A3 20feb swipe actie (NP) (1).jpg

Organisacionnan a uni pa un accion pa elimina criadero di e sangura Aedes Aegypti cu ta responsabel pa transmision di virusnan dengue chikungunya y zika. E accion aki yama “swipe actie” ta forma e swipe actie team sangura cu ta encera GKMB Serlimar y DOW.

Pa e siguiente dos lunanan e team lo ta bishitando diferente bario te cu bishita ful Aruba unda cu nan lo educando/conscientisa y na mes momento yudando comunidad pa deshaci di criadero of posibel criadero di sangura, di tur tamaño. Serlimar ta e instancia cu ta yuda den e caso aki pa deshaci di e obhetonan di mas grandi of pisa cu e team tuma nota di dje. 

Ora cu ta bishita casnan pa fumiga, ta papia di mas o menos 45 mil adres cu mester bishita. Esaki ta haci cu e profesionalnan nunca por bay cas pa cas, e ta algo cu lo dura henter un aña. Tambe teniendo na cuenta cu e mesun grupo ta asisti casnan ora cu nan yama pa molester di sangura y cu mester fumiga, pues e trabou di pasa cas pa cas ta para un rato. Aworaki cu un grupo mas grandi pareu ta cuminsa haci e trabounan, tin chens cu tin hopi hende pareu den corto tempo cu por elimina criadero y no GKMB so. 

Minister Schwengle reenforsa GKMB

Minister encarga cu Salud Alex Schwengle tambe tabata presente na e ocasion unda cu e ta pidi comunidad pa haci esfuerso pa yuda tene Aruba limpi y ta contento cu GKMB ta haciendo un bon trabou. El a bisa cu tin algun tarea cu e mester haci si ainda pa yuda reenforsa e presion di GKMB cual ta palabracionnan cu tin andando caba cu GKMB. Tambe ta spera cu tur e colaboracion cu Serlimar y salubridad bay bon henter e siman pa ‘swipe’ full e isla y tene tur malesa cu por bin bou di control. 

E insecticida cu ta uza no ta esun cu ta wordo bisa cu ta mas malo, esaki ta esun di mas safe posibel, pero e ta keda insecticida, Pues ta recomenda pa esunnan cu ta haci uzo di insecticida na cas pa haci huiswerk bon riba esunnan menos toxico y tuma contacto cu departamento di salubridad publico y GKMB of cu pest control den caso cu tin sangura, pa combati vector na un manera saludabel pa bo mes. “Pasobra si bo flit un camber cu insecticida y despues bay drumi aden, e por ta hopi malo pa bo salud pues hopi cautela cu esey,” Sr. Schwengle a bisa.

A puntra Sr. Schwengle dicon a dicidi pa cuminsa cu e accion na Noord. Segun e mandatario: “Motibo pa cuminsa na Noord ta como cu mi ta kere ta e area cu ta mas pobla di Aruba, esey tin di haber tambe cu den area di Noord tin hotelnan y pues centro di turismo.” Siguientemente teniendo na cuenta otro sitionan cu meter bin na beurt mas lihe na unda tin concentracion di personanan cu ta mas vulnerabel den comunidad cual ta nos hendenan grandi. SABA por ehempel ta un di e sitionan aki cu mester haya accion mas lihe cu ta posibel tambe, segun e mandatario 

Sr. Schwengle a bisa cu e refuerso cu a pidi di DOW y Serlimar ta kere cu tin suficiente persona awo pa haci e tareanan rond full Aruba.

DESPA

Jerry Staring director di Departamento di Salud Publico tambe a mustra riba e echo di e teamnan cu a wordo forma pa diferente organisacionnan, pa yuda combati tur criadero.  Cada ciudadano mester elimina tur criadero continuamente. Si tin criadero cada 2 siman lo tin sangura adulto bek si e criaderonan keda existi.

E swipe ta bay tuma luga den tres fase, 1. control di cas, Serlimar ta benta articulonan afo y despues fumigacion

GKMB

Roque Dirksz di GKMB a bisa cu e cantidad di trahado no ta manera cu kier ta na GKMB y esey ta e motibo cua haci peticion pa a haya cooperacion di DOW y Serlimar pa asina tin mas grupo cu por wordo forma. “Asina nos por bay mas hopi caminda pa asina por coy Aruba ful den dos luna completo.” A cuminsa manera menciona na Noord y cada siman lo ta den otro bario. Tin 5 ploeg di DOW, fuera di esey 4 ploeg di serlimar. Unabes ta na e cas, ta bay haci inspeccion, wak si tin criadero ruim op di biaha, pa despues Serlimar pasa si tin sushi grandi.

Atardi entre 5or di atardi y 7or di anochi GKMB lo fumiga e bario cu a keda controla pa Swipe team. Ta pidi pa habri bentana  y porta di cas ya e huma ta pasa tur caminda. Persona cu problema di respiracion tin cu tuma precausion of no ta presente na momento di fumiga. Ta recomenda pa laba baki di awa y cambia e awa di bo mascota di cas. Esaki tambe ta conta pa cos di  hunga di mucha cu no ta tapa. Fumigacion so no ta e solucion, tin cu elimina criadero pa un resultado duradero.

Den medionan di comunicacion lo informa tur siman cua ta e bario den e districto cu ta wordo bishita pa e team di Swipe Actie Sangura

LEAVE A REPLY

Please enter your comment!
Please enter your name here