Sticker of crema di hormoon pa sintoma di menopausa por tin menor riesgo di presion compara cu pildo

(AP) – Hopi biaha muhenan mester haci uso frecuente di terapia hormonal pa alivia sintomanan di menopausa y investigacion nobo ta sugeri cu cremanan of stickernan por ta hopi mas safe pa nan presion di sanger compara cu pildo.

Mientras muhenan su curpa ta produci cada biaha nivelnan mas abao di hormonanan di reproduccion durante menopausa, nan riesgo pa malesa di curason ta aumenta. Presion di sanger halto ta aumenta e riesgo aki pero te ainda no ta cla si tin un conexion entre e terapia hormonal pa e sintomanan di menopausa.

Investigadornan Canades a puntra nan mes si e manera den cual ta absorbe e hormonanan pues oral, vaginal of via cuero por hunga un rol. University of Calgary su ekipo a examina recordnan di salud di mas di 112,000 hende muhe di 45 aña di edad y mas cu a ricibi receta pa por lo menos 6 luna di tratamento di hormona entre 2008 y 2009. Nan a revisa cua hende muhenan a desaroya presion di sanger halto despues por lo menos un aña despues di a cuminsa e tratamento.

Aunke e diferencianan no tabata hopi grandi, e muhenan cu a bebe pildo tabatin un riesgo 14% mas halto di desaroya hipertension compara cu e personanan cu a haci uso di crema of e stickernan segun loke e investigadornan a reporta dialuna. Estrogen oral a carga un riesgo di 19% mas halto compara cu versionnan vaginal.

Terapia hormonal tin un mescla di riesgo y beneficionan cu ta causa cu e no ta pa tur hende. Awe ta receta esaki no pa preveni malesa sino pa trata e sintomanan relaciona cu menopausa, generalmente usando e dosis mas abao posibel. Loke ta usa cu mas frecuencia ta un combinacion di pildo di estorgen y otro hormona, progestin.

Diferente version di e terapia aki por traha pa diferente sintoma di menopausa, algo cu e estudio no a trata. Sinembargo, e ta agrega pistanan pa compronde e relacion compleho entre e terapia di hormona y presion di sanger segun Dr. Garima Sharma, un specialista di curason di hende muhe. Sharma kier mira un test mas profundo cu ta compara diferente version di hormona. Sinembargo tambe el a señala na un posibel splicacion biologico; Porta estrogen oral ta afecta enzym cu ta conecta na presion di sanger mientras e ta ser procesa, mientras cu versionnan di cuero y vagina tin un actividad hopi mas limita dentro di e curpa.

Di tur manera, “e resultadonan aki ta clinicamente hopi relevante,” Sharma a expresa den un email y e ta expresa cu ta specialmente importante pa monitor presion di sanger den hende muhe cu ta usa terapia di hormona oral.