Casi un cuarto, 24 porciento, di tur e gasto di personal di Cuerpo Policial di Aruba, KPA ta bay pa paga overtime. KPA a conoce un aumento di costo di personal den e cinco añanan te cu 2018 cu ta den parti debi na e pago di overtime. Esaki ta locual a bira cla den e investigacion di Auditoria General di Aruba, ARA titula ‘Motibo Aumento Overtime.”

ARA a compila e estudio pa aña 2018 y a enfoca riba tres servicio cu ta Cuerpo Policial di Aruba, KPA, Instituto Coreccional di Aruba, KIA y Cuerpo Especial Arubano, CEA.

E capitulo riba KPA ta pone na bista e desaroyo di ‘overtime,’ cua ta e motibonan. Segun KPA tin diferente motibo y ARA a reparti esakinan den organisacion y tarea, factornan di ambiente, maneho di Minister y obhetivo di e organisacion, y personal. Pero ARA tambe a haci un analisis completo di e trabao di Cuerpo Policial di Aruba, cu banda di su trabao di prevencion y mantene ordo, hopi biaha mester haci trabao adicional cu en realidad no mester cay bao di su responsabilidad

Organisacion di KPA

KPA ta dirigi pa un Korpschef cu ta asisti pa tres division di staf y tres division di e cuerpo. E ultimo ta consisti di e Servicio General di Polis, Servicio di Recherche y Servicio Special di Polis. Nan ta encarga cu ehecucion di trabao di polis, cu ta inclui e teamnan specialisa manera ‘Arrestatieteam’ y unidad mobil. Miembronan di e divisionnan aki tin diferente tarea y por pasa di un team pa otro. Si ta saca un polis di un division pa otro, otro colega lo reemplas’e.

KPA ta admiti cu e forma con e teamnan aki ta hinca den otro tin influencia riba e pago halto di overtime. Ta traha e gruponan den combinacion cu otro pa hisa funcionalidad di e Cuerpo. Tur e funcionnan den e diferente gruponan ta consisti di ambtenaar policial cu ta cay den diferente categoria di salario. Hefe di e servicio ta esun mas paga, cu un pago di overtime mas halto.

Tarea di KPA

KPA tin e tarea legal, bao autoridad di e Minister di Husticia y de acuerdo cu e leynan existente pa percura cu berdad ta mantene e orden legal y duna ayudo na esnan cu mester di dje. Ademas, KPA ta responsabel entre otro pa e mantencion penal di e orden legal, y orden publico, y evita hechonan cu por stroba orden publico, trankilidad y siguridad.

Tambe KPA mester proteha hende y animal, y otro tareanan cu ta duna e cuerpo den cuadro di su responsabilidad principal.

Y ta depende di e area cu un grupo of seccion tin ta determina e nivel di overtime. Esakinan ta e variablenan den KPA. Ta mira overtime por ehempel den investigacion pa informacion, na interes di e investigacion y prevencion. Particularmente despues di un caso pisa manera asesinato, e ta trece hopi overtime pa e seccion di recherche.

Un otro factor cu tin influencia riba e overtime ta e coremento di piket. Miembronan di e cuerpo mester ta disponible y tin un compensacion di cuater porciento di e totalidad di pago di overtime.

Pero tambe tin overtime pa ehecuta trabao cu segun KPA no ta cay bao su tarea basico. Esakinan ta actividadnan cu ta rekeri extra personal, manera guia actividadnan deportivo, religioso y otro actividad publico. Tur ta mara na overtime.

Na momento di a investiga ARA a tuma nota cu no tin traduccion profundo di e tareanan di KPA, cu no tin un asina yama analisis di su tareanan nucleo.

 

Carnaval y mas

Banda di e trabao regular di KPA, tin otro factor di ambiente cu ta determina overtime. Por pensa riba Carnaval, cu ta exigi participacion di henter e cuerpo y otro actividad mara na temporada cu ta rekeri mas di KPA, manera campamento, concierto y fiestanan di fin di aña. Hasta ta asina cu polis mester ta mas vigilante y cu mas hende riba caya ora premio di Lotto ta hopi halto.

Ladronicia tambe conoce momentonan di piek durante aña cu ta rekeri mas hende, manera di servicio di recherche. Casonan cu ta cay bao di e esfera di influencia di Aruba, manera e crisis na Venezuela tambe ta rekeri personal adicional pa yuda cuida frontera.

E pago di overtime ta sosode despues di e momento piek di trabao, un a dos luna despues. Por ehempel na April 2017, a constata e piek mas halto den e tres añanan prome. A paga 1.6 miyon florin na overtime, cu tabata relata na Carnaval 63.

Maneho Minister y obhetivo di e organisacion

ARA a analisa e maneho di Gobierno durante e periodo 2013 pa 2018. No tin un maneho na Ministerio di Husticia pa baha e gasto di overtime. Ta usa presupuesto di Pais Aruba como liña di guia y ta inclui e margen pa overtime. Y e margen aki, segun e despacho di Minister di Husticia ta conoci na e servicionan.

ARA ta bisa cu maneho di Minister di Husticia ta duna indicacion kico mester ta trabaonan di KPA. E maneho di e Minister por tin un efecto riba overtime, sin cu tin intencion su tras. Decision di maneho di Minister di Husticia, pa mira mas blauw riba caya, pa hisa siguridad of sentido di seguridad, tin hopi impacto riba con KPA ta pone su personal den e cuater seccionnan di surveillance di e Servicio General di Polis.

Kico ta obhetivo di KPA

Ta e Team di Maneho di Cuerpo, KMT cu ta determina e maneho interno pa overtime. No tin un areglo specifico pa overtime. Ta acorda e notificacionnan, y e maneho di overtime ta diferencia denter e gruponan bao KPA.

E obhetivonan di maneho di Minister mester keda traduci den obhetivonan operacional interno di KPA. Esaki e cuerpo a haci tambe den su plan di 2018-2019, y a inicia e creacion di e Division Informacion y Experticio cu ainda no ta formalisa. E division tin su agenda di inteligencia y ta inclui den e plan anual, unda ta describi e obhetivonan di KPA. Aki por inclui e combatimento di traficacion di hende, droga, crimen cibernetico, delito financiero economico y negoshi di arma, banda di prevencion, barionan sigur y seguridad den trafico. KPA ta kere cu por logra e trabaonan aki, pa asina cumpli cu e asina yama pakete basico di cuido policial. Pero asina mes tin mas tarea manera duna ayudo di emergencia, busca recidivistanan y participacion den casonan di desaster grandi. ARA a constata si cu no tur obhetivo den e plan 2018-2019 a keda formula, y falta pa yega cuanto capacidad mester. Pa motibo di esaki no ta posibel pa forma opinion riba un posibel falta di personal.

Falta personal ta conduci na overtime

Segun KPA, ta e falta di personal ta conduci na overtime. Y Auditoria General di Aruba a haci henter un analisis di locual e ta considera ta e motibonan principal di peso grandi di overtime. E rapport ta amplia riba absentismo, personal cu ta bay otro departamento di Gobierno sin cu KPA tin algo di bisa y tambe personanan cu ta bay cu pensioen, pa no papia e falta di suficiente klas di aspirantenan.

Bon Dia Aruba lo amplia riba e aspectonan aki cu ta trece e claridad pakico KPA tin aña ta lucha cu overtime y cu analisis ta ilustra cu e ta algo structural.