Dialuna pasa, Stichting Reclassering en Jeugdbescherming Aruba a ofrece un conferencia di prensa pa duna mas detaye tocante e proyecto di reintegracion ‘Conectando’, cual ta trata di un siman cu reclassering ta tuma tempo pa duna mas atencion pa e diferente trabounan cu e fundacion ta haci durante aña.

Seraida Pemberton, Director di e fundacion, a splica cu siman reclassering a cuminsa na 2011 den cual eigenlijk e meta ta pa nan por recauda fondonan y duna mas informacion pa publico tocante e trabounan cu nan ta eherce.

Pemberton a splica cu a pesar cu reclassering tin 58 aña, hopi personanan den comunidad no sa kico exactamente nan ta haci, y p’esey nan ta tuma full un siman pa para keto y informa pueblo durante e dianan aki, pa duna di conoce kico e diferente departamento cu nan tin ta haci. Y mas importante ta e motibo di pakico nan ta haci locual nan ta haci y e balor cu esey tin como guia di reclassering.

Tambe, el a señala cu nan ta bay enfoca riba un proyecto, pero un di e metanan principal cu nan tin ta guia di e hobennan cu tin problema y pa e motibo ey nan a trece dilanti un di e proyecto principal, cu e guia, ayudo y sosten cu reclassering lo mester haya pa e proyecto aki.

Ivan Poulina, coordinador di proyecto Conectando, el a bisa cu e proyecto ta consisti di hobennan cu un edad entre 16 pa 25 aña, cu no ta bayendo scol y tampoco no tin un cos positivo pa haci den nan tempo liber.

Di mesun manera, Poulina a comenta cu esaki ta consisti di hopi proyecto di luga cu nan tin y locual nan ta haci conhuntamente cu sector priva, Gobierno, NGO’s y tambe institutonan social.

Hopi hobennan ta cay afo y no ta haya e oportunidad di ricibi guia pa sigui cu nan bida despues. Tocante esaki Poulina a bisa cu parti di e proyecto tambe ta consisti di habilidad social, cu nan ta duna pa e hobennan un biaha pa siman, tres bes pa siman trabou y un bes pa siman nan ta haci un deporte of un actividad.

Hunto cu e hobennan di e proyecto Conectando, Poulina a comenta cu nan tambe tin un maestro cu ta guia e hobennan durante e proyecto, un persona cu ta capacita den su funcion pa siña nan un ofishi practico, e ta haci esaki bou experiencia profesional.

Ademas, Poulina a sigura cu nan a pidi mas maestronan pa proyecto, mirando cu ta birando mas grandi. Comunidad tambe por coopera pa den futuro un persona por ta un maestro. Di otro banda, el a expresa cu nan tambe tin un mentor cu nan a pidi pa yuda e hobennan durante tres luna pa ta riba e bon caminda.

E proyecto aki tin un duracion entre tres cu seis luna. E tres prome luna ta pa siña e ofishi practico – basico y di seis luna despues nan por sigui pa bay riba mercado laboral na Aruba, cu conhuntamente cu DPL, nan ta haya un certificado di nan habilidad social y kico nan por haci den ofishi practico – basico cu nan ta siña durante nan trayectorio.

20 hoben ta participa den e proyecto aki y ta birando mas grandi, Poulina a señala. P’esey nan ta pidi pa instancianan gubernamental, Ngo’s, institutonan social of sector priva pa yuda fundacion Reclassering door di brinda e hobennan luganan pa e proyectonan.

Pa finalisa, Poulina a remarca cu aworaki nan tin un cantidad di 70 pa 100 hobennan de tur e departamentonan y den ultimo cinco añanan e cantidad di hobennan cu a drenta den reclassering a crece.

 

 

1 COMMENT

  1. Reclasering no ta responsabel pa hobennan, nos, mayornan ta responsabel pa cada un di nos yiunan. Nos no tin smoesjes: podise na Aruba mester cuminsa un programma con pa educa e mayornan, pasobra, e grupo di hobennan ta cresiendo, y nan no a cai for di palo di mata. Educa nos como mayor, cordanos cu NOS ta 100% responsabel pa nos yiunan: tin casonan cu e tata a baha na awa prome cu e yiu a nase, pero, no ta kita cu e ta e tata. Publica articulonan of postersnan positief: familie positief, kita poco propaganda di alcohol, cual ta mayoria bez e motibo cu e mayornan no ta na tino pa EDUCA nan mes yiunan, pero, esey ta muchu largo pa papia di awor. Yiudanos yiuda nos yiunan PROME cu nan cai den man di reclasering: Preventieve Taak.

LEAVE A REPLY

Please enter your comment!
Please enter your name here