Tur empleado di Tiara Air, tambe esunnan cu a haya of tuma nan retiro pa basta tempo caba, lo cuminsa ricibi pago fin di luna (30 april). Esaki director Alejandro Muyale a confirma na Bon Dia 24.
E compania di avion tin mas of menos 1 miyon florin cu ta debe na salario y otro pago di personal.
Riba e pregunta si e aerolinea tin e placa pa por paga, sr. Muyale ta contesta: “Esey ta e afspraak (dilanti hues, december 2015) cu mester paga fin di luna, si tin cen of no tin cen. Tin un afspraak riba mesa y nos intencion ta pa cumpli cu e afspraak.”
Te ainda e aerolinea no a haya tur e placa for di Venezuela. Mas o menos 19 miyon florin ainda ta pega y segun e director no tin bista riba ki dia lo hay’e. “E situacion eynan ta hopi dificil, cu e prijs di petroleo abou.” Asina e pais Sur Mericano no tin suficiente divisa ( entre otro dollars) y gobierno a pone un restriccion. Tin hopi compania internacional cu ta wardando riba nan placa.
E storia completo por haya den e edicion di Bon Dia Aruba mañan.
