Ayera atardi, Sociale Verzekeringsbank Aruba (SVb) na San Nicolas a celebra e lansamento di e web portal di SVb, ‘MiSVb 2.0’ den cuadro di mision 2020, cu ta dirigi riba e transformacion di e seguro social den un organisacion moderno, digital y transparente.

Edwin Jacobs, Director di SVb, a expresa cu hunto cu e lansamento di MiSVb 2.0, ta pone otro paso solido riba e caminda pa digitalisa tur servicio pa su clientenan. Esaki ta e plataforma digital cu den prome fase ta brinda e doño di trabou un pakete completo di servicio digital.

Esaki a cuminsa cana den aña 2015, pero a haya mas bida den 2017 y asina a keda wordo ehecuta, te awor cu nan a haya e prome fase aki cu ta esun mas importante, ya cu e ta un fundeshi.

Tambe el a informa cu esaki ta bay permiti pa nan como organisacion, transforma nan mes, transforma nan cultura y structura, semper buscando e mayor placer den trabou pa nan empleadonan.

Jacobs a splica cu e dunado di trabou tin disponibel den tur momento informacion di su empresa. E mes por haci cambio y no ta necesario mas pa manda documentonan pa SVb pa procesa. Cu e web portal, por haci esaki di biaha, por ehempel cu pagonan mensual, por sa cuanto ta paga, pa cua trahadonan ta paga. “E ta un proceso full habri y transparente pa cu su clientenan”. Jacobs a comenta.

Di mesun manera, el a bisa cu e era digital nobo, e naturalesa di trabou ta cambia, cu mas administracion ta haya mas control, pa motibo cu nan meta ta keda siguridad y proteccion social pa tur. Di e manera aki nan por ta mas riba caya pa por controla cu trahadonan ta sigura.

Jacobs a señala cu 2020 ta un aña caracterisa pa transformacion, caminda clientenan ta bay experiencia nan servicionan nobo, un departamento nobo, pero nan tambe como empleadonan ta bay experiencia un dunado di trabou diferente.

Asina mes, el a trece dilanti cu lo cumpli cu e meta principal di SVb, cu ta esun cu ta duna pa e departamento e derecho di existencia: esta di percura pa proteccion social pa comunidad. Digitalisacion mediante e web portal lo permiti alcansa mas ainda e meta cu tin como organisacion, siguridad social pa tur.

Jacobs a manifesta cu aworaki e doño di trabou por yama of manda un e-mail y SVb lo yuda pa cuminsa anda cu e web portal, y con e por haya informacion. Loke nan kier ta empodera e dunado di trabou pa ta doño di tur su informacion cu SVb tin dje.

El a gradici tur colega pa cu e proceso di digitalisacion aki, cu ta bay conclui pa 2021. Na e momento ey, tur servicio ta bay ta wordo digitalisa, cu e dunado di trabou lo tin acceso pa informacion 24 ora pa dia.

Jacobs a splica cu e logo di ‘Mi SVb 2.0’ tin cuatro color cu ta forma un circulo rond di e persona cu SVb tin den su logo tradicional. Cada color ta representa uno, cora cu ta representa e trahado, color blauw cu ta doño di trabou, shinishi cu ta representa e proceso di digitalisacion y e color burgundy cu ta representa SVb como instituto. Ora hende mira e logo, por wak cuatro persona, cu ta un trahado, un doño di trabou, SVb y un robot cu ta bin hunto y forma un union rond di hende, cu ta nifica cu e cuatro ta bay ta trahando pa brinda e proteccion pa tur.

Minister di Salud, Turismo y Deporte Dangui Oduber, kende tabata presente den celebracion aki, a ofrece un palabranan pa prensa y el a indica cu esaki ta un momento historico. Ora cu SVb a anuncia nan website ‘Mi SVb 2.0’, caminda un organisacion hopi dinamico ta transformando su mes den un organisacion cu ta haciendo uzo di digitalisacion pa facilita tur aseguradonan y clientenan di un manera hopi eficiente pa yega den informacion cu ta necesario. E ta considera SVb un di e organisacion mas innovativo na Aruba den momentonan aki.

Ademas, Oduber a sigura cu e parti di control lo bay bira hopi esencial. Tur trahado tambe tin cu prepara nan mes cu e era nobo cu ta sigui y esaki ta e muestra con SVb ta haci uzo di innovacion pa digitalisa tur e proceso, elimina e burocracia y traha di un manera mas eficiente cu na final di dia ta pa brinda un miho servicio.

 

 

LEAVE A REPLY

Please enter your comment!
Please enter your name here