Na Charlottesville, un homber a ser sentencia pa bida den prizon pa cargo federal di crimen di odio, pa core su auto y dal manifestante cu tabata protesta contra racismo. Hues por agrega otro sentencia di bida den prizon, mas 419 aña.

James Alex Fields Jr. di 22 aña di edad ta sentencia pa mata un persona y a herida decenas durante un manifestacion di ‘Unite the Right’ na e ciudad, dia 12 di augustus di 2017. Luna pasa, Fields a ricibi un castigo pa 29 cargo federal.

Nan ta spera cu e persona cu a keda herida na e atake, y famia di e hende muhe cu a fayece, haci nan declaracion di impacto durante audiencia na tribunal di Charlottesville. Fields, un supremacista blanco kende tabatin un potret di Adolf Hitler na su mesa, a declara cu el a sali for di su cas na Maumee, Ohio, pa asisti na e manifestacion.

Confrontacion entre e protesta y contraprotesta a haci cu polis a declara e asamblea ilegal y ordena grupo pa disolve prome cu nan por cuminsa cu e manifestacion. E mesun dia, Fields a cuminsa core su auto, trapando riba Heather Heyer, di 32 aña, y a herida mas di 2 dozijn di persona. E evento lanta tension pa cu racismo na henter e pais.

Presidente Donald Trump a provoca controversia ora el a culpa e violencia di e manifestacion riba ‘ambos partido’, un declaracion cu critico a considera como un fayo pa condena racismo. Durante e huicio di Fields, abogado a centra den historial di malesa mental y un infancia traumatico.

 

LEAVE A REPLY

Please enter your comment!
Please enter your name here