Tiara Air Alejandro Muyale

Mayoria di e 151 creditor a aproba e plan di Tiara Air diabierna den corte pe aerolinea por continua. E compania di aviacion tin un debe di 18 miyon florin. E plan ta encera cu lo contra riba e placa cu ta pega na Venezuela (cerca autoridad di divisa) ainda. Pero e compania tambe lo cuminsa cu vuelonan entre otra 2x pa siman pa Corsou.

E cantidad minimo necesario di e creditornan a bay acuerdo pero riba 4 di december hues ainda mester evalua e plan riba su factibilidad. E echo cu ainda e futuro di e compania ta mara na e boluntad di Venezuela pa cumpli, no ta algo cu tur creditor ta kere cu ta algo factibel.  Asina Bon Dia a compronde di nan diabierna den sala di corte. Aunke director Alejandro Muyale a priminti cu den caso no ta haya e placa di Venezuela, e entradanan di e operacion di vuelonan riba rutanan nobo (esta Corsou, Florida y tambe pa Venezuela) y di e accionaista cu ainda ta invertiendo placa den e compania, lo ta suficiente pa Tiara Air lo por keda opera y poco poco baha su debenan.

E caso a cuminsa algo despues di 2 or diabierna merdia y un grupo grandi di creditor tabata presente. Momento director Muyale a drenta corte, a cay un silencio cortico y di biaha un par di creditor a acerca e director, obviamente rabia. Na cumienso di e caso, hues a pone hopi cla cu e reunion aki ta uno masha importante: si mayoria di e creditor no a bay di acuerdo, no keda nada pa declara Tiara Air bancarota.

Mas vuelo
Director Muyale a presenta e plan general con nan ta pensa Tiara Air por bira un compania sano y tambe riba corto plaso. Pa asina convenci e creditornan pa duna nan mas tempo pa cumpli cu su debenan. E plan no a duna mucho cifra concreto of detaye. Locual e director si a divulga ta cu lo expande nan vuelonan mas pronto posibel. Desde september ya a cuminsa bula bek, riba Punto Fijo. Y e plan ta pa haci esaki 2x pa siman, 2x pa Corsou, 2x pa Florida (no a menciona ciudad) y tambe pa Maracaibo den un periodo di 3 pa 6 lun. For di Florida lo tambe cuminsa cu charter pa otro isla Caribense. Hues pero tambe creditornan a puntra si Tiara tambe por mustra cu nan tin e permisonan pa bula riba e destinacionnan aki. Director Muyale a contesta cu e contractonan ta riba mesa pero e no a firma ainda. Pa motibo cu e kier a warda riba e resultado di e caso awe. Firma e contractonan prome e votamento di e creditornan riba e plan, lo tabata algo ‘iresponsabel’, e ta splica.

E ‘bewindvoerder’ pues e persona apunta pa corte pa guia e caso aki di suspencion di pago, esta abogando Eugene Martis, a declara cu e tambe a wak e contractonan aki, locual a kita e duda den sala.  Muyale a sigui cu su splicacion riba e plan, indicando cu lo busca un otro Boeing tambe, banda cu tin caba, y otro avion chikito (50 stul) pa bula den regio, y ‘siguramente pa Boneiro’ tambe.

Finalemente mayoria di e creditor a mustra confiansa den e plan y a vota pro pa asina Tiara por haya mas tempo pa cumpli cu su debenan. Sinembargo, ta na hues riba 4 di december ainda pa wak si tur cos cu Tiara Air a presente realmente ta factibel.Y tambe si nan mantene nan mes na palabracionnan haci den e caso aki. Bewindvoerder Martis ta bisa Bon Dia cu tin ‘speransa’ sinembargo e ta cualifica e situacion como uno basta dificil. Esaki pasobra e ta basa ainda riba e boluntad di Venezuela pa paga Tiara Air. Y mirando e situacion na e pais aki, esaki ta algo dificil, asina e ta bisa. Director Muyale mes a bisa tambe den su presentacion di e plan di salbamento cu no por conta riba autoridad Venezolano cu lo cumpli cu e suma completo y mester tene cuenta cu lo tin ‘reduccion’.

151 creditor
Bou di e creditornan tin claramente hopi den mundo di aviacion, manera aeropuertonan di Aruba, Corsou y Boneiro, pero tambe ‘handlers’ y den servicionan di manera siguridad of cuminda. Aruba Airport Authority por ehemple ta exigi 2.2 miyon florin na debe, y esaki tambe a crece te na 2.6 miyon pasobra ainda a duna servicio. Otro creditor ta hotel (Divi, Renaissance, Manchebo, The Mill, Plaza Bonaire, Plaza Curaçao), Tropical Bottling, medionan di comunicacion manera Top FM, Telearuba, corant manera, Antilliaans Dagblad, Amigoe. La Prensa y CSNPV (doño di Bon Dia), hasta Yvo Yanez. Pero tambe Setar, Kooyman, Banco Central, Atia y ATA.

Director Muyale di Tiara ta bisa despues di e votamento, cu un biaha mas e ta contento cu e confiansa di mayoria di e creditor. “Ami tambe tin e confiansa ainda cu nos por cuminsa opera cu un compania sano atrobe. Tabatin un par di e creditornan rabia pero mi ta compronde esaki. Sinembargo e compania aki tin futuro cu tur e cambio cu nos a haci y awor nos lo cuminsa bula bek.”

Personal
Tiara Air tambe tin un plan pa su personal cu ainda ta warda riba su placa. E debe total aki ta 1 miyon florin. Muyale ta bisa cu momento cu Venezuela ta cuminsa paga, lo bay cumpli cu e debe aki. Esaki ta salario cu Tiara ta debe ex empleadonan pero tambe empleadonan nobo (cu a tuma den servicio ora e compania ya tabata den problema financiero). Awor e compania tin 60 trahado mientras prome tabatin 160. E plan cu Tiara awor tin riba mesa ta cu ta warda riba pago yega di Venezuela te fin di maart otro aña. Den caso cu Tiara no tin e placa riba 1 di april 2016, e compania lo cuminsa paga e personal entrante di 30 april 2016 den termino di 12 luna, uzando su mesun fondo.

Pero mescos cu ta conta pa e plan general, corte tambe mester evalua si e plan di personal ta uno realistico. Bon Dia a puntra director Muyale dicon ta warda ainda riba placa di Venezuela en bes di uza su fondo pa paga e empleadonan di awor caba. “Pa asina e presion ta keda riba nan (Venezuela). Pero manera menciona, ora nan no ta cumpli fin di maart otro aña, nos lo uza nos placa pa cuminsa paga e empleadonan.”

Tiara Air no por a saca su placa for di Venezuela desde 2013 pa motibo cu e restricto riba divisa. E compania a cuminsa bula riba Punto Fijo bek, pero awor tur pasahero mester paga su pasashi na dollar of otro moneda fiho.

(riba potret un di e creditornan ta reclama na director Alejandro Muyale diabierna den corte).

LEAVE A REPLY

Please enter your comment!
Please enter your name here