Team di abogado di Paul Croes preparando caso di apelacion fuerte

ORANJESTAD – Ex minister Paul Croes a cuminsa encamina su apelacion riba e sentencia di 4 aña di prizon, cu el a haya for di un hues di prome instancia, relaciona cu e caso Ibis.

Croes ta reitera cu e tin un ‘consenshi limpi.’

Croes ta haya insolito e sentencia cu hues a dun’e. Manera el a yega di bisa caba, cu su persona como politico no a haci nada cu otro politico no a haci den tempo di campaña. Esta pa medio di un carta of un fundacion acerca companianan comercial pa haci donacion na e campaña politico. “Acerca un compania pa dos caha di cerbes. Acerca un compania pa kisas un wea di sopi…” el a agrega.

Sentencia
Unabes cu a wordo conoci e sentencia di 4 aña, Croes a vocifera su desacuerdo cu esaki y a dicidi di apela contra dje. Ayera mainta, despues cu el a sali for di edificio di corte, Croes a declara na Bon Dia Aruba cu e proceso di apelacion ta canando den e laso di dos siman, despues di e sentencia conoci.

Croes ta haya cu e tin mas condena riba su cabes cu un ex premier di Corsou envolvi den un caso miyonario. E ta haya cu su caso ta di sumanan sin importancia. Apenas di cahanan di cerbes y algun donacion di mil florin of 1.500 florin, mientras su sentencia si ta mas pisa. “Mi pregunta ta e ora: Unda husticia a keda?,” el a bisa.

Pa abogadonan cu a sigui e caso aki di cerca, e sentencia di 4 aña cu el a haya ta incomprendibel, Croes a bisa na e matutino aki. Te hasta personanan cu a haci delito hopi mas grave cu menos den nos comunidad, y maltrato contra hende muhe, te hasta morto den cierto casonan, no tabatin un castigo of peticion pa castigo asina halto.

Preparando pa Hoge Beroep
Nan ta preparando pa Hoge Beroep di un forma fuerte. Tambe el a indica cu nan ta ‘firme y para cu hopi fe’ cu e proceso nobo y eventualmente largo cu a cuminsa cana dilanti e instancia aki. Den Hoge Beroep, e caso lo wordo trata dilanti di tres hues, caminda talbes cierto politiconan lo wordo yama como testigo, pa motibo cu ta interesa pa sa con nan a haci pa colecta fondo pa nan campaña. Specialmente esunnan cu a tilde di corupto. E ta spera cu finalmente husticia por prevalece den su caso.

Cuater aña di prizon ta un sentencia sorprendente p’e y pa su famia, pero tambe pa e team di abogado cu a defende su caso. E ta haya cu mientras otro personanan a wordo laga liber, y otronan a haya algun ora di servicio comunitario, su persona ta ‘wordo colga pa 4 aña’.

E ta cuminsa e fase di apelacion aki cu e mesun team di abogado cu a defende su persona den prome instancia. Nan no a evalua cambio den e team di abogado aki. Esaki a pesar cu el a wordo acerca door di diferente bureau di abogado cu ta amigo di dje.

Caso costoso
E caso Ibis a costa nos pueblo mas cu 2 miyon florin den investigacion. Segun Croes, Ministerio Publico (OM) mes no ta interesa riba e suma aki, ya cu no ta nan placa, sino placa di pueblo cu a wordo hinca den e investigacion aki.

Nan ta preparando tur e detayenan, ya cu –el a splica– cu den e tratamento di e caso aki tabatin e declaracion contradictorio di dos persona dilanti di hues, y riba papel tambe. Personanan cu tin un pasado hudicial y cu tin condena riba nan. Pues e ta haya cu su persona ta wordo ‘colga’ pa dos persona den un caso, caminda mas cu 400 compania tabata envolvi. Practicamente e ta haya cu tur compania na Aruba tabata envolvi. Pero keto bay nan a wordo declara liber, sin cu nan mester yega corte. Na final, a yega corte cu 23 compania sospechoso, di cual 15 compania a haya sentencia, di cual 5 di nan a haya vrijspraak of multa, tambe algun di esunnan envolvi a haya trabou comunitario, pero el a haya e castigo mas pisa.

E hoben ex politico ta considera cu finalmente ta e huicio di pueblo ta esun importa tambe p’e. No solamente e huicio den corte, pero tambe pa pueblo compronde e embergadura di e caso aki.

 

 

You May Also Like

zkotdynde6dbncpkt5kxagtc-gyepvrz-large.jpg

Accion terorista a sorprende consul di Francia na Aruba celebrando nan dia nacional

Consul honorario di Francia na Aruba, sr. Christian Mongellaz tabatin un dinner organisa pa ...

Porta blokia (NW) (3).JPG

Brandweer ta controlando porta di emergencia di salida

Edificionan cu tin un porta di emergencia no mag di blokia esaki. E departamento ...

referendum aruparking y web.jpg

Trahadonan di Aruparking lo participa tempran den referendum dialuna awor

Mediador di Gobierno, Sr. Anselmo Pontilius a declara na Bon Dia Aruba cu trahadonan ...

food label 1.jpg

Compronde label di producto, scoge locual realmente ta saludabel

Pa bo haci e cambio di estilo di bida y cuminsa scoge productonan mas saludabel pa come, ...

Aruba y Corsou lo dicidi operador y construccion di terminal di fast ferry

Despues di firma di MoU, entre 6 pa 8 luna Diabierna atardi gobierno di ...

IOWUA situacion trahado valero.JPG

Presidente di IOWUA, Boy Anthony: “Nos no a firma nada”

Presidente di IOWUA, Boy Anthony a bisa cu e no a firma nada ainda ...