Den un entrevista pa Bon Dia Aruba, presidente di Stichting Rancho, Clifford Rosa, hunto cu Coordinadora di e Centro di Actividad, Ginelly Quandt, a conta un poco ariba e actividadnan cu e stichting a organisa e siman di cultura aki y tambe ariba e ultimo desaroyonan pa loke ta trata e trabounan di e stichting.

Quandt a conta cu e siman di cultura ta encera cu lo bay tin varios actividad den e siman cortico aki. E siman a cuminsa cu lectura di filosofia di patrimonio y herencia. Dia 15 y 17 di maart tin e New Media Festival na unda lo tin pelicula den aire liber, pero tambe paden unda comunidad por bin pa wak pelicula cu a wordo selecciona door di e New Media Film Festival di Miami. Pa termina e siman lo bay tin un careda di boto miniatura pa 18 di maart cu ta tuma luga na Governor’s Beach Bay.

“E siman aki como fundacion nos ta bay ta hopi druk y mi ta kere p’esey nos ta consider’e tambe como un siman cultural unda comunidad por bin y participa den diferente actividad”, Quandt a bisa.

Den conexion cu e celebracion di 200 aña di Oranjestad Stichting Rancho ta presenta, hunto cu Arts Connection, Miami New Media Festival 2021-2022 edicion XVI. Miami New Media Festival ta un plataforma multimedia estableci na Miami, Florida pa Art Connection Foundation. E ta promove e arte a traves di e exploracion di tecnologianan nobo y narativanan interactivo. E festival ta presenta peliculanan den aire liber y paden na diferente paisnan di America Latino y Caribe.

“Tur actividad cu nos ta haciendo aworaki ta bao di e paraplu di celebracion di 200 aña di Oranjestad pasobra e ta e proceso. P’esey nos ta celebrando e 200 aña di Oranjestad caba door di e preparacionnan cu ta andando”, Sr. Rosa a indica.

Pa loke ta trata e plan strategico di capacitacion cu Stichting Rancho a presenta recientemente, Quandt ta splica cu e ta bayendo den un manera interno y nan ta bezig ta brainstorm. E siman aki, el a indica, nan lo tin un reunion cu directiva pa cuminsa plania ki tipo di actividad nan lo bay organisa pa proximo aña, 2023. “E siman aki tambe ta hopi crucial pasobra nos ta bay defini ki tipo di actividad nos ta bay haci y tumando e plan strategico na cuenta, ki tipo di capacidad den e plan a wordo considera urgente y esey nos por tuma pa otro aña”,el a agrega.

Ariba e tema di fondonan, Sr. Rosa ta splica cu Stichting Rancho nunca tabata depende di subsidionan. Nan ta haciendo diferente proyectonan y aworaki e proyectonan ta wordo financia door di Samenwerkendefondsen di Hulanda pa medio di CEDE Aruba y den e direccion ey, el a indica, nan ta mirando mas posibilidad di fondonan cu tin tambe afo, pero den un manera structura pa asina nan por sigui haci nan actividadnan cu tin haber cu e centro di actividad, pero tambe e proyectonan cu mester bin den funcion.

Pa loke ta trata boluntarionan, Rosa ta bisa cu esaki ta un punto cardinal y na mesun Quandt ta splica cu e parti aki ta fastioso pasobra nan mester di personanan cu por compromete, cu ta prepara y ta dispuesto pa siña y ta activo. El a remarca cu nan tin e boluntarionan cu ta de bes en cuando ora cu nan por, pero nan no tin boluntario cu ta vast y comprometi. “Cu e plan di capacidad nos tin cu bay enfoca ariba esey, wak con nos ta yega na e boluntarionan cu ta compromete nan mes, cu por skirbi proyecto, cu por yuda den termino mas largo y por sigui envolve nan mes den e fundacion”, el a indica.

Durante fin di siman Stichting Rancho tambe a participa den e evento di Aruba Doet. Nan ta conta cu nan a haya un grupo basta grandi di Renaissance cu a yuda cu e limpiesa di e bario. “Nos a keda contento, el a bay super bon y nos a caba sumamente lihe”, Quandt a expresa.

El a enfatisa cu aworaki e deber ta keda na e comunidad tambe pa tuma consciencia ariba e situacion y mantene a bario limpi. El a menciona tambe cu nan a ricibi na mesun momento peticion di comunidad pa sigui pone baki, locual Quandt a indica nan por considera tambe como parti di capacidad.

“E sushi den bario ta keda un problema y pa nos e ta hopi importante pa e tin bon desaroyo pa e keda constantemente limpi pa asina nos tambe por keda haci mas actividad den bario. Pasobra pa haci un actividad bo mester tin garantia cu e hendenan ta safe, cu no tin cos tira abou, cu nan no ta bay corta nan pia of otro cosnan y p’esey nos ta contento cu e sosten di Aruba Doet y den mi bista e por tuma luga mas cu un biaha pa aña”, Quandt a expresa.

Rosa a idica tambe cu como fundacion esaki ta di dies biaha cu nan ta participa cu Aruba Doet, y el a remarca cu e grupo cu nan a haya aworaki ta un grupo cu no ta leu di nan y nan ta aprecia di ta involucraden e sistema di Aruba Doet. Pero, Rosa a indica, nan a bisa e grupo aki tambe cu lo ta hopi bon si nan yuda tur siman haciendo e limpiesa cu nan a haci pasobra ya algun dia despues di un weekend tin trabou pa haci di limpiesa atrobe den e cayanan pasobra na final di dia e sushedad ta keda un problema.

Quandt a agrega cu den su opinion esey ta un responsabilidad tambe di un organisacion grandi, di un hotel grandi, den e bario. “Nan tambe mester tuma e responsabilidad y haci donacion di algun baki y mi ta spera cu di nan parti nan wak un poco mas leu pa duna mas na e comunidad y asina yuda nos mehora e area aki pa nan y pa nos”, el a expresa.

LEAVE A REPLY

Please enter your comment!
Please enter your name here