luga bashi. Pa locual ta scol basico, tambe ta full, pero el a sigura cu mayornan mester tin na cuenta cu e mayornan mester inscribi nan yiunan. Tocante e reinscripcion, cual ta bay online, e mayornan mester aplica pa e yiu por inscribi di nobo.

Ademas e director a duna di conoce cu un alumno cu ta inscribi na un scol cu ta cay bou nan, tin cu paga Afl 175,00 pa aña. Esaki ta encera actividadnan y seguro, ademas si e scol tin airco, e mayornan mester paga Afl 150,00 adicional. Loke ta yega na Afl 325,00 total pa aña. Di parti di gobierno nan ta haya cierto fondo cu ta cubri algun gasto, pero esaki no ta cubri tur cos.

Pa e motibo ey, Baly a bisa cu nan a cuminsa cu inscripcion desde luna di februari y nan tin un areglo di pago cu ta permiti mayornan cu no por paga di biaha pa paga den varios parti.

E Director kier subraya cu mayornan mester realisa cu, si e mayornan no ta paga e cifra rekeri, e mucha no por asisti actividadnan pafo di scol, pero tampoco SKOA ta nenga cu e mucha por haya otro actividad na e mesun momento ey den scol. Importante ta cu e mucha por haci su actividad.

 

LEAVE A REPLY

Please enter your comment!
Please enter your name here