Estado Uni a anuncia cu lo revoca visa di otro 77 Venezolano liga na Nicolas Maduro, hibando e total na mas di 250 persona cu tabatin visa pa drenta Merca den e ultimo dos aña. Tambe lo tuma medida contra organisacionnan den exterior cu ta yuda financia regimen di Nicolas Maduro, segun agencia AFP.
E decision, anuncia pa John Bolton, asesor di seguridad nacional di presidente Donald Trump, ta parti di e intentonan aumenta di Washington pa forsa salida di poder di Maduro.
“Estadonan Uni ta apoya firmemente e transicion democratico na Venezuela, lidera pa presidente interino Juan Guaido y Asamblea Nacional, y ta hibando varios inicitiava diplomatico y economico nobo pa apoya e transicion ey,” Bolton a bisa den un comunicado.
Washington “ta avisa e institucionnan financiero den exterior cu nan lo enfrenta sancion pa participa den e facilitacion di transaccion ilegitimo cu ta beneficia Nicolas Maduro y su red corupto. Nos lo no permiti cu Maduro ta horta rikesa di pueblo Venezolano,” el a conclui.
Desde 2015, Washington a sanciona decenas di funcionario y ex-funcionario Venezolano, entre nan e propio Maduro, acusando nan di violacion di derecho humano, corupcion y narcotrafico. Ademas, a aplica un embargo riba petroleo di Venezuela, crucial pa su economia, cu lo bira vigente dia 28 di april proximo.
