Solamente 11 compania tin interes pa continua den Limited Tendering

Di e 17 compania cu tabata participante den e proceso di RFP pa waste to energy facility, solamente 11 a mustra interes pa continua den e Limited Tendering.

Den un publicacion anterior a trece dilanti cu ningun di e 17 compania cu tabata participante ningun a entrega oferta. Basa riba e peticion di varios compania pidiendo mas tempo, Gobierno a tuma e decision pa di acuerdo cu normanan Europeo, habri un onderhandse aanbesteding/ limited tendering cu e gruponan.

Solamente 11 di e companianan aki a mustra interes pa continua den e limited tendering. Ta trata companianan bastante renombra, cu tin hopi informacion y cu ta haci esaki na otro pais. E 11 gruponan aki, den e siman di 26 pa 30 di augustus 2019, nan lo tin e oportunidad y opcion pa sea ta na Aruba of a traves di video conference call pa haci e preguntanan cu nan tin ainda.

Segun e comunicado cu Bon Dia Aruba a ricibi, ta indica cu Gobierno a cana e proceso aki pasobra a sinti cu tabatin interes hopi grandi. Sinembargo manera cu ta conoci durante di e ultimo siman prome cu e RFP tabatin hopi informacion incorecto cu a sali den medionan di comunicacion rond di e proyecto aki.

Un di e preocupacionnan cu a surgi ta di e cantidad di sushi cu por garantisa na e operador cu lo por wordo procesa. A confirma na e participantenan a base di e leynan existente y leynan cu mester wordo cambia, pa sigura cu tin e cantidad di sushi cu e companianan ta pidi, pa di e forma ey por tin un procesamento di e sushi akinan na Aruba caminda cu ta converti esaki den energia.

E Energia aki lo wordo bendi na WEB pa despues genera entrada pa e compania. Banda di esaki un di e preocupacionnan cu tabatin tambe tabata e hecho cu tabata kier tin e flexibilidad den e prijs poni pa bende KW na WEB. Manera cu tabata parti di e proceso di e tendering anterior, esaki a wordo manteni cu e punto di salida den e documento di 7 cen Mericano pa KW. Gobierno a mustra cu tin e flexibilidad riba esaki.

Cu e dos componentenan aki, ta crea e oportunidad y interes un biaha mas di e companianan pa nan por bin Aruba den e siman di 26 pa 30 di augustus 2019. Despues di 30 di augustus, nan lo tin 90 dia di tempo (3 luna) pa por presenta un oferta pa Pais Aruba.

Importante pa agrega ta, cu e proyecto aki no lo costa Gobierno di Aruba placa. Den e caso aki ta trata di un proyecto cu ta uza e “Build Own Operate financial model”. Esaki ta significa cu esunnan cu ta bin opera na Aruba mester ta doño di e propiedad y lo mester inverti y opera esaki na Aruba. Pa cual por compara esaki cu e parke di molinanan di biento cu tin na Vaderpiet (ambos tecnologianan comproba).

E situacion cu tin na Parkietenbos simplemente no por continua mas! Sigur despues di e rapport cu a haya di PAHO, casonan medico y mas! Nan ta sumamente penoso y lamentabel pa motibo cu esaki no ta forma parti di e vision y meta cu Gobierno tin. Cual ta pa mehora calidad di bida di ciudadanonan y pone e ser humano central. Mas leu cu esaki, e rapport di PAHO a mustra tambe cu no ta solamente esunnan cu ta biba cerca den cercania di dump ta na peliger, sino nan a punto di un brote na nivel nacional! Tur esaki a pone cu na e momentonan aki 80% menos di e volumen di sushi cu tabata bay Parkietenbos no ta bay eynan mas y a scoge pa e metodo di ‘bailing’ den acuerdo cu ECOGAS, pa percura cu ta atende y dera bultonan na un manera responsabel pa nos medio ambiente y salud di pueblo.