Pa dia 24 di juni studiantenan di Salubridad y Servicio di Colegio EPI ta bay haci un Fun Walk and Run pa asina ey celebra e 25 ana di EPI y pa recauda fondonan pa nan por cumpra instrumentonan y uniformnan pa EP su Brassband y tambe nan lo yuda un organisacion social segun loke a informa.

Mediante un conferencia di prensa, Julissa Arends ken ta fungi como PR di Studentenraad a bisa cu e actividad ta trata di cana of core 5KM y ta bay cuminsa na EPI gate number 3 y tambe ta finalisa na e mesun luga, nan ta bay recore Venusstraat – De La Sallestraat-Sero Blanco- Watty Vos Boulevard-Meiveld- Rotonde Tarabana-Caya Betico Croes-Rotonde Marathon-De La Sallestraat y bay back Venustraat EPI gate 3.

Riba e ruta participantenan tin un stop pa bebe awa, cu ta bay ta na rotonde di Sero Patrishi y na final ta bay tin frutanan y awa.

Registracion ta cuminsa for di 7:00am y e actividad ta bay cuminsa 8:00am cu e prome grupo.

Premionan ta bay ta placa efectivo di hasta 1.250 florin pa e 3 grupo cu ta: individual pa caminata, pa e careda y caminata di cinco hende.

Esnan cu ta interesa di registra por hacie na EPI mes of por tuma contacto na e numbernan di telefon: 567.85.31 y 525.87.70 y 563.10.40.

Cu e fondonan cu nan lo haya, EPI kier forma nan propio brassband na unda tambe kier yuda un instancia caritativo cu e 50% di e fondonan cu nan lo recauda.

Arends a sigura cu nan tin aproximadamente 1.000 carchi pa bende, pero locual cu comunidad por yuda cu nan esey nan ta acepta pa nan por yega na e meta di crea nan brassband pa por participa dia 18 di maart di proximo aña na e marcha.