Despues di un par di luna di preparacion, CEDE ARUBA diadomingo 10 di September huntu cu IBiSA, Centro di Bario Noord, team di boluntarionan y Kerekentenchi party Xplotion a presenta BAN CAYA.
Un total di 40 organisacion tanto deportivo como social, cultural y di salud a duna informacion y demostracion di kico nan tin pa ofrece. CEDE ARUBA hunto cu IBiSA a percura pa detayenan specifico pa haci famianan contento ya for di 3 or di atardi.
E actividadnan tabata varios, pensa riba bicicleta, Hotwheels, skateboarding, ImSan, Rode Kruis, Bus di Salud, Brandweer, Santa Rosa, 131, FADA, Scouting Aruba ( Noord), Hammersharks baseball y mucho mas. Caya Frans Figaroa, e parkinglot dilanti e compleho y full rond tabata yena cu actividad. Tabatin kids’ corner cu seccionnan di pintamento di cara, dino jump, show di baile pierewietje, Rosea Cultural, y varios artistanan di e bario di Noord.
CEDE ARUBA ta gradici FFD su managing team pa nan contribucion inmenso, tambe na gruponan di boluntario cu for di 12 or di merdia a traha duru pa pone mesa, stul y numbernan riba e tentnan y despues anochi pa ruim op. Tabatin un grupo di boluntario riba bais, Biking squad Aruba cu tabata core riba e ruta pa sigura cu tur cos ta cana bon. Hopi danki na nan tur pa e bon trabou.
Durante e atardi aki a entrega dos premio, uno di skatepark foundation recreational kendenan por medio di nan sixtytree brand a traha un skate board cu e logo CAYA special pa e evento. Aki e hoben Lisa Croes kende a participa den e evento a gana e skateboard. E otro premio a bay pa e ganador di e competencia di HotWheels cu ta e hoben Ethan Winklaar y el a gana su trofeo.
Parti paden di stadion a tuma lugar competencia den futbol U7. Resultado ta na 3er lugar sv Bubali, 2ndo lugar sv Nacional y e ganadornan di BAN CAYA SOCCER a keda sv Riverplate. Pabien na tur cu a participa den e diferente competencianan cu tabata tin. Ta e team di Riverplate hunto cu Minister Endy Croes a inaugura e WAW mobile, un otro proyecto nobo entre CEDE ARUBA y IBiSA, na unda lo trece actividad di deporte y movecion pa mucha y hoben den barionan di FCCA.
Den nutricion y movecion tambe tabata tin diferente fundacion, masahista, nutricionista
Ta wordo calcula un 2000 hende a bin disfruta di e atardi aki. Cu musica di Quality Brass nos reina infantil di carnaval 2023 Ziah Amalia huntu cu reina infantil di Noord 2024 Xeena Dijkhoff acompaña pa Prins y Pancho Infantil y Pancho Hubenil di Carnaval 2023 a clausura e evento exitoso aki y a pasa riba e ruta di BAN CAYA y aki tur hende por a join e parada te riba e parkinglot di Frans Figaroa.
CEDE ARUBA ta gradici tur partners y tur medio di comunicacion cu a yuda den e projecto aki y tambe na tur fundacion of organisacion un biaha mas. Masha danki!
