Den un rueda di prensa siman cu a pasa, director di Hospital a duna cierto informacion tocante e asunto di fraude den laboratorio na Hospital. E informacion duna a confirma den linea general loke Bon Dia Aruba a publica caba dia 19 di juli ultimo. For di fuente fidedigno e tempo ey nos a haya informacion cu tabata trata di entre 2.000 pa 2.500 Pap-test cu lo mester a bay Hulanda pero nunca a bay, pero a cobra si… Tambe nos fuente a laga nos sa cu e testnan tabata costa 190 euro pa cada uno, loke lo a yega na un suma di alrededor di un miyon florin cu lo a bay den e cartera robes di e empresa fantasma crea na Hulanda. No tabatin comentario riba loke nos a publica.

Nos por constata awor en todo caso cu nos fuente tabata bon informa pasobra den e rueda di prensa e director a confirma cu ta trata di un cantidad di 2385 test y cu e suma total cu esaki ta representa ta den careda di 400.000 euro. Naturalmente e hecho cu nos informacion tabata corecto no ta lo mas importante. Importante ta cu nos por conclui cu ta trata di un caso di fraude grandi cu no por keda na un splicacion, y nada mas. Si den pasado hasta e casonan menor di fraude y desfalco den sector publico tabata termina dilanti hues, anto sigur esey ta e caminda corecto pa cana den e caso aki tambe.

Claro cu mester warda ainda riba e resultado di e informe, cu segun Hospital mes ta declara, ta di mas o menos 250 pagina, pues nos ta supone cu esaki ta bay cubri tur aspecto debidamente. Ta p’esey tambe cu a bin presenta henter un proceso nobo con pa maneha e Paptestnan den futuro a base di un procedimento mas transparente y ademas mas rapido y eficiente; un avance cu riba su mes ta di aprecia cu lo por evita e tipo di anomalia aki. Tur esaki ta bon noticia, pero pakico no a warda pa duna e noticia ey ora e rapport ta completamente cla? Awor nos ta scucha algun elemento di e caso, sin cu, logicamente, por duna mas detaye pasobra e rapport mester sali ainda. Loke sin embargo ta ocasiona cierto preocupacion cerca nos ta ta cu, si ya a cuminsa set up administracion nobo, a tuma decision tambe kico mester bay pasa cu e dos sospechosonan principal, aparte di otro hende cu por ta envolvi?

No tabata mas logico pa warda cu publicacion te ora e rapport ta cla, pa despues anuncia ki conclusion ta saca, tanto pa e caminda legal/hudicial cu mester cana pa esnan acusa di hecho castigable, como pa mehoracion di e trayecto financiero/administrativo? Encuanto e prome aspecto aki, nos no ta spera nada menos cu ta hiba denuncia unda e mester ta, na Ministerio Publico. Nos no kier tende di ‘areglo bao man’ cu ta limita e daño pa e personanan envolvi na un retiro di trabao. Pa bisa e cos bon cla: no mester bin repiticion di e caso di Setar NV, unda asina leu cu nos sa no a deposita ningun denuncia na Ministerio Publico, y a duna tur oportunidad pa e delincuente envolvi, di crimen cometi na Aruba y contra patrimonio di Aruba, pa bay establece den exterior. Si den varios caso di fraude menor e personanan involucra mester a duna, corectamente, cuenta dilanti mesa berde, anto nos no mester desaroya un practica den e pais aki basa riba privilegio, pa niun y ningun.

E otro aspecto, di procedimento di control, nos ta spera cu lo trata esey den e 250 pagina di e informe anuncia. Y esey ta no solamente con e control a faya, pero unda el a faya. Pa cuminsa, e pregunta si e famoso 190 euro pa cada Pap-test tabata conoci cerca tur instancia cu mester tabata na altura di e aumento den costo di Pap-test. E cambio den tarifa tabata conoci y presupuesta? Pa ki aña? Nunca a cuestiona pakico direpente Pap-test mester bay Hulanda, anto cu un diferencia asina grandi den prijs? No mester lubida cu ta henter un cadena di decision e asunto aki mester a pasa, pa finalmente yega na e instancia cu mester paga (AZV). Nos no ta cuestiona actuacion di ningun, pasobra no tin base pa esey, ainda, pero simplemente mester bin claridad kico a pasa cu placa di pueblo eynan.

Banda di esaki tin e trabao interno di control na e laboratorio y Hospital mes cu obviamente tabata fayando. Ta di supone cu e Pap-testnan no tabata bay Hulanda gratis, ni cu postduif. Pues den un administracion drechi lo mester tin prueba di e agencia di transporte cu lo a percura pa comprobante di tur envio di e par di mil test cu mester a bay. Claramente, e tipo di control basico na Hospital a faya y nos por imagina cu lo haci e debido esfuerso pa mehora esaki. Ta di aprecia cu desde awor caba Hospital ta indica di ta consciente di esaki, pero ta indispensable cu ta hiba e proceso aki transparente y completo. Esey ta inclui denuncia y persecucion penal pa esnan envolvi, independiente di eventual status di ‘niet zomaar iemand.’

 

LEAVE A REPLY

Please enter your comment!
Please enter your name here