Si Aruba lo ta proximo pa conoce un baby boom producto di e temporada di Carnaval y cuarentena, esey ainda nos tin cu wak durante e lunanan di november te cu februari proximo.

Monique Giel Labad, kende ta encarga cu departamento di embaraso hubenil na Wit Gele Kruis (WGK), a bisa cu ainda nan no tin un bista te cu nan ta haya yiu. Loke nan tin registra ta masha tiki mes, pero pa luna di november, nan por haya un miho bista di e indice di nacemento producto di e carnaval baby. Pero prome nan tin cu bay den un combersacion pa determina si durante e carnaval e pareha a sali, bebe of haci uso di cierto substancia caminda bao influencia, e mucha muhe a sali na estado.

Pa e parti di cuarentena tampoco nan no tin un bista ainda. E temporada di cuarentena a cuminsa na luna di maart ora cu Covid a yega oficialmente Aruba, y gobierno a bin cu medidanan di shelter in place y toque de queda pa contene cu e virus por a sigui plama den nos comunidad. Pa e lunanan di januari pa februari nos lo wordo conoce cu e cuarentena baby. E ta e lunanan cu WGK por tin un miho, bista ora cu nan ta haya nan.

Sex sin interes

Giel Labad a bisa cu ainda nan no a haya niun melding for di e poblacion hubenil cu nan tin registra. Pero asina mes el a declara na Bon Dia Aruba cu prome mester haci investigacion y combersa cu e pareha cu a haya baby den e lunanan menciona. Asina nan por wak si durante e cuarentena berdad el a bira un temporada cu nan tabata nan so of posiblemente cu hopi hende. Of si durante e temporada di cuarentena a presenta abuso of si nan a bebe, ya cu durante e temporada ey, hopi hende a haci uso di alcohol.

Considerando cu tin algun di nan registra den nan sistema pa monitor con nan ta y pa nan sa si nan ta den necesidad durante e pandemia, WGK a yega di encuesta nan entre otro riba e punto di sexualidad. Por ehempel, si nan ta haci mas sex cu loke nan ta haci normal, pasobra nan no tin nada di haci.

Segun Giel Labad, algun di nan consulta a bisa cu e parti di acto sexual no tabata un prioridad pa nan durante cuarentena. Al contrario, door di nan stress y tur e problemanan di necesidad cu hopi hende ta pasando aden, ta pone cu nan no tin interes pa tene relacion intimo.

Tin algun di nan consulta cu a bisa cu nan tin lunanan sin haci nada. Un 50% di nan a confronta hopi e situacion aki di falta di sex durante e periodo di pandemia. E poblacion aki ta entre 12 pa 19 aña, e target mas vulnerabel, ya cu nan no ta bayendo scol, ademas nan ta cay den un edad hopi activo sexualmente. Nan ta menor di edad of basta jong, pero gran parti di nan ya caba ta biba cu e gay den cas of e gay ta bin cerca nan.

Pues e expectativa cu nan ta bay tin mas relacion sexual, mirando cu nan tabatin mas tempo cu otro durante e cuarentena, ya cu nan no a bay traha of nan no a bay scol, no ta algo confiabel.

Segun Giel Labad, gran parti di e poblacion hubenil cu nan tin registra y cu nan ta realisa bishita den nan cas, ta indica cu na no ta sinti libido of smaak den haci sex. Pasobra e problemanan ta mas grandi ariba nan deseo sexual. Nan tin cu resolve problema economico y financiero den cas.

El a splica cu na Aruba nos tin hopi situacion caminda hopi hende ta biba cu otro. Algun di nan a keda desemplea debi na Covid crisis y esaki ta un factor di stress y conflicto, pasobra placa no ta yega. E factor aki ta esun mas pisa cu ta hunga un rol, ora cu e pareha ta desea di tin un rato di intimidad cu otro. “Nan no tin gana pasobra e problema ta mas grandi,” el a bisa.