Ta depende ki fondo AZV tin disponibel den presupuesto nacional; Eventualmente prome cu maart lo firma CAO na hospital

ORANJESTAD – E negociacion di un contracto colectivo (CAO) cu ta tumando luga entre gerencia di hospital y sindicato ABV ta un asunto cu opinion publico ta siguiendo di cerca, mirando e importancia cu operacion di e unico instituto hospitalario tin pa nos comunidad.

E negociacion di un CAO pa hospital no ta depende di gerencia di hospital so, sino cu nan ta depende di e fondo cu ta wordo presupuesta via AZV. E ta un di e contracto colectivo mas grandi na Aruba cu ta cubri alrededor di mil trahado.

Mediador di gobierno, Anselmo Pontilius cu ta intermedia den e negociacion aki pa yega na un contracto colectivo (CAO), ta informa cu, un biaha mas e partidonan a reuni diamars ultimo; producto di un serie di reunionnan cu nan ta sosteniendo. E biaha aki, formalmente e partidonan a palabra varios punto cu mediador di gobierno ta considera relevante.

For di aña pasa a start cu e negociacion aki, pero e negociacion di un CAO pa hospital ta uno ‘serio y grandi,’ segun mediador di gobierno, ya cu e ta mara na e presupuesto limita cu AZV tin asigna pa e prestacion di servicio di salud cu hospital ta brinda na nan afiliadonan. Na final e firma di un CAO ta depende di ki fondo AZV tin disponibel den e presupuesto cu a wordo asigna p’e.

Team negociado

Despues cu e director financiero di hospital a haya su retiro, un di e punto ta cu di parti di sindicato ABV kier sa kende ta encarga cu e negociacion. Finalmente hospital a informa diamars ultimo ken ta su team di negociacion locual a conduci tambe pa fiha e forma di ki dia y con e proceso aki ta sigui. E prome proposicion tabata pa reuni tres biaha pa siman pa acelera e proceso y caba cu e negociacion, cu a bira uno relativamente largo.

E sindicato di hospital a yega di señala varios punto fuera di e CAO cu, segun mediador di gobierno, no mester ta un problema. Pero e echo cu no tur esunnan cu ta participa den e negociacion aki tabatin e espacio necesario pa atende cu esaki. Ya cu apart di nan trabou, nan mester sinta negosha; y un negociacion di CAO di e caliber aki ta exigi, concentracion y preparacion.

Tur e punto aki a keda aclaria diamars ultimo, caminda a keda palabra cu e team negociacion lo reuni diamars y diabierna. Un punto cu nan a reuni diabierna ultimo tin di haci cu aspecto financiero cu e sindicato ta exigiendo den nomber di nan miembronan denter di e cuadro financiero.

A wordo proponi pa uza full luna di februari y si ta necesario maart tambe pa mira con e team di negociacion lo por acelera e proceso pa keda cla cu e CAO aki. E ultimo cuater aña tabatin un contracto colectivo di dos aña cada biaha. Tur dos partido a yega di expresa nan deseo pa firma un CAO pa tres aña, pero esaki ainda ta depende di e resultado di e negociacion.

Aspecto financiero

Segun mediador di gobierno, e negociacion aki mester por keda cla prome cu fin di maart; cu pa su opinion ta hopi tempo. Pero nan ta consciente cu tin punto cu no ta facil y un di nan clave ta esun di aspecto financiero. E no ta algo facil pa sali for di nan financieramente, ya cu mester compronde cu hospital ta haya un suma cu, aunke nos ta papiando di miyones di Florin presupuesta pa aña pa medio di AZV, pero e gasto cu operacion di un hospital ta demanda ta grandi.

E ta un debate amplio pa logra aprobacion pa un suma asina ya cu no ta sin mas cu hospital por bisa cu mester 80 of 90 miyon pa atende cu su gastonan, entre otro di personal, cu ta uno grandi. E concepto aki tin di haber entre otro cu gasto di salario, beneficionan, etc… y cualkier cambio cu nan kier mehora den condicion di trabou, tin su implicacion riba e gasto awor y pa futuro.

Importante ta cu e puntonan awor ta hopi cla riba mesa. Tambe tin calculacion kico nan costo ta si e cambionan aki ta drenta na vigor aworaki. Segun Sr. Pontilius, e conseho cu nan por duna como departamento di mediador di gobierno, pa purba di reparti nan den mas aña. Di e forma aki nan por logra reparti riba e impacto tambe. Nan tur sa cu e tarea aki no ta facil, tanto pa e directiva di e sindicato ABV, como tambe pa gerencia di hospital, si nan ta firma un acuerdo. Nan ta purba unda cu nan por pa yuda den todo caso pa guia e proceso y keda concentra riba dje.