Santa Rosa lo ta introduciendo video pa asina brinda informacion na comunidad di Aruba pa un manera mas simpel pa hende por traha un hofi den nan cura y cosecha mas lihe.

Director di Santa Rosa, Nathalie Maduro a duna di conoce cu nan tin ‘hopi material caba’ pa esunnan cu tin Facebook wak e sistema diferente di traha un hofi, pero e biaha aki lo pone enfoke riba producto cu por cosecha mas lihe.

Nan lo ta trahando video di 2 minuut pa asina hende por motiva y haci esaki na nan cas. Maduro ta splica cu mirando mayornan ta na cas, nan kier curasha pa mayornan recicla.

Sea nan tin na cas bleki di lechi bieu, boter di soft drink bieu, di plastic, ‘corda bora un buraco’. Di e forma aki, e mayornan por tambe motiva nan yiunan pa planta hunto y por comparti y mira di leu cu e mata ta creciendo.

Santa Rosa lo sigui stimula e importancia di desaroyonan cu ta bon pa biba na Aruba, manera ‘nos mester pensa produci nos mesun cuminda’. Maduro ta bisa cu algo cu ta wordo hopi biaha bisa y scucha, sinembargo nunca ta practica.

E ta expresa cu ta momento pa tur reflexiona y realisa cu tin cuminda pa crece pa famia y pensa cu e ta algo pa Aruba. Actualmente, mirando e situacion di pandemia, nan ta avisa tur e cunukeronan cu Santa Rosa ta draai den team chikito.

“Nos no por cera henter e localidad pa motibo di bestianan cu nos tin. Nos tin mata cu nos tin cu atende. E caha ta habri di 8:00am te cu 12:00pm. Nos a manda informa minister cu mester un plan di aanpak caminda ta sugeri gobierno pa wak e puntonan cu mester tene cuenta cune”, Maduro a splica.

Den caso cu e situacion bira pio pa nan, mester tene cuenta cu cunukero cu e dam su capacidad ta bira menos, manera cu e ta bayendo awo ta 10 pa 12 truck di awa pa dia, manera e capacidad caba full, lo bira dificil pa bende awa.

E ta bisa cu mester tin un plan. Tambe pa e capacidad financiero pa paga e awa di WEB. Un ehempel cu el a menciona ta e hende cu ta cria porco, cu ta depende di restaurant pa nan porco; si esakinan a cera nan tambe ta sinti efecto.

Maduro ta pidi pa persona cu tin cuminda cu resta purba yuda esunnan cu den bario tin criadero di porco, pa asina ta pendiente di nan. E ta bisa cu mester tene na cuenta cu porco ta un bestia cu por come yerba, mata di fruta.

Pa esunnan cu mester di acerca Santa Rosa pero no ta yega na tempo pasobra ta trahando, e ta bisa cu por tuma contacto cu Shrek Fleririna, cu tin producto y tambe Canashito Farm Supplies cu cuminda pa bestia cu ta bendiendo ainda.

“Tin problema pero tin solucion. Nos ta purba pa brainstorm pa asina bin cu e miho solucion y por sigui sostene e productornan. Nos ta compronde e situacion ta fastioso, ta causa hopi stress den comunidad pa motibo cu no ta un situacion cu nos ta custuma cune”, Maduro ta bisa.

Nan lo purba keda trankil cu nan enfoke di con por ta mas independiente di cuminda pa cuminsa. Den caso cu ‘spera no pasa’ pero un barco no por yega di Aruba cu cuminda, ta algo cu Santa Rosa ta conseha y no pa warda cu mester yega na un situacion dificil pa asina persona cuminsa planta.

Maduro ta enfatisa cu ta algo cu mester tin practica, manera tin compania di hydroponics cu tin un challenge di contract awo cu hotel y restaurant. Nan ta pidi manera comunidad tambe por sostene e productor local.

“Nos kier encurasha y stimula pa esnan cu tin compania no stop cu nan producion, pa nan sigui cu na mercado, hende lo tin cu sigui come. E ta algo pa considera, pero ta pidi pa comunidad duna oportunidad na e mercado local y cumpra nan producto. Pa esnan cu ta bende of tin negoshi pro laga nos sa y asina ta pone informacion y tambe cua ta esnan cu ta haci entrega na cas pa haci’e mas facil pa cliente”, el a bisa.

Ta recorda cu nan lo ta available riba nan Facebook page Santa Rosa unda nan lo pone informacion di ken tin producto pa hende. Nan lo conta tambe cu sisten di prensa. Nan ta conseha pa sigui produci y comunidad por haya e cuminda fresco.

 

 

LEAVE A REPLY

Please enter your comment!
Please enter your name here