40 inmigrante cu destino pa Europa a disparce y ta teme cu nan lo a hoga despues cu e boto den cual nan tabata biaha a bolter den e lama Mediteraneo dilanti di Libia, segun Warda Costa y agencia di refugiado.
Ayoub Gassim, Vocero di Warda Costa a bisa cu a rescata un 65 inmigrante, mayoria di Sudan. Operacion di buskeda pa esunnan cu ta desapareci ainda a para.
Charlie Yaxley, Vocero di agencia di refugiado a bisa cu tin mas o menos 40 persona morto of desapareci. Alarm Phone, un grupo di sosten independiente pa hende cu ta crusa Mediteraneo, a bisa cu tabatin 100 migrante abordo di e boto.
E grupo a bisa cu hende den e boto tabata alarma, yorando y gritando cu tabatin hende morto. Libia a bira un conducto importante pa migrante y refugiado di Africa cu ta huy pa Europa despues di morto di Moammar Gadhafi na 2011. Traficante y grupo arma ta explota e caos na Libia.
Ultimo aña, Union Europeo a asocia cu warda costa y otro grupo di Libia pa evita migrante haci e biahe peligroso na lama pa Europa. E agencia di refugiado a bisa cu tin 164 migrante cu e fayece pa motibo di biaha for di Libia pa Europa e aña aki.
Nan ta bisa cu e biahe ta birando mas peligroso pa esunnan cu ta purba di bay. E cifra no ta inclui e 150 migrante cu destino pa Europa cu a disparce y ta kere nan a hoga ora nan boto tambe a lora den lama dilanti Libia, luna pasa.
