Ayera tardi durante conferencia di prensa, Museo Arqueologico Nacional Aruba (MANA) a informa publico di algun actividad publico cu nan ta bay tin den luna di juni den cuadro di un practica den veld cu ta tumando luga actualmente cu cuater studiante di arqueologia di Universidad di Leiden cu ta haciendo nan practica den veld bao guia di arqueologo Harold Kelly.

Esaki ta e prome biaha cu e grupo di studiante ta haciendo un practica den veld den Caribe. Durante cu e studiantenan ta coriendo nan stage aki na Aruba MANA ta brinda oportunidad tambe na publico pa intercambia informacion cu e studiantenan, como tambe participa activamente of observa un parti di e trabao cu nan ta bay haci.

E trabao di limpiesa y labamento di material arqueologico ta rekeri hopi cautela. Pa haci esaki un grupo limita di interesadonan ta bay haya oportunidad pa haci e trabaonan aki bao guia di e arqueologo Harold Kelly y e studiantenan di arqueologia.

Esaki ta bay tuma luga diasabra 24 di juni di 8:30 di mainta pa 11:30 di mainta. Pa esaki lo regula e admision. Prome cu esaki, diabierna 23 di juni, MANA ta organisa un encuentro cu e studiantenan na MANA mes na unda publico cu ta interesa por intercambia informacion y pensamento cu e studiantenan.

Naomi Wever, un di e studiantenan cu a bin Aruba pa completa su stage a splica durante e conferencia di prensa cu durante prome aña di nan estudio nan a orienta nan mes den arqueologia mundial y di den e di dos aña nan tin e oportunidad pa scoge tema orienta riba e region di Caribe.

“E ramo aki ta unda nan lo kier specialisa na mes den dje,” el a indica.

E oportunidad a presenta pa e studiantenan acumula experiencia den veld na Aruba hunto cu Museo Arqueologico Nacional Aruba y nan lo keda na Aruba durante tres siman pa asina termina cu nan proyecto.

Banda di acumula experiencia, Wever a enfatisa, tambe nan ta bezig ta conoce y familiarisa nan mes cu e tipo di material cu ta aparece na Aruba y den area di Caribe.

“Apenas nos tin tres dia ta trahando y nos mester custuma un poco cu e solo y e santo, pero e oportunidad ta un experiencia unico y nos ta looking forward pa continua cu e proyecto aki,” el a finalisa.