(G-1/OGlobo) – E balansa comercial Brasileño a registra un surplus di US$ 3,54 biyon na november, segun informacion di Ministerio di Industria, Comercio Exterior y Servicio (MDIC).
Esey ta representa un reduccion compara cu e mesun luna di aña pasa, tempo cu e suma positivo tabata US$ 4,75 biyon, di acuerdo cu datonan oficial.
Sin embargo, secretario di Comercio Exterior di Ministerio di Industria, Abrão Neto, a observa cu na november di aña pasa tabatin exportacion di dos plataforma di petroleo na un balor di US$ 1,9 biyon, loke a influencia e resultado.
El a declara tambe cu tradicionalmente luna di december ta representa un surplus considerabel. Pa e luna di december aki, e ministerio ta anticipa un saldo positivo di entre US$ 3 y US$ 8 biyon.
Saldo record pa aña
E saldo positivo acumula pa 11 luna di e aña aki (US$ 62 biyon), ta representa un record pa e pais den 29 aña, desde 1989. Aña pasa tambe tabatin un surplus den prome 11 luna, pero di US$ 43,2 biyon, cu tabata e record te e momento ey.
Tabatin un crecemento di exportacion di producto basico (+26,5%) y di producto semimanufatura (+3,1%), mientras exportacion di producto manufactura a baha (-14,2%).
Di banda di importacion a crece e compra di combustibel y lubricante (+69,2%), di mashin y ekipo pa produccion (+10,8%), di bienes intermediario (+6,7%) y tambe di bienes di consumo (+20%).
Pronostico pa 2017
Expectativa di mercado financiero pa e aña aki ta, segun Banco Central di Brasil, cu e saldo positivo di e balansa comercial lo alcansa US$ 65,5 biyon. Banco Central ta premira un surplus di balansa comercial di US$ 61 biyon, mientras cu ministerio di Desaroyo ta calcula un saldo comercial positivo di entre US$ 65 y US$ 70 biyon pa e aña aki, den tur caso un record nobo.
