E crisis di COVID-19 a afecta entrada y bida, segun Diego de Cuba

STA ta sostene decision di WAB, esta Werkgeversvereniging Arubaanse Bouwnijverheid, cu tur trahado mester ta vacuna contra COVID-19, of tuma test pa detecta e coronavirus.

Esaki a bira conoci na momento cu Sindicato pa Trahadornan di Aruba, STA a manda un carta pa Secretario di WAB cu proposicion pa contrato colectivo unda a manda un proposicion, pero cu ta inclui e posicion cu trahadonan lo ta vacuna.

Pago basa riba vacuna

E proposicion ta papia specificamente pa ricibi un lumpsum den e contrato colectivo cu ta core te cu 2024, cu ta tres pago di 500 florin na 2022, 2023 y 2024. Pero pa ricibi e lumpsum e trahado mester ta miembro di STA y ademas mester ta vacuna. Tambe a specifica aumento di salario pa ora, cu 60 cen na 2022, 50 cen na 2023 y 40 cen pa ora na 2024. Y atrobe, pa ricibi e aumentonan aki e trahado mester ta miembro di STA y ta vacuna contra COVID-19. E carta a bay tambe pa Mediado di Gobierno Anselmo Pontilius, y abogado Hose Figaroa.

Dunado di trabao tin derecho

E carta ta formula segun e exigencianan di dunadonan di trabao, De Cuba a bisa Bon Dia

Aruba. “Tur delegado di STA ta sostene e exigencia di companianan pa empleadonan ta sea vacuna contra COVID-19, of de lo contrario test diariamente riba nan mesun gasto.” Mayoria delegado y mayoria miembro di STA ta vacuna, pues no tabatin hopi obhecion, De Cuba a bisa. “Tin un par di miembro cu no kier vacuna. Pero si nan ta dispuesto pa test tur dia ta e pregunta grandi pasobra, e pregunta ta si nan tin e placa pa paga tur dia.”

Den concepto di de Cuba, un dunado di trabao tin e derecho pa exigi pa su trahadonan ta vacuna y esun cu no kier mester demostra cu e ta liber di e virus. “Ami como doño di compania por bisa cu mi tin 100 trahado y 99 ta vacuna y uno so no ta vacuna. Si kier bin traha, pero tur mainta mester haci un test, pa evita di infecta e otronan.”

Desaroyo lo continua

Segun Diego de Cuba, e exigencia cu trahadonan mester ta vacuna ta un desaroyo cu no por para y ta pensa cu pa januari lo tin un maneho hopi mas cla di parti di dunadonan di trabao. “Mi ta mira cu e ta bay bira un exigencia, particularmente entrante Januari.”

De Cuba a bisa cu e sector di horeca tambe lo tin e exigencia aki. Pasobra ya caba, pa hende por haya trabao, nan ta haya e pregunta si nan ta vacuna. “Particularmente esnan cu ta busca trabao den Food & Beverage mester ta vacuna pa haya trabao. Por ta nan no ta hinca e exigencia aki den e anuncio di solicitud, pero ora cu entrevista e potencial trahado, e ultimo aki ta haya e pregunta.”

Privacidad vs economia

De Cuba ta sinti cu a pesar un hende tin derecho riba su privacidad medico, e crisis ta rekeri pasonan adicional. “Ningun huez lo kita derecho di un dunado di trabao pa exigi cu su trahadonan ta vacuna, si mira e crisis cu e pandemia a causa rond mundo.” De Cuba a ilustra cu tabatin caso na Aruba di trahadonan cu no kier a vacuna y e compania a duna nan pakete pa nan bay. “Y Huez a bay de acuerdo pa disolve e contrato laboral y trahadonan a acepta e pakete.”

STA a bisa cu como sindicato, nan ta keda consciente di e tendencia aki. Pasobra tin un responsabilidad comun pa proteha hendenan cu ta depende di otro pa e trabao por cana. Den turismo sigur esey ta e caso. Den e industria aki, tin hopi hende ta comparti e mesun espacio y mester por proteha otro.

“Cu vacuna mes por keda infecta cu e coronavirus, corda sin e vacuna. Pero e pregunta mester ta, con husto mester ta pa e 90 porciento cu a vacuna versus e 10 porciento cu no kier vacuna. E 10 porciento cu no a vacuna, por haci e test. Si ta asina, e trahadonan no tin e manera pa paga un test tur dia. E ta bira impagabel y e dunado di trabao por exigi cu pa medio di test, por proteha resto di trahadonan.”

De Cuba ta bisa cu esey ta un conclusion logico. (red. Na e momentonan aki e test cu ta duna resultado mas lihe ta e asina yama antigen test cu no ta barata. E ta costa 50 dollar pa test, compara cu un PCR cu ta e asina yama ‘goldenstandard’ cu ta costa 150 dollar). “E pandemia a haci nos hopi daño. Nos a wak cuanto hende mester a bay biba riba FASE. Sin papia di e perdida di hende. Ami a perde asina hopi amigo y amiga. Ainda tin hende no ta realisa con serio e cos aki ta, te ora cu e bati na porta,” de Cuba a enfatisa.

Riesgo

STA a bisa cu como sindicato no por bay contra e exigencia di vacuna di dunadonan di trabao. “Nos ta consciente cu locual nos a haci ta un riesgo. Nos a tribi di tuma e decision aki y bin abiertamente dilanti cune. Hopi otro kizas ta warda, pasobra nan tin miedo pa enfrenta e realidad. Pero e realidad ta cruel.”

Bida ta un balans, y mester pone den balansa e daño cu e pandemia a ocasiona na henter economia y salud y bida di hende, y e garantia di un trabao. “Si doñonan di companianan bin cu exigencia, ken mi ta pa bay contra nan decision? Dunadonan di trabao por determina kico nan ta exigi pa tuma hende na trabao.”

De Cuba ta kere cu e discusion aki ta resultado di e hecho cu e generacion aki nunca a experiencia un pandemia di e magnitud aki y e curashi di STA ta un ‘wake up call,’ pa hopi otro. “Nos no ta trapa riba derecho humano sino cumpli cu exigencia di companianan.”

LEAVE A REPLY

Please enter your comment!
Please enter your name here