‘Ta ora pa reforsa proteccion di nos shoconan’

Expertonan internacional den e ciencia y conservacion di shoconan tabata na Aruba recientemente, y a constata cu falta di proteccion pa nos shoconan. Parke lo tin un encuentro cu gobierno y autoridadnan concerni pronto riba e punto aki.

Natasha Silva, general manager na Parke Nacional Arikok ta bisa cu ora bo haci proyectonan di conservacion cu tin di haber cu naturalesa, nunca e ta algo di awe pa mañan. E ta trabaonan cu por lo menos ta tuma dies aña of mas.

“Pues locual nos ta bay haci e lunanan venidero ta pa sinta cu gobierno y autoridadnan local pa tin un bon entendimento di otro di e proyecto aki. Pasobra basicamente e shoco ta legalmente protegi, pero awor mester reforsa e proteccion aki”, segun sra. Silva. Parke ta premira mas problemanan na caminda den cuadro cu tur desaroyo comercial/construccion tumando luga. Parke ta haya manera 50 pa 60 yamada pa aña relaciona cu rescate di shoco y awor finalmente tin miho bista y guia na con por cuminsa trata cu esaki.


Falta di proteccion
David Johnson, director ehecutivo di e Global Owl Project ta bisa Bon Dia cu shoconan no ta bon protegi na Aruba. E shoco ta un simbolo nacional awor pues nan merece e nivel di proteccion halto ey segun e ta bisa nos. David ta bisa: “Bo por pone tubonan/neishinan artificial cu e shoconan lo uza. Por transporta parhanan for di un luga pa e otro, por ehempel pa saca nan for dia areanan di construccion. Pasobra desaroyo comercial semper ta bay continua. Pues nos ta bay keda topa cu shoconan den e areanan aki. Nos kier hiba nan un zona mas safe, pero tambe protege e sitionan aki anto elimina algun di e menasanan. Esey ta bay tuma proteccion, medidanan bon pensa y hopi trabao. Pero nos por haci e.

Puntonan cu a bin dilanti durante bishita di Global Owl tabata aspectonan di planificacion pa proteccion di neishi pero tambe un plan y strategia di conservacion pa termino largo. “Pues con nos ta midi exito y tur e conocementonan cu ta envolvi den e trabao ey. Esaki ta un grupo awor di 22 persona cu tin experiencia y training cual lo ta esunnan cu lo yuda nos den e strategia di conservacion na Aruba”, sr. Johnson ta bisa.

Registro nacional
Parke Nacional Arikok a tuma contacto cu Global Owl pa training tecnico di un tayer unda cu 22 hende a keda certifica. Nan a cubri varios area di ecologia di shoco y aspectonan di genetica. “Nos ta bay haci algun estudio ainda cu e genetica, pero di loke nos a siña caba nos por mira cu e shoco di Aruba ta totalmente unico.”

E tayer a cubri tecnicanan di survey. Manera nos a publica, e shoco di Aruba ta awor criticamente den peliger di extincion y ta aki na Aruba so bo ta haya nan. “Pues localisando nan y documentando nan neishi ta un parti critico. Nos a busca y haya algun neishi y documenta por ehempel e tamaño, diameter y tur informacion di e neishi pa traha un registracion nacional pa por check bek y mira con ta bayendo cu e populacion”, sr. Johnson ta splica.

Neishi na aeropuerto rescata
Den cuadro cu proyecto Gateway 2030, construccionnan grandi ta tumando luga na aeropuerto Reina Beatrix.

Recientemente dos neishi di shoco cu tabata den tereno di aeropuerto a keda rescata y movi pa Parke manera nos a trece dilanti. Aeropuerto a manda un peticion na minister encarga cu Infrastructura pa pidi permiso pa move e shoconan aki for di tereno di aeropuerto. Pa algun aña caba aeropuerto ta trahando hunto cu Aruba Birdlife Conservation kende nan a contact pa investiga y yuda cu solucionnan.

Te cu awor, e experiencia y conocemento pa por move un neishi di shoco no tabata existi mes na Aruba, pues awor e trabao ta cuminsa. Ainda tin cinco neishi di shoco riba tereno di aeropuerto cu mester bay tambe pronto, pero tanten no tin ningun peliger pa nan, segun declaracion di aeropuerto. Nan a expresa cu: “Nos a sinti responsabel pa sigura e siguridad di e shoconan aki y di tur bishitante di aeropuerto.”

Global Owl
Global Owl Project ta un organisacion (non profit) cu ta consisti di 450 hende trahando den 65 pais riba e ciencia y conservacion di shoconan. Nan ta existi desde 2001 y nan ta consisti di hopi profesionalnan, profesornan, curator nan di museo y boluntarionan. David ta trahando cu shoconan pa 42 aña. E ultimo 11 aña el tabata tin algun proyecto grandi cu Burrowing Owls. E la haya su permiso pa pone banchi riba shoco desde 1982, anto a pone banchi caba riba 6.000 Burrowing Owls, banda di miles di otro tipo di shoconan y parhanan grandi. Su experiencia ta amplio den captura y cuido di parha, proteccion di neishi y strategia di conservacion.

Esaki tabata e prome esfuerso pa establece un team pa cuminsa traha riba proteccion di shoconan riba e isla. Global Owl ta colaborando cu otro paisnan tambe haciendo trabaonan similar. David lo ta regresando pa sigui traha cu Aruba y posibelmente bay cu algun hende pa mustra nan otro sitionan di shoco otro partinan di mundo. “Di e manera aki e ta bira un training mas duradero pa locual ta e esfuerso di conservacion”, segun sr. Johnson.

You May Also Like

Departamento di Salud Publico: Alerta pa caso di sarampion confirma biahando for di Aruba

ORANJESTAD – Recientemente a sali publica un alerta di salud, dia 18 di maart ...

‘Wetlands ta aporta den control di polucion riba un pais’

Segun un articulo publica via Rivers of Carbon (riversofcarbon.org. au), no mester descarta e ...

Tur fraccion a compromete pa hisa nivel di parlamento

Ayera tardi durante un reunion publico presidi pa prome biaha pa e vice presidente ...

Ley di oficialisacion di Papiamento tin restriccion ‘discriminatorio’

A pesar cu 14 aña pasa,  Papiamento a bira un idioma oficial na Aruba, ...

‘Abortus ta un secreto publico’

E tema di abortus ta keda un secreto pa mayoria hende rond di Aruba. ...

FADA ta lansa campaña AmigoDIDI pa Carnaval

Durante un conferencia di prensa cu a tuma luga na FADA, a presenta nan ...