Confiansa di consumidor na Aruba ta mehora, pero preocupacion tocante prijs y economia ta persisti

E nivel di confiansa entre consumidornan na Aruba a mustra un mehoracion durante e di cuatro kwartaal di 2025, segun e ultimo “Consumer Confidence Survey” (Encuesta di Confiansa di Consumidor) publica pa Centrale Bank van Aruba (CBA). Aunke e resultado ta indica cu ciudadanonan ta sinti nan mes un poco mas positivo cu den e kwartaal anterior, hopi hogar ainda ta enfrenta preocupacionnan serio tocante costo di bida, futuro economico y nan poder di compra.

Segun e rapport, e “Consumer Confidence Index” a subi cu 3,6 punto te na 96,4 den e di cuatro kwartaal di 2025. Esaki ta representa e resultado mas halto registra durante aña, pero e indice ainda ta keda bao di e marca neutral di 100. Segun e metodologia di CBA, un resultado bao di 100 ta indica cu sentimento general di consumidornan ta sigui relativamente pesimista, mientras cu un indice riba di 100 ta refleha optimismo.

E encuesta ta ser realisa regularmente pa CBA pa evalua con consumidornan ta percibi e estado actual di economia y con nan ta mira e futuro. E resultadonan di e ultimo kwartaal ta mustra cu, a pesar cu ainda tin cierto incertidumbre, hopi consumidor a bira menos negativo compara cu e kwartaal anterior.

Un di e indicadornan cu mas a contribui na e mehoracion ta e “Consumption Habits Index”, cu a registra un subida di 4,2 punto pa yega 97,7. E indice aki ta midi e disposicion di consumidornan pa gasta placa y haci decisionnan financiero importante. Na mesun momento, tanto e “Present Situation Index” como e “Future Expectation Index” a subi te na 96.3, indicando cu e evaluacion di e situacion actual y e expectativa pa futuro a mehora durante e periodo studia.

E unico indice cu a mustra solamente un mehoracion modesto tabata e “Price Expectation Index”, cu a subi un poco te na 90,4. Esaki ta confirma cu inflacion y subida di prijsnan a keda un di e preocupacionnan principal entre consumidornan.

E encuesta ta mustra cu 88% di e encuestadonan ta spera cu prijsnan lo sigui subi durante e proximo seis luna. Aunke esaki ta dos punto di porcentahe menos cu den e kwartaal anterior, e cifra ta keda extraordinariamente halto. E resultado ta confirma cu mayoria di consumidor ainda no ta convenci cu presion inflacionario a desaparece completamente.

Durante henter 2025, e preocupacion tocante prijsnan a keda na nivelnan halto. Den e prome kwartaal, 94% di consumidornan tabata anticipa cu prijsnan lo subi. E porcentahe aki a baha gradualmente pa 91% den e di dos kwartaal, 90% den e di tres kwartaal y finalmente 88% den e di cuatro kwartaal. Aunke e tendencia ta positivo, e cifra ta sigui indica cu casi nuebe di cada dies consumidor ta anticipa costo di bida mas halto.

Otro tema importante cu a sali for di e encuesta ta poder di compra. Un total di 80% di e encuestadonan a declara cu nan no por cumpra mesun cantidad di producto y servicio cu nan ingreso actual compara cu seis luna pasa. Aunke e cifra aki ta keda halto, e resultado ta representa un mehoracion considerable compara cu e di tres kwartaal, ora cu 93% di e consumidornan a reporta cu nan poder di compra tabata a deteriora.

Ademas, e porcentahe di personanan cu a indica cu nan por cumpra mesun cantidad di producto of servicio cu seis luna pasa a aumenta significantemente. Mientras cu solamente 6% tabata di e opinion ey den e di tres kwartaal, e cifra aki a crece te na 15% den e ultimo kwartaal di 2025. E resultado ta sugeri cu algun consumidor ta cuminsa sinti un poco mas stabilidad den nan situacion financiero.

Comportacion di spaar tambe a registra algun mehoracion. CBA a haya cu e porcentahe di persona cu ta logra spaar mesun cantidad di placa a aumenta notablemente. Un total di 37% di e encuestadonan a indica cu nan nivel di spaar a keda mescos, compara cu solamente 18% den e kwartaal anterior.

Na mesun momento, e grupo cu a declara cu nan ta spaar menos a baha te na 32%. CBA a observa tambe un reduccion den e cantidad di persona cu no ta spaar nada. E porcentahe aki a baha te na 21% den e ultimo kwartaal. E evolucion aki ta apunta na un cierto fortalecemento di posicion financiero familiar, aunke presion di prijsnan ta keda presente.

Percepcion tocante e economia nacional tambe a mustra señalnan positivo. E encuesta ta indica cu menos consumidor ta considera cu condicionnan economico a empeora compara cu e situacion registra anteriormente den aña. E porcentahe di encuestadonan cu a expresa cu condicionnan economico y comercial a deteriora durante e ultimo seis luna a baha drasticamente di 72% te na 49%.

Aunke casi mitar di e encuestadonan ainda ta percibi un deterioracion economico, e reduccion significativo den e porcentahe ta representa un cambio importante den sentimento general.

Mirando pa futuro, consumidornan tambe ta mustra un perspectiva menos negativo. Solamente 36% di encuestadonan ta spera cu condicionnan economico lo empeora durante e siguiente seis luna. Den e kwartaal anterior e cifra aki tabata 56%. Esaki ta un di e mehoracionnan mas fuerte registra den e encuesta.

Mercado laboral tambe a mustra algun señal di optimismo. Cerca di 34% di encuestadonan a indica cu actualmente ta mas dificil pa haya trabao compara cu seis luna pasa. Sinembargo, solamente 32% ta spera cu e situacion laboral lo empeora durante e siguiente seis luna. E resultado ta significativamente miho cu e 42% registra den e kwartaal anterior.

Pa loke ta trata finanzas publico, e encuesta ta revela cu preocupacionnan tocante e posicion financiero di gobierno tambe a disminui. Un total di 25% di encuestadonan ta considera cu e posicion financiero di gobierno a empeora compara cu seis luna pasa. Mirando pa futuro, 31% ta spera cu e situacion lo deteriora. Ambos resultado ta mas faborable cu esnan registra den e di tres kwartaal.

A pesar di e mehoracion general den confiansa, consumidornan ta keda cauteloso ora ta trata di haci gastonan grandi of asumi compromiso financiero nobo.

Mas cu mitar di encuestadonan, of 54%, a indica cu actualmente no ta un momento adecua pa saca un hipoteca. Igualmente, 47% a considera cu no ta conveniente pa saca un prestamo personal.

Tambe tin cierto reserva tocante compranan grandi. Cerca di 40% di e consumidornan ta considera cu no ta un bon momento pa cumpra un auto. Kedando den mesun liña, 31% ta opina cu no ta conveniente pa adkiri electrodomesticonan grandi pa cas.

Incluso gastonan relaciona cu recreacion ta mustra cierto cautela. Un total di 29% di encuestadonan a expresa cu nan no ta considera e momento actual como adecua pa bay cu vakantie.

Segun observadornan economico, e actitud cauteloso aki ta consistente cu un ambiente unda consumidornan ta mira algun mehoracion den e economia, pero ainda no ta sinti suficiente seguridad pa aumenta significativamente nan gastonan of debe.

E encuesta tambe a analisa e forma con ciudadanonan ta maneha nan actividad di banco. E resultadonan ta confirma cu digitalisacion di servicionan financiero ta sigui avansa rapidamente na Aruba.

Aplicacionnan di banco riba telefon a keda e canal mas popular entre consumidornan. Un total di 83% di encuestadonan a indica cu nan ta usa aplicacionnan di telefon regularmente pa haci transaccionnan bancario. E cifra aki ta mas halto cu e 71% registra den e kwartaal anterior.

Uso frecuente di online banking tambe a registra crecemento. E porcentahe di usuario cu ta usa online banking regularmente a aumenta te na 63%.

Di otro banda, uso frecuente di ATM y debit card a registra un reduccion chikito, te na 56%. E dato cu posiblemente mas sobresali ta cu 54% di encuestadonan a indica cu nunca nan ta bishita un sucursal di banco.

E tendencia aki ta refleha e transformacion continuo di sector financiero local, caminda cada bes mas consumidor ta prefera solucionnan digital pa maneha nan cuenta di banco y transaccionnan diario.

Den termino general, e “Consumer Confidence Survey” pa e di cuater kwartaal di 2025 ta presenta un panorama mas positivo durante gran parti di e aña. Consumidornan ta menos preocupa cu deterioracion economico, cu oportunidadnan laboral y cu estado di finanzas publico. Sinembargo, inflacion, prijsnan halto y preocupacionnan tocante poder di compra ta keda un factor importante cu ta limita optimismo.

E resultado final ta sugeri cu confiansa di consumidor na Aruba ta move den direccion positivo, pero cu hopi hogar ainda ta mantene un actitud cauteloso den nan decisionnan financiero.