Na inicio di januari 2019 gobierno a bin cu un cambio di ley cu e suma di BBO/BAZV y BAVP no mag di aparece riba e factura, sino ya caba inclui den e prijs final cu e consumidor lo paga, esaki kiermen e prijs cu ta riba e producto riba e shelf den tur supermercado.
E compromiso di Gabinete Wever-Croes ta pa trece alivio pero sigur tambe transparencia pa nos pueblo. Esaki ta precisamente loke Reforma Fiscal ta trece cu e cambionan haci. BBO tambe ta conta cu un reforma cu ta wordo implementa den fase 2. Cu e cambio aki, awo e cumprado sa kico e ta paga mientras ta haci su compra y no ta haya sorpresa na caha mas di loke e prijs lo bira.
Di e manera aki tambe, tur consumidor por compara prijs miho y dicidi unda e ta compra productonan. E prijs riba e producto y e prijs cu ta paga na caha antes tawata diferente. Sinembargo, pa motibo di e hopi trabounan cu mester wordo haci door di tur comerciante pa cambia esaki, desde prome di januari a cuminsa e fase transitorio y esunnan cu no a logra cambia e prijs den nan sistema, a haya un tempo, en principio 6 luna, pa haci esaki. E tempo transitorio tawata valido te cu dia 30 di juni 2019. Sinembargo, minister di Financia Xiomara Ruiz-Maduro a anuncia cu lo duna espacio di 3 luna mas pa cumpli cu e ley pa kita cobransa di BBO/BAZV y BAVP riba factura.
Ya caba ciudadanonan como tambe negociantenan a expresa cu nan ta contento cu e ley nobo aki cu sigur ta trece transparencia y pa di banda di e cumpradonan, awo nan lo no haya sorpresa mas na caha sino mientras nan ta haci nan compra, nan sa caba kico nan lo tin pa paga caha. Gabinete Wever-Croes ta pone e ser humano central.
