E temporada Atlantico di horcan pa 2026 oficialmente a cuminsa riba dia 1 di juni, marcando e comienso di un periodo di 6 luna durante cual e islanan den Caribe ta keda den alerta pa tormentanan tropical y horcan.
E temporada ta core te cu dia 30 di november y ta afecta henter e region Caribe, incluyendo e islanan ABC ademas di islanan BES y Sint Maarten.
Mientras cu e temporada oficial ta core e 6 lunanan aki, expertonan di meteorologia ta enfatisa cu e periodo mas activo tipicamente ta tuma luga entre augustus y october, ora cu e temperaturanan na lama ta na su nivel mas caluroso y condicionnan ta mas faborable pa desaroyo di tormenta.
Aunke e islanan den parti Sur di Caribe generalmente ta enfrenta un riesgo mas abao di impacto directo di horcan, esaki no ta nifica cu nos no mester presta atencion na esaki.
Aunke e chens pa un horcan of tormenta yega tera na Aruba, e isla por experiencia efectonan indirecto. Autoridadnan semper ta enfatisa cu preparacion ta keda un di e maneranan mas efectivo pa reduci e impacto di eventonan di tempo severo.
Ademas, ya caba expertonan ta advertiendo cu un El Niño – cual ta un fenomeno di tempo – potencialmente poderoso por desaroya mas adelante durante e aña y te hasta sigui te 2027, cual ta trece tambe un impacto significante pa region Caribe.
Segun World Meteorological Organization (WMO) y institutonan di clima regional, e probabilidad cu El Niño lo desaroya ta aproximadamente 90%. Modelonan di clima actual ta sugeri cu e temperaturanan na partinan di e Oceano Pafico por aumenta te hasta 3 grado Celsius riba e normalidad, y esaki ta un indicacion cu e evento por bira particularmente fuerte.
El Niño ta sucede ora awa na Oceano Pacifico central y este ta bira inusualmente cayente. E fenomeno ta afecta patronchi di tempo global y hopi biaha ta asocia cu eventonan di tempo extremo na diferente parti di mundo.
Pa e islanan den Caribe, e preocupacion mas grandi ta bira e prospecto di temperaturanan halto, condicionnan di secura prolonga y e presion cu lo aumenta riba recursonan di awa.
Expertonan di KNMI ta describi e situacion como un scenario di “multi-hazard,” den cual calor extremo, escasez di awa y stress ambiental ta reforsa otro. E condicionnan aki por afecta agricultura, produccion di energia, seguridad di cuminda y te hasta salud publico den henter e region.
Nos a yega di menciona den pasado cu cambio di clima ta causando caba cambionan cu expertonan ta considerando y investigando, manera e ampliacion di e hurricane belt y aumento den categoria di horcan. Esakinan ta cambio cu ta sigui inminente den nos futuro cercano mirando cu te ainda no tin cambio grandi of drastico den maneho pa cu cambio di clima.
Segun expertonan meteorologico na nos isla ruman Corsou, riba ken Aruba ta conta pa colaboracion den varios diferente parti di meteorologia, e necesidad pa un bon preparacion ta algo sumamente critico y importante.
Un percepcion cu varios por tin ta cu solamente si e horcan bin cerca e por causa daño, sinembargo e rango di daño cu un horcan por causa ta uno amplio. Cu solamente un tormenta, e por ta un temporada activo pero tambe posiblemente devastador pa bo pais o simplemente bario.
Aunke ta papia di temporada di horcan, hasta e tormentanan cu no necesariamente bira un horcan, por converti den inundacion mortal y expertonan ta bisa cu e peligro relaciona cu awa ta causa e cantidad mas grandi di morto relaciona cu horcan.
Un tempo atras Bon Dia Aruba tabatin e placer di papia cu Sr. Rodney Tromp, ken ta un experto den meteorologia, y su palabranan un biaha mas ta bira relevante e importante pa tene bon na cuenta. El a comparti cu “nos no mester di e horcan directo pa e haci daño. Nos sa caba cu hopi awasero por causa daño, cu e por bin cu strena y lamper, y tur esaki ta haci daño dependiendo di su nivel. Ta importante pa nos ta consciente di esaki y ta prepara.”
Un di e consehonan clave cu el a duna ta di keda pendiente na e servicionan meteorologico local ademas di National Hurricane Center. Aunke rednan social te ainda ta sigui, y awo mas ainda, un canal unda nos ta consumi hopi informacion y noticia tocante tur topico incluyendo tempo, ta importante pa tene cuenta cu hopi biaha nos por topa cu un falta di profesionalismo y reportahe cu na luga di brinda informacion of trankilidad, por causa panico innecesario. Pa e motibo aki semper ta un miho opcion pa keda pendiente na e autoridadnan concerni y verifica tur informacion cu nos mira of tende na nan canal oficial.
Mester pone un enfasis sumamente grandi riba un di e expresionnan di Sr. Tromp e tempo aki, cual tabata “It only takes one storm to make it a bad season” y esaki ta nifica den otro palabra cu solamente 1 tormenta ta suficiente pa converti esaki den un mal temporada, y manera a splica anteriormente, esaki no necesariamente ta nifica un impacto directo. Tin varios otro manera cu e temporada di horcan por laga daño atras, y pa e motibo aki ta keda di gran importancia pa keda informa y mantene nos mes prepara pa cualkier eventualidad cu por tuma luga.
E impacto cu inundacion y hasta biento por tin ta hopi mas facil y probable di ser sinti tanto cerca como leu di lama, y e impacto por ta uno serio cu sea horcan of tormenta tropical por causa. Ademas, cientificonan ta bisa cu cambio di clima ta nifica cu e tormentanan ta treciendo mas awa, yobida y daño mas leu di e costa.
Director di NOAA su National Hurricane Center a bisa na un conferencia di prensa cu specialmente den areanan unda inundacion sa tuma luga cu frecuencia, ta importante pa tin e preparacion y comprension cu inundacion di awa fresco ta un fuente significante di perdida den añanan recien.
Tur esaki ta ilustra cu preparacion ta keda e clave pa por mantene nos mes y nos sernan keri safe di cualkier impacto negativo sea directo of indirecto.
Pa preparacion di emergencia, un plan di evacuacion ta importante. Sea cu un evacuacion ta algo cu bo ta considera probable of no, preparacion ta algo clave den bista di cualkier sucedido repentino. Como parti di e preparacion, den caso cu si bo ta haya bo mes den e situacion unda bo tin cu evacua, e ta util pa tin un ruta di evacuacion planea for di trempan, pa motibo cu esaki por ta algo crucial den yega na seguridad, claramente semper involucrando nos mascotanan den nos plan di preparacion.
Otro punto cu por ta di gran importancia, ta fortalece nos cas y manten’e limpi. Mantene e matanan cerca di nos cas corta pa asina preveni daño for di takinan cu kibra of bula den caso di biento fuerte.
Tambe ta util pa sigura cu nos tin e materialnan necesario den caso cu repentinamente nos ta haya nos mes den un situacion unda mester fortalece nos bentananan y proteha nan for di cualkier cos cu por ta bulando pafo.
Cu e velocidad cu biento por yega den consideracion, ta importante pa drenta of warda tur loke por ta los den nos patio, pa motibo cu esaki no solamente por ta un peligro pa nos propio cas, sino tambe pa algun otro cas den bisindario en general.
Ta conseha pa mantene un kit di suministro di emergencia, revisa tur plan di emergencia familiar, sigura tur documento importante y keda informa via comunicacionnan di gobierno y pronosticonan oficial di tempo.
Medidanan di preparacion pa emergencia por ta specialmente importante ora cu e sistemanan tropical desaroya rapidamente of cambia di curso inesperadamente, cual ora nos ta lidia cu naturalesa, ta 100% algo cu por sucede.
Un parti preparacion ta den man di autoridadnan, ken mester tuma e medidanan necesario na nivel nacional, pero di otro banda, preparacion tambe ta den nos man, y hunto cune, e seguridad di tanto nos sernan keri como esun di nos mes.
