Regularmente nos por tende algun di nos politico o empleadonan publico referi cu cierto tono lamentoso na e hecho cu ‘nos leynan ta anticua’. Esey hopi biaha ta suficiente pa e otro partido den e discusion o entrevista tambe pega un suspiro di resignacion y e asunto ta yega te ey… Aparte di esey, nos tin ley bieu cu por funciona perfectamente pero a desactiva nan, sin un bon motibo. Es decir, ora ta bisa cu ley ta anticua nos mester ta mas specifico pasobra casi nunca ta asina cu henter e ley no ta sirbi mas.

En todo caso, ayera tambe nos a bin topa cu un caso asina, di cual e lector por lesa den e mesun edicion aki. Ta trata di e carta abierta cu un ciudadano a manda pa tanto Gobernador como Promer Ministro, pa pidi atencion pa e hecho cu segun nos ley di eleccion (articulo 10, inciso 2) cada partido politico cu ta participa na eleccion ta haya un copia completo di e registro di votador.

E ciudadano ta haya cu e stipulacion aki den e ley no ta cuadra cu su derecho como ciudadano di privacidad pa loke ta e datonan personal cu ta warda den e registro publico. E ta referi aki na articulo 8 di Tratado di Roma (EVRM), cu ta garantiza derecho di e ciudadano dentro di e hurisdiccion di e tratado di proteccion di su bida priva, su famia y bida familiar, su vivienda y su corespondencia. No ta permiti intromision di ningun autoridad publico den ehercicio di e derecho aki, mas aleu cu ta estableci pa ley y den un sociedad democratico ta necesario den interes di seguridad nacional, seguridad publico o bienestar economico di e pais, prevencion di disturbio y hecho castigable, proteccion di salud o moralidad, o pa proteccion di derecho y libertadnan di otronan.

Te asina leu e texto di e Tratado referi, cu ta laga poco espacio pa interpretacion eroneo. Kico ta realmente e problema den e caso particular aki y pakico mester a dura te 2021 pa cambia un stipulacion den un ley local, introduci na aña 1953, tempo cu por tabata sa caba cu e articulo aki no ta cuadra cu stipulacion di e tratado?Si e tempo ey pa algun motibo no a tene cuenta cu e tratado, cu ta data di algun aña antes, di tur manera nos tabatin casi 70 aña pa remedia esaki? Esey no a sucede, y e pregunta cu e ciudadano ta trece dilanti ta si e cos aki por keda asina. Nos ta kere cu no. Fuera di e argumento cu na momento di su introduccion e ley, pa loke ta e entrega na e partidonan politico no tabata cuadra cu e tratado, ta bin acerca cu desdee tempo ey den comunidad a bin mas atencion pa proteccion di privacidad di dato di ciudadano, sigur desde momento cu archivo digital a haci su entrada. Esaki a facilita enormente e capacidad di gobierno(nan) pa almacena informacion di ciudadano en general, pero a crea tambe un responsabilidad cada vez mas grandi pa integridad di e informacion ey.

Pa varios decada na nos isla nos no a preocupa pa e hecho cu cada cuatro aña partidonan ta haya ‘lock, stock and barrel’ datonan priva di diezmiles di ciudadano, loke a traves di añanan a hiba na observacion di varios ciudadano cu conocimento, cu particularmente e dos partidonan grandi tin un tesoro na informacion digital indebido di gran parti di comunidad. Y como nos ta varios decada caba den e era digital tambe, ta bira tempo pa cuminza cuestiona e asunto aki, unda cu asistencia di un ley anticua, informacion di ciudadano innecesariamente ta bay pa e partidonan politico.

Nos a yega di puntra nos mes si realmente un partido politico mester por ‘controla’ si un hende a bin vota caba? Talvez e no tabatin gana di bay vota, a pesar cu el a bisa bo (e partido) cu e ta bay vota pa bo. Ora e drenta e hokki ey di tur manera bo no por sa kico el a vota, esey ta su secreto. Ademas, ora cu politico, cu lista di gobierno den man, por comproba cu un persona no a binvota, esey años despues por ser usa contra e persona, sigur den e ambiente ridiculamente politiza den cual nos ta biba. Tambe mester tuma na cuenta cu awendia e partidonan no tin mester di e lista mas pa duna asistencia na persona cu no a haya nan carchi di vota y no sa sigur si nan ta registra como votador. Ta yuda nan subi website di Censo y cla ta.

Nos por conclui cu tin motibo valido pa laga e articulo completamente afor den e siguiente ronda di reparacion di e ley di eleccion. Pa loke ta e eleccion aki par di siman naturalmente, mescos cu e otro cambionan cu lo kier a haci, no por haci nada mas. E asunto ta ilustra bon cla atrobe cu nos gobierno(nan) no mester ta asina dejado ora ta trata di inicia e trayecto di renobacion di ley, pa experto y ciudadano por haya e proyecto di ley pa mira, pa critica constructivo por mehora e resultado. Pero por ta cu aki tambe nos por haya asistencia Hulandes, of nos mes por?

LEAVE A REPLY

Please enter your comment!
Please enter your name here