Ayera durante un conferencia di prensa cu minister di Enseñansa, Ciencia y Desaroyo Sostenibel, Armando ‘Rudy’ Lampe a ofrece pa e medionan local, el a splica cu manera a keda conoci, e siman aki a funda e Stichting Leerorkest Aruba, cu ta den cooperacion cu Stichting Leerorkest Amsterdam.

Lampe a señala cu e meta di e fundacion aki, cu apoyo di Hulanda, ta pa re-introduci les di musica den scolnan.

El a destaca cu den temponan antiguo y despues di edad media, musica tabatin e mesun importancia cu matematica y despues cu cambionan a cuminsa aparece el a keda atras, y awendia por ripara na Aruba tin cu re-introduci bek musica den scolnan.

Tambe Lampe a sigura cu nan lo impulsa esaki den prome instancia como un actividad extra curicular y fundacion tabata necesario pa motibo cu nan ta bay ricibi donacion di instrumentonan di musica di segunda mano, cu nan ta colecta na Hulanda cada aña y hopi di nan lo bay ta disponibel na scolnan.

“E obhetivo ta pa siña nos muchanan toca instrumento musical.” Prome nan lo cuminsa cu un metodo cu ta exigi les di cantamento, pa despues bay over den siña toca un instrumento musical. Lampe a informa cu nan lo cuminsa cu cuatro piloto na scol y hunto cu cooperacion di minister di Husticia, Andin Bikker kende a apoya e proyecto aki, e prome donacion ta bin for di minister di Husticia di Hulanda pa e fundacion na Aruba.

Di mesun manera, Lampe a comenta cu nan tin hopi expectativa riba e proyecto di Leerokest Aruba y cu ya a cuminsa caba na diferente scol cu lesnan di musica. E impulso di musica den desaroyo di muchanan, esey lo stimula tambe otro parti di nan desaroyo cognitivo.

Di otro banda, Aruba a ricibi dos container yen di material educativo for di Hulanda pa Montessori, cu ta hopi costoso. El a manifesta cu esaki ta bay stimula cierto parti di e maneho di scol Montessori y e siman aki ta tuma luga un certificacion di maestronan cu a certifica como Montessori Teachers. Expertonan di Hulanda ta dunando e curso y e filosofia aki ta educacion personalisa, pa motibo cu cada mucha ta diferente.

 

LEAVE A REPLY

Please enter your comment!
Please enter your name here