Ayera mainta durante conferencia di prensa, St. Paulus School, hunto cu Colegio Santa Teresita, Rayo di Solo Kleuterschool y Scol Caiquetio a anuncia nan marcha cultural en conexion cu celebracion di Dia di Himno y Bandera. Cabesante di St. Paulus School, Randy Arends, a elabora ariba e informacion di e marcha cultural y e meta tras di esaki.

Arends a splica cu na aña 2018 a nace e idea pa purba algo nobo den conexion cu celebracion di dia di himno y bandera. E cabesante suplente di St. Paulus School e tempo ey a sugeri pa e scol subi caya pa asina celebra e dia di himno y bandera y demostra e sentimento patriotico a traves di un marcha pasando den e cayanan di San Nicolas.

El a conta cu ayudo di un integrante di Massive Brassband a train algun mucha di e scol pa toca drum y cu e muchanan ey St. Paulus School a subi caya y marcha den e cayanan di San Nicolas pa celebra e dia nacional di Aruba.

“Nos a haya tremendo feedback e tempo ey y nos a bisa cu esaki tin cu sigui. Na 2019 a organisa e marcha cultural un biaha mas y e biaha aki un tiki mas grandi. Na aña 2019 Colegio Santa Teresita a uni cu St. Paulus School den e marcha cultural pa haci esaki mas grandi y cosnan a cuminsa progresa,” el a agrega.

Despues na aña 2020, Arends a sigui conta, net dos dia prome cu e marcha cultural mester a tuma luga, tur cos a para pa motibo di e pandemia. E medidanan a drenta na vigor y mester a stop tur cos. Pero aworaki despues di tres aña, St. Paulus School ta organisa su marcha cultural un biaha mas.

“Cu hopi placer nos ta anuncia cu diahuebs dia 16 di maart, despues di 3 aña, St. Paulus School ta presenta nos di tres marcha cultural. Nos a haya hopi mas tempo pa prepara y e aña aki tres otro scol a uni na e marcha cultural: Colegio Santa Teresita, Scol Caiquetio y Rayo di Solo Kleuterschool. Nos ta sumamente contento cu nan tambe ta uni cu nos,” el a remarca.

E marcha cultural ta sali for di St. Paulus School, cu tononan di musica tipico. E ta bay direccion West riba Pastoor Hendrik Straat y na altura di Rayo di Solo lo drenta Torenstraat. E marcha ta sigui bay zuid, e mesun ruta di parada di carnaval, na unda ta drenta caya Dick Cooper, despues Caya Captain H. Rodger, drenta Lago Weg, sigui straight na Carnaval Village y drenta back Pastoor Hendrick Straat pa asina yega back St. Paulus School.

Segun Arends a indica e meta ta pa logra cana e ruta aki den un tempo di dos ora. E marcha cultural ta sali 8:30 di mainta for di St. Paulus y ta calcula cu lo tin alrededor di 600 mucha cu ta participa den e marcha compaña pa polis y rode kruis. “Nos ta pidi automobilistanan pa tene cuenta cu e dia ey nos ta bay tin hopi mucha riba caya,” el a enfatisa.

St. Paulus School ta organisa e marcha cultural aki cu e meta pa engrandece participacion di e alumnonan na actividadnan cultural y haci actividadnan cultural mas accesibel pa pueblo di Aruba.

“Nos kier engrandece nos cultura pa medio di formacion y educacion structural como parti di nos curriculum. Nos kier inulca e sentido patriotico den nos alumnonan y nos kier presenta den forma creativo obranan di arte cu muchanan ta traha den conexion cu e marcha cultural,” Arends a subraya.

Pa e marcha cultural cada scol cu ta participa a scoge un tema pa presenta y tur ta relaciona na e aspectonan di Aruba.

El a splica cu St. Paulus School ta trahando hopi cu Aruba Certification Program y e scol lo ta uzando hopi di e temanan cu e muchanan ta haya den e programa aki den klas den e marcha cultural. Cada klas tin un tema diferente cu nan ta presenta, pero tur ta relaciona cu e lesnan cu e alumnonan a haya den klas di pais Aruba.

Cabesante Interino na Colegio Santa Teresita a splica cu e aña aki, Santa Teresita tin e honor di celebra 90 aña di existencia como e prome scol di San Nicolas. Santa Teresita a wordo acerca pa e di tres biaha pa participa den e marcha. E prome biaha tabata na 2019 y e di dos biaha lastimamente tur cos a wordo cancela door di covid.

Pa loke ta e temanan cu e scol ta bay presenta den e marcha cultural, e cabesante a indica cu nan a bay back den tempo na San Nicolas, tempo prome cu e refineria a yega na unda San Nicolas a cuminsa cu un pueblo di piscadonan y a scoge pa cada klas tin un tema di pisca.

Klas 1 y 2 tin e tema di piscanan rond di Aruba, klas 3 y 4 tin e tema Coral y Turtuga di Aruba y klas 5 y 6 tin e tema di piscadonan y a traves di e temanan aki lo presenta tambe e historia di e piscadonan di San Nicolas. Cada klas ta haya un headpiece cu ta wordo decora segun e tema di e klas.

Cabesante di Rayo di Solo Kleuterschool a splica cu e scol ta bay representa e tema di placa den e marcha cultural. Cada klas, cinco klas den total, ta representa un biyete di Aruba. Klas 1 ta representa biyete di 10 florin, klas 2 ta e biyete di 25 florin, klas 3 ta di 50 florin, klas 4 ta 100 florin y klas 5 ta representa e biyete di 200 florin.

Pa cada klas e maestronan hunto cu e mayornan a prepara un headpiece pa cada mucha. E headpiecenan ta bay ta decora cu e bestia of e diferente cosnan cu ta bin riba cada biyete. E muchanan ta bay ta uniforma cu un T-shirt diseña pa e marcha cultural aki.

E cabesante di Scol Caiquetio a indica cu e esaki ta prome biaha cu e scol ta participa den e marcha. Scol Caiquetio ta un scol di enseñansa special y el a enfatisa cu esey no ta haci cu e muchanan no por uni na e marcha aki. E scol ta bay representa su nomber, Caquetio, pues e historia di e indjannan.

Caiquetio Scol ta consisti di casi 80 alumno y nan ta bay bisti T-shirtnan cu alumnonan mes a dorna den klas durante lesnan di obra di man, cu figuranan di e tribu Caiquetio. Esey lo ta nan participacion y contribucion pa cu e celebracion aki.

Pa loke ta musica, Arends a splica cu cada scol a percura pa su propio musica. Ta bay tin un banda tipico riba trailer, ta bay tin sound system pa yuda carga e parti musical y tur ta bay tin musica tipico di Aruba pa e muchanan custuma cu esey.

“Pa finalisa nos kier invita pueblo di Aruba pa diahuebs 8:30, bin para banda di caminda, bin apoya nos muchanan pa e marcha cultural aki. Kere mi e ta bay nice, e ta bay ta great, e ta bay ta bunita. Ban apoya e muchanan pasobra nan ta nos futuro,” el a finalisa.

 

LEAVE A REPLY

Please enter your comment!
Please enter your name here