Na Cede di Partido MEP, diadomingo 28 di februari, a tuma luga e sorteo virtual di e rifa pa recauda fondo pa campaña electoral na september venidero. Lider di MEP, Prome Minister Evelyn Wever-Croes, den nomber di Partido MEP, a gradici tur esunnan cu a contribui den e recaudacion aki pa yuda Partido cu fondo pa campaña. Nos ta den aña di eleccion y un aña particular door di Covid-19 sin embargo mester cuminsa prepara pa eleccion 2021 y pa esaki Partido MEP ta conta cu sosten di Pueblo di Aruba. E rifa a wordo hopi bon bendi pa cua Partido MEP ta hopi satisfecho y gradicido.
Partido MEP a celebra 50 aña di existencia, no na grandi, pero si tawata tin y lo bay tin momentonan di conmemoracion y celebracion. Siman pasa Partido MEP a lanta Fundacion pa Formacion Politico Nelson Orlando Oduber. Esaki pa Partido MEP ta un soño realisa pa asina train candidatonan nobo y duna charla y workshopnan na comunidad den general.
Mescos cu el a haci durante e ultimo 50 añanan, Partido MEP lo sigui traha incansablemente pa logra alcansa e maximo felicidad pa cada ciudadano riba e pida baranca aki. Esaki ta e compromiso cu MEP tin cu e pueblo di Aruba.
Candidatonan di Partido hunto cu Lider di Partido tawata na Cede diadomingo atardi prome cu e sorteo pa bende e ultimo ticketnan na esunnan cu tawata pasando riba e caminda dilanti di Cede y teniendo cuenta cu reglanan vigente pa cuida di e virus, a logra saluda simpatisante y votadonan di Partido cu a yega cerca.
Riba e diadomingo mes e ganado a wordo conoci cu e number ganado 07824. Partido MEP ta felicita e ganado y ta gradici tur cu a cumpra rifa den e temporada dificil. Danki pa e sosten. Danki pa semper t’ey pa MEP.
