Tanten cu cumpli cu DPL ta haya bijstand

Departamento di Asunto Social (DAS) a comparti tocante e asunto di afdeling di bijstand y e cambio cu a introduci pa esunnan cu ta cobra bijstand; den e caso aki e personanan cu ta cay bou adiccion.

Jessica Peterson Arends, chief di afdeling di bijstand, a duna di conoce cu nan departamento a cuminsa cu ‘bijstand temporal’. Esta e procedura cu e persona cu mester di ayudo mester bay DPL (Departamento di Labor) pa busca.

Den caso cu e persona no por bay traha, e mester atende medwork. Peterson-Arends ta splica cu aña pasa y den actualidad CAA (Consultorio pa asuntonan di Adiccion) ta atende cu cliente cu tin problema di adiccion. Sinembargo, nan ta ripara cu persona cu ta den adiccion no kier sigui cu procedura of programa di rehabilitacion y ‘djis ta bay eynan pa busca e firma’ certificando cumplimento.

Pa awo, e departamento di bijstand a bisa cu lo bin cu cambio, caminda e persona tin cu bay DAS pa busca un carta pa despues bay CAA pa asina sigui e programa. CAA tambe ta manda carta den cual por bisa cu e persona ta purba den drenta e centro di rehabilitacion.

Peterson Arends ta bisa cu e situacion ta trece confusion pa cliente y problema cu nan, pa motibo cu hopi di nan no kier sigui e programa. “Esey kiermen si no ta sigui e programa nan no por haya bijstand y ta stop. Esey a trece cune cu nan a cuminsa menasa e trahado; algo cu ta inaceptabel.”

E departamento kier purba yuda e persona cu mester di bijstand. Sinembargo e ta bisa cu e persona den e situacion di adicion mester compronde cu ta placa di pueblo y cu mester usa e placa na e miho manera.

Pa awo nan tin un luna operando di forma aki. A puntra Peterson Arends si esaki ta conta pa adicto ambulante, of esunnan cu ta adicto na cas. E ta contesta cu ‘mester bisa cu pa tur esunnan cu tin adicion ta dificil pa admiti cu nan tin adiccion’.

E ta splica cu tin dos forma di adicion manera droga y alcohol. E ta bisa cu esunnan cu ta adicto na bebemento nunca ta acepta cu tin un problema. Sinembargo nan no por yega na tur esunnan cu tin adiccion, pues ta keda pa CAA – cu tin e lista di esunnan cu ta acerca. Si nan ta cliente, ta yama of papia cu nan.

Tambe ta duna di conoce cu no ta traha tur adicto ambulante, pero ta enfoca riba nan cliente. “E por ta esun cu ta na cas of esun riba caya cu ta haya bijstand. Nos por bisa den dos siman a haya cu nan no a bin cobra, pasobra nan no kier sigui cu trayecto di centro di rehabilitacion.”

Peterson Arends ta enfatisa cu si e persona no kier sigui cu e programa, e no ta ricibi ayudo. Na e momento ey e persona no ta haya placa y esey ta pone cu por tin e posibilidad cu ta bira delincuente. Mirando cu trahado ta haya menasa, a puntra si cuerpo policial tin bista riba e personanan aki?

Segun Peterson-Arends ta bisa cu polis a tuma parti den e asunto y a keda hiba nan den su seno. E ta bisa cu nan lo duna siguimento tur luna. Nan ta bisa cu e situacion ta keda cu e persona tin cu sigui e programa di rehabilitacion pa e por ricibi su bijstand.

“E ta un bijstand temporario, pa esunnan cu no tin trabou. E ta dificil pasobra tambe den un mundo di adiccion, e doño di trabou no kier un persona asina traha na su luga. Pero cu e programa nan por cana e caminda corecto pa e centro di rehabilitacion.”

Ora cu nan ta keda cla cu e trayecto, nan por drenta den e proceso laboral. Si nan cumpli y por pasa cu nan cay bek den e tentacion, semper lo keda di bolbe yuda cu e mesun programa.

A puntra tocante edad di e adictonan. E ta bisa cu edad ta varia, sinembargo si ta hoben, nan ta wak e cabes di e cas. Basa riba e control, nan ta cuminsa wak e famia. Nan ta wak ken ta esun cu no ta trahando, dicon e no ta bay scol? Kico e ta haci of cua ta su adiccion? Nan ta bay CAA y asina nan ta sigui cu investigacion y cu e proceso.

Tin caso apart di famia cu ta hoben (nan ta wak si ta menor di edad). Si e tata tin 18 aña, e por inscribi na DPL pa un trabou; si no por traha mester ta Medwork. Si e mucha kier sigui studia mester tene cuenta cu DAS ta wak e ‘volledig dag onderwijs’, pues hoben tin cu bay scol mainta; si ta anochi por bay DPL.

Si ta hoben cu ta bou di 18 aña, e ta cay bou responsabilidad di e mayor. E mayornan mester haci e peticion pa e menor di edad, den caso cu e mayor tin entrada. E ta duna di conoce si cu tur caso ta atendi individual. “E ta un proceso cu ta cana y mara na un ley”, pues cada caso ta diferente.

“Na final di dia e persona tin cu cumpli cu tur condicion cu ta wordo controla tur dia. E bijstand no ta mara na un tempo. No solamente door di nos, pero tur luna mester presenta na DPL pa sa ki luga y solicita pa trabou”, Peterson Arends ta bisa.

Locual a cuminsa ta algun siman pasa, pero nan kier enfoca riba dje y avisa pueblo riba e maneho nobo cu tin pa loke ta trata bijstand, procedura cu cliente cu tin adiccion y kico ta consecuencia cu tin si e no sigui cu trayecto. En resumen, ‘tanten cu cumpli cu DPL e ta haya su bijstand’.