(AP) – Grecia a impone e mandato di vacunacion pa personanan di 60 aña bay ariba mirando cu un aumento di infeccionnan a pone mas presion riba hospitalnan di Grecia, unda cu mayoria di e pashentnan seriamente malo ta den e grupo aki.

Personanan di edad mas avansa cu no ricibi nan vacuna lo enfrenta boet, cuminsando na un boet di 57 euro na januari, y un boet pa luna di 100 euro despues di esaki.

Mas o menos 69 porciento di Grecia su poblacion di 10.7 miyon persona ta completamente vacuna, husto bao di e averahe Europeo di 70.3 porciento. Mortonan relaciona cu COVID-19 y hospitalisacionnan diario a aumenta despues cu e variante Omicron a plama den e pais, aunke cu e mayoria di e personanan den hospital of fayeciendo tin e variante Delta. Presion riba e capacidad di ICU tambe a relaha un poco.

Minister di Salud Thanos Plevris a bisa cu e boetnan aki lo ser colecta pa medio di e oficina di impuesto, y cu e placa aki lo ser inverti den hospitalnan di estado.

“E factor di edad ta importante pa causa di su impacto riba e servicio di salud publico,” Plevris a conta Private Open Tv riba diadomingo.

Grecia a impone e mandato di vacunacion pa empleadonan di cuido di salud aña pasa. Y cuminsando for di dia 1 di februari e certificadonan di vacuna lo caduca despues di 7 luna si e persona no ricibi un booster shot.

Infeccionnan nobo a aumenta drasticamente den januari pero a calma durante e siman aki.

E mandato di vacunacion pa e personanan di 60 aña bay ariba a ser anuncia den december aña pasa, y segun e data di gobierno, 41.5 porciento di e 530,000 persona cu lo a ser afecta pa e medida awo ta completamente vacuna.

LEAVE A REPLY

Please enter your comment!
Please enter your name here