E vote-getter mas grandi di ultimo eleccion na St. Maarten, parlamentario Theo Heyliger, deteni actualmente pa husticia, ta automaticamente suspendi a base di articulo 50 di Constitucion di e isla.

Actualmente Heyliger ta deteni na Bonaire, entre otro pa e situacion deplorable den e prison di St. Maarten mes. Su caso ta trata di corupcion y e investigacion a haya e nomber Larimar di banda di ministerio publico.

Presidente di parlamento Sarah Wescott-Williams a confirma suspension di Heyliger ayera mainta. El a añadi cu e tin intencion di yama un sesion urgente di e organo pa discuti e asunto. Lo enfoca particularmente riba e preparacion di e carta cu mester bay pa Oficina Central Electoral pa reemplaza Heyliger. Esey ta urgente pa por tin un parlamento completo atrobe, cu ta consisiti di 15 miembro. Desde aresto di Heyliger dia 19 di februari, parlamento tabatin solamente 14 miembro, loke por haci cu tuma decision den cierto asunto por duna problema.

Wescott-Williams a conta The Daily Herald tambe cu ministerio publico ta notifica parlamento a traves di ministro di husticia y e suspension “ta bira vigente inmediatamente, asina ta cu no mester ningun otro accion, pasobra ta segun ley esaki ta bay, na momento cu aplica articulo 50 di Constitucion.

Ta ministerio publico mester confirma e condicionnan di e aresto di Heyliger, y e acusacionnan contra su persona, y si e acusacionnan ey ta den linea cu articulo 50, segun Wescott-Williams. “Y ta esey a haci.”

E reunion di parlamento ta pa oficialmente pone e organo na altura di e carta cu a ricibi a traves di e ministro di husticia, y seguidamente e reunion di parlamento lo crea e base pa e carta cu lo sali di parlamento pa Oficina Central Electoral encuanto nombramento di e substituto di Heyliger. Ta menciona nomber di Jules James, anteriormente miembro di parlamento y despues di Heyliger e persona cu mas voto den ultimo eleccion, como su reemplazante.