(AFP)— “Spider-Man: Brand New Day” a mira e debut di weekend mas grandi den historia na box office domestico, segun cifranan actualisa for di Merca y Canada a mustra dialuna.
E ultimo pelicula den e franquisia di superheroe di Marvel—cu actor Britanico Tom Holland un bes atrobe den e rol titular—a gana $360 miyon, te cu e calculacion di $355 miyon di diadomingo, produccion compania Sony Pictures a bisa.
E suma ey a pone “Brand New Day” prome cu e pelicula cu a tene un record prome, “Avengers: Endgame” di Disney, cual a debut na 2019 cu $357 miyon—no ahusta pa inflacion. E cifra domestico actualisa tambe ta trece e total global di e pelicula pa $932 miyon, ainda na segundo luga na e suma enorme di $1,2 cu “Endgame” a gana.
Dirigi pa Destin Daniel Cretton, “Brand New Day” ta mira Peter Parker (Holland) bibando den isolacion despues cu el a bora su identidad pa mundo y luchando cu e cambionan di su podernan.
Mientras e ta purba reconecta cu su pareha MJ (hunga pa Zendaya, ken ta Holland su casa den bida real) y miho amigo (Jacob Batalon), Spider-Man mester confronta un forsa menasante nobo na New York City.
Mark Ruffalo, Florence Pugh y Sadie Sink tambe a uni cu e elenco, y e pelicula ta sali prome cu e estreno di “Avengers: Doomsday” na december. Variety a yama e debut di “Brand New Day” “impresionante”, mientras cu el a nota cu e pelicula aki y “Endgame” ta e unico dos pelicula pa gana $300 miyon den un solo weekend.
E debut di Spider-Man tambe ta notabel mirando su competencia cu e blockbuster mas recien di Christopher Nolan “The Odyssey,” cual ta tumando tur e pantayanan di IMAX.
“Brand New Day” ta programa di sali den IMAX e weekend binidero.
