(NLTimes) – Cantante Anouk a anuncia cu e no ta bay ta un coach mas na The Voice of Holland, despues di acusacionnan di mal conducta sexual y abuso di poder contra coach Ali B y lider di banda Jeroen Rietbergen. Compania di telecomunicacion, T-Mobile a anuncia cu a stop di patrocina e programa di television.

Diasabra ultimo, RTL a anuncia cu The Voice of Holland no ta bay keda transmiti pa awo pa motibo di reportenan di comportamento sexualmente transgresivo y abuso di poder. Rietbergen a reconoce cu e tabatin relacionnan ‘di caracter sexual’ cu muhenan involucra den The Voice of Holland.

Ademas, Linda de Mol a termina su relacion cu Rietbergen, y a stop su trabao por lo pronto. “Mi ta den un pesadiya teribel pa algun dia caba”, el a skirbi riba website di su revista LINDA. “Asina hopi cos a bin dilanti cu mi no tabata sa, y cu, pasobra nan ta anonimo, mi no tabata sa kico ta berdad of no.” El a skirbi cu Rietbergen no ta biba cune mas y a pidi tur hende pa laga su famia na paz. De Mol y Rietbergen a cuminsa nan relacion na 2007.

“Ta djis un gang corupto”, Anouk a bisa den un video riba Instagram. “Mi no kier traha unda varios homber a abusa di nan posicion durante añas y unda intencionalmente a scoge pa keda keto y mira otro banda. Esey ta realmente inaceptable.”

Anouk tabata coach riba The Voice of Holland y The Voice Kids pa varios aña. Hunto cu Ali B, Glenis Grace y Waylon, el a forma e team di coachnan e temporada aki.

RTL y productor ITV a lansa un investigacion independiente riba e acusacionnan. E tema ta bay keda discuti extensamente den e programa BOOS di Tim Hofman diahuebs. Tambe ta bay discuti coach Ali B. Diamars siman pasa a entrega un keho contra dje, segun reportenan, di un ex-candidato. Ministerio Publico mester evalua e keho contra Ali B y dicidi si mester investiga. Un vocero di OM no por a pronostica con largo esaki ta bay dura. No a entrega mas reporte contra e rapper di 40 aña di edad. E ta rechasa tur acusacion.

Cadena di supermercado Lidl, cu ta pone aviso den e programa, temporalmente a suspende su patrocinio. Un vocero pa e supermercado a bisa cu e patrocinio a termina automaticamente na momento cu a suspende e programa.

Partido CDA a haci un yamado pa miho proteccion pa participantenan di show di talento contra abuso di poder. Parlamentario Lucille Wener a puntra Secretario di Estado Gunay Uslu kico ta e acuerdonan actual cu participantenan di The Voice of Holland y con por mehora esakinan. “Tur participande den un programa di television mester por sinti safe”, Werner a bisa riba Twitter. “Abuso di poder y comportamento sexualmente transgresivo ta inaceptable, y señalnan di esaki mester keda investiga profundamente.”

E kier sa for di Uslu na ki grado e ministerio di Edcuacion, Cultura y Ciencia a keda informa tocante e acusacionnan na The Voice. Werner tambe kier clarificacion si tin suficiente espacio pa candidatonan reporta comportamento transgresivo y con ta monitor relacionnan laboral desigual.

LEAVE A REPLY

Please enter your comment!
Please enter your name here