Segun resumen diario di Departamento di Salubridad Publico DVG ayera, tocante e desaroyonan di pandemia di Covid-19 na Aruba, ayera e tasa di positividad tabata na 7 porciento.

Segun informacion di Johns Hopkins su School of Public Health, e tasa di positividad ta e porcentahe di tur test di coronavirus cu ta sali positivo. E tasa di positividad ta yuda oficialnan di salubridad publico contesta preguntanan manera: Kico ta e nivel actual di transmision di coronavirus den comunidad? Y nos ta haciendo suficiente test pa e cantidad di hende cu ta birando infecta?

E porcentahe positivo ta bay ta halto si e cantidad di test positivo ta demasiado halto, of si e cantidad total di test ta demasiado abao. Un tasa di positividad halto ta sugeri un transmision halto y cu probablemente tin mas hende cu coronavirus den comunidad cu no a haci test ainda. E tasa di positividad ta un medida critico pasobra e ta duna un indicacion di con ‘widespread’ e infeccion ta den e area unda ta haci test – y si e nivelnan di test ta controlando e nivelnan di transmision di malesa.

Un tasa di positividad halto ta nifica cu probablemente mester haci mas test – y ta sugeri cu no ta un bon momento pa relaha restriccionnan cu tin como meta reduccion di transmision di coronavirus. Pasobra un porcentahe halto di positividad ta sugeri un cantidad halto di infeccion di coronavirus, un tasa di positividad halto por indica cu ta bon momento pa agrega restriccionnan pa slow e transmision di e malesa.

Mas halto e tasa di positividad, mas preocupante esaki ta. E regla general, sinembargo, pa e tasa di positividad ‘demasiado halto’ ta 5 porciento. Por ehemplo, Organisacion Mundial di Salud (WHO) na mei a recomenda pa mantene e tasa di positividad bao di 5% pa al menos dos siman prome cu gobierno por reconsidera reapertura. Si ta exitoso den controla transmision di coronavirus, por baha e limite aki cu tempo.

Pues un tasa di positividad di 7 porciento ta net un tiki demasiado halto, maske den ultimo simannan por a nota cu e indicador aki ta bahando. Esaki ta duna indicacion tambe cu poco poco e di tres ola di coronavirus na Aruba ta cayendo bao control.

Den otro informacion relaciona cu Covid-19, DVG a informa cu ayera tabatin 52 persona cu a recupera y a registra un total di 22 caso nobo, di cual 3 no ta residente.

E cantidad di caso activo di Covid-19 pa ayera tabata 306, y e cantidad di fayecido no a conoce aumento y a keda na 156.

Segun DVG, datonan ta ilustra casonan nobo di Covid, e malesa causa pa e virus SARS-CoV-2, cu un averahe semanal di 276 caso pa dia, y un averahe di tasa di positividad semanal di 11 porciento pa dia.

Ayera tabatin na Aruba 30 persona hospitalisa na Hospital Dr. Horacio Oduber debi na Covid, di cual 6 tabata den Unidad di Cuido Intensivo ICU, y 24 tabata riba piso general. Ademas tabatin 23 pashent di Aruba interna den ICU na Colombia.

LEAVE A REPLY

Please enter your comment!
Please enter your name here