Polis cambiando strategia di control pa temporada di carnaval

Alex Pieters di departamento Unidad di Motor KPA ta splica Bon Dia cu durante di temporada di carnaval, Cuerpo Policial/Unidad di Motor a cuminsa cambia nan strategia di control.  Antes nan tabata controla despues di parada y riba alcohol cu velocidad, pero awor a cuminsa controla riba documentonan tambe y prome cu carnaval segun sr. Pieters.

“Den e prome dos actividadnan aki di carnaval cu a pasa caba nos a duna hopi proces-verbaal riba documentonan cu no ta na ordo. Personanan coriendo sin rijbewijs, sin seguro of number di auto. Nan ta pensa cu por ta nan vehiculo ta para na cas, kisas na no tin otro manera y pa nan no perde e actividad, nan ta bay cu e vehiculonan aki riba caya. Pensando cu e control ta mas tanto riba alcohol cu velocidad.” E agente ta splica nos cu nan ta ripara tin hopi vehiculo cu falta number, no tin number paga of falta sticker tambe di brommer. Den e di dos actividad, cual tabata e parada di Blaas, polis a kita cinco scooter, dos motorcycle grandi, tabata tin varios documento cu no tabata klop y tabata falta rijbewijs.

“Pues nos ta cuminsa prome cu carnaval caba controlando riba esaki pa despues bo no haya bo den problema cu bo ta den accident, y bo no tin seguro of rijbewijs. Anto asina e cos ta bira mas pio pa bo mes y otro partido.”

Sr. Pieters ta splica nos cu despues di e paradanan polis lo bay wak mas skerpi riba e parti di comportacion. Nan sa cu tin hopi hende bao influencia, nan ta admiti cu no tin suficiente hende pa por stop esaki completo y haci nan control di tal forma grandi pa gara tur. “Kico nos ta bay pone hopi atencion riba dje ta e manera di core. Si nos tuma nota un auto ta zig zag hopi, subi speed duro pasa hende riba caminda lo indica cu algo no ta bon y lo tin motibo pa para e vehiculo aki. Den pasado tabata tin 10 auto por ehempel cu a core straño y malo anto haci cosnan peligroso, ora nos a para nan nos ta constata cu nan ta bao influencia di alcohol.”

Ayudo di pueblo
Polis ta haya hopi ayudo di pueblo tambe cual nan ta aprecia hopi. Via centrale post hende sa meld ora hende nan wak otro ta coriendo na un manera iresponsabel. E yamadanan aki ta yuda pasobra polis ta riba caminda plama y manera cu nan haya yamada cu tal auto cu tal number ta coriendo peligroso, nan ta percura pa yega e direccion cu nan tin cu bay pa nan hay’e. “Importante ta e ora ey si bo haci un yamada asina ki, ta e color di auto, e forma di auto pasobra marca no ta facil. Si bo por logra haya number di plachi lo ta mas miho paso e ora nos lo por bay mas specifico. Y tambe via e number nos por haya e adres cu e nomber di e persona, caminda nos por bay e caminda cu e persona ta biba wak si nos por hay’e den e forma ey”, sr. Pieters ta bisa.

‘Record di dos morto’

E oficial ta enfatisa na Bon Dia cu e siguiente puntonan di atencion aki menciona nan ta bay purba tene trafico mas safe como tambe purba di kibra e record di aña pasa cual tabata dos morto den trafico.
“Esaki ta un all time record eigenlijk for di tempo cu tin vehiculo di motor ta core na Aruba. Pero toch e ta dos anto nan dos ta keda famia di otro hendenan y hendenan stima cu amigonan. Nos meta ta pa yega na cero morto den trafico anto mantene. E compliment e ora ey pa e tiki accidentnan aña pasa anto pa e aña aki.”

Sr. Pieters ta bisa cu e tipo di control aki no ta trabao cu mester solamente cay riba polis y DTI. E ta mas un team work di Aruba completo; tur chauffeur cu subi tras di auto pa maneha hunto por yega na un trafico mas sigur cambiando nos mentalidad.  Esaki ta algo cu nos a yega di combersa caba cu sr. Pieters caminda cu e ta bolbe enfatisa cu: “Na luga di core cu e pensamento cu mi tin preferencia constantemente, mi tin cu bay lihe paso mi tin pura. Si nos cambia esey y bira mas social, tene cuenta cu otro anto concentra riba yega anto no con lihe mi ta yega. Anto e ora e aña aki sigur nos lo por yega na cero.”

You May Also Like

5P3A8267.jpg

Señora na grito pa caso di maltrato serio

Diahuebs marduga habitantenan di Sero Patrishi tabata scucha gritonan di yudansa ta sali for ...

Shelter FHMD yen, mester a nenga 10 refugio

Fundacion pa Hende Muhe den Dificultad mester a nenga algun persona (casi dies caso) ...

contrabanda .jpg

Caso grandi di contrabanda di placa den galiña mayan den corte

Diabierna awor Corte ta trata e caso cu aña pasa a hala hopi atencion ...

U di Aruba expansion.jpg

Universidad di Aruba ta evaluando plan di expansion den bisindario y via programa na distancia

E tipo di acuerdo cu Universidad di Aruba (UA) a firma cu Maastricht University ...

Richard Arends.jpg

Richard Arends ta bira minister di Economia y Comunicacion

Despues di un periodo di hopi speculacion, a wordo anuncia ayera cu Richard Arends ...

9Aug,JO, Jimmy'sPlace2.JPG

Homenahe na Gerard Heemskerk di Jimmy’s Place: ”Nos tabata un team”

Bon Dia a sinta combersa un rato cu presidente di Alfa Sr. Maikel Kelly ...