Companianan di cobamento a protesta pa exigi un solucion di gobierno

ORANJESTAD – Ayera mainta, chauffeurnan di trucknan y chubato di 54 compania di cobamento na Aruba a haci un welga dilanti di Bestuurskantoor y blokia e caminda, pa motibo cu nan a haya molestia y preocupacion pa via di e decision cu gobierno a tuma pa loke ta trata e cobamento di granito y santo.

E protesta a bin despues cu siman pasa na rednan social a sali un video unda un compania di cobamento tabata saca tur e santo of granito den diferente buraconan rond di e isla. Hopi di e companianan of contratista mester a para nan trabou pa motibo cu nan tabata operando sin permiso.

Durante e protesta aki, algun trahado di e companianan a logra un reunion cu minister di Infrastructura y Medio Ambiente, Otmar Oduber, y minister di Husticia, Andin Bikker pa por haya algun solucion pa e problema cu ta afecta nan trabou.

Despues di e reunion, sr. De Sousa, cu ta e representante di e trahadonan di e 54 compania di cobamento, a duna di conoce den su declaracion cu un grupo di seis persona, cu ta envolvi den e manifiesto, a bisa cu nan a yega den un acuerdo hunto cu Oduber pa nan por aplica pa un permiso na e momentonan aki, pa nan por cuminsa traha mientras na un periodo transitorio e minister lo bay sinta cu nan tambe pa un dialogo social.

Di e manera aki, De Sousa a comenta cu nan a papia di con nan lo por yega na un acuerdo cu e companianan di cobamento y e ministerio pa por sigui traha hunto pa mantene e naturalesa y asina tambe no perhudica nan trabou.

De Sousa a expresa cu diabierna pasa, gobierno a manda varios departamento, entre nan polis, Bureau City Inspector, DTI, pa cera su luganan pa motibo cu nan tabata cobando, segun De Sousa, pa e cunucunan cu nan tin desde basta tempo pasa. Door di esey el a expresa cu varios di e companianan no tabatin conocemento di loke nan tabata haci.

De Sousa a bisa cu Oduber a duna un splicacion di kico ta e proceso cu nan mester haci, tambe a agrega cu esaki ‘ta algo bon pa Aruba pa motibo cu mester sigui traha cas, ta material di Aruba e ta, e hende ta trece material di afo cu ta hibando placa pa otro pais, awo nos ta den condicion cu nos mester mantene e placa di cas’.

El a anuncia cu proximo siman lo tin otro reunion cu gobierno. Tambe lo cuminsa haci e proceso pa haya e Landsverordening, un proceso cu desde luna di januari a cuminsa caba, pero hopi di nan no tabata sa.

Banda di rosamento tin e aspecto di cobamento di santo/piedra y otro materialnan for di superficie, pa cual tambe ta exigi pa tin un aanlegvergunning.

Oduber durante su conferencia di prensa a splica cu luna di december pasa, a publica un landsbesluit firma pa Gobernador di Aruba pa loke ta trata e rekisitonan pa por haya un aanlegvergunning, cu ta sucede a traves di Ordenansa Nacional pa Desaroyo Espacial / Landsverordening Ruimtelijk Ontwikkeling (LRO), cu tin su maneho hancra pa loke ta trata ROP.

E ley ey ta exigi cu tur hende cu ta rosa un tereno cu tin mas di 750 meter cuadra cu ta exigi di nan parti aanlegvergunning, pa di e forma ey por haya e permiso necesario pa haci rosamento y muy particularmente e parti di e preservacion di medio ambiente.

Oduber a expresa cu diabierna pasa, un comision cu diferente departamento di gobierno, despues cu e decision a wordo formalisa y publica pa nan haci e prome control, nuebe companianan cu den e momentonan aki ta coba santo of kibra piedra a wordo bishita. E resultado ta cu 3 compania a haci un peticion di aanlegvergunning, y despues cu nan a bishita e companianan aki, tambe tin dos cu a haci un peticion di esey, den total 5 tin un aanlegvergunning pidi na DIP.

Oduber a duna di conoce cu ayera mainta a reuni cu diferente contratistanan y doñonan di diferente terenonan cu ta haci cobamento, y el a expresa cu e reunion a resulta hopi positivo pa ambos banda. Hopi tabatin di haber cu comunicacion y informacion cu no a yega cerca su grupo, pa locual nan tur a compromete pa haci un peticion, manera ley ta prescribi.

Tambe Oduber a sigura cu tabata existi un diferencia grandi cu esunnan cu ayera mainta a bishita Bestuurskantoor pa via di preocupacion y molestia. El a bisa cu 90% di nan ta doñonan di propiedad unda ta transporta santo y piedranan, y no necesariamente e 10% cu ta obliga di pidi un aanlegvergunning pa por haci e trabou di cobamento rond Aruba.

Oduber a señala cu e cifra segun DNM ta existi 31 sitio cu cobamento no por tabata tuma luga, nan a calcula cu mas o menos 60 % di nan ta activo.

Di mesun manera minister Oduber a bisa cu no ta solamente un aanlegvergunning ta wordo exigi de caso cu ta coba santo of cu tin molestia pa comunidad. Si e companianan ta causa molestia den comunidad, nan mester di un hindervergunning cu no ta unicamente pa kibra piedra, sino tambe molester di stof, santo of zonido di e trucknan por exigi un hindervergunning, pa cual nan sa cu tur organisacionnan den ultimo aña a lanta para y mustra no solamente e destruccion di e luga, pero tambe e molestia pa e comunidad.

 

You May Also Like

Bishita di Su Mahestad Prinses Beatrix

Diabierna mainta Su Mahestad Reina Beatrix a bishita tanto Bubali Plas como Spaans Lagoen ...

CBS: Casi 16% di tur hogar ta pober

Pa Aruba e calculo di e indice ta mustra – Aruba Multidimensional Poverty Index ...

Raiz ta duna prome minister 48 ora pa contesta LOB riba boramento

Di dos LOB riba conseho DNM menos urgente E partido cu ta bogando pa ...

Taray cerando rond di Paul Croes

Gobierno faltando opcion creibel Cu aresto ayera di secretaria di ministro Paul Croes, ta ...

auto cu curpa kima na Rooi Frances

Curpa haya kima den auto na Franse pas

Update: e curpa ta di un hende homber y husticia a dicidi di mand’e ...

Green Corridor

‘Proyecto di Green Coridor ta sumamente grandi y ta avansando’

Manera ta conoci e proyecto di Green Coridor lo bin y por mira cu ...