Un tiger na Bronx Zoo a test positivo pa novel coronavirus, den locual ta kere ta e prome infeccion conoci den un animal na Merca, of un tiger na cualkier luga, segun oficialnan federal y e zoologico a bisa diadomingo.
E tiger Malay di 4 aña yama Nadia – y seis otro tiger y leon cu tambe a bira malo – ta kere di a wordo infecta pa un empleado di zoologico kende ainda no tabata mustra sintoma, e zoologico a bisa.
E prome animal a cuminsa presenta sintoma dia 27 di maart, y tur ta bayendo bon y ta spera lo recupera, segun e zoologico, cu ta cera pa publico desde dia 16 di maart ultimo memey di e brote di coronavirus na New York.
E resultadonan di e test a sorprende oficialnan di zoologico: “Nos no por a kere”, director Jim Breheny a bisa. Pero e ta spera cu e hallazgo por contribui na e lucha global contra e virus cu ta causa COVID-19.
“Cualkier conocemento cu nos haya riba con e ta transmiti, con diferente especie ta reacciona na dje, e conocemento aki di algun manera lo duna un base mas amplio pa hende”, el a bisa den un entrevista.
E hallazgo ta genera pregunta nobo tocante transmision di e virus den animal. Departamento di Agricultura Mericano (USDA), cu a confirma resultadonan di test di Nadia na su laboratorio veterinario, ta bisa cu no tin caso conoci di e virus den mascota of animal na Merca.
“No ta parce cu tin, na e momento aki, ningun evidencia sugeriendo cu e animalnan por transmiti e virus na hende of cu nan por ta un fuente di contagio na Merca”, Dr. Jane Rooney, un veterinario y oficial di USDA, a bisa den un entrevista.
USDA a bisa diadomingo cu no ta recomendando test rutinario di coronavirus pa animal, zoologico of otro, ni pa empleado di zoologico. Sinembargo, Rooney a bisa cu a test un cantidad chikito di animal na Merca a traves di Servicio di Laboratorio Veterinario Nacional di USDA, y tur e testnan aki a bin bek negativo excepto esun di Nadia.
Expertonan ta bisa cu e pandemia di coronavirus mundial ta impulsa pa transmision di persona pa persona.
Tin un cantidad chikito di reporte pafo di Merca di mascota (pushi of cacho) cu a bira infecta despues di contacto cercano cu persona infecta, incluyendo un cacho cu a test positivo na Hong Kong pa un nivel abou di e patogeno na februari y maart. Autoridadnan na Hong Kong a conclui cu mascota no por transmiti e virus na su doñonan, pero por test positivo si na ta expuesto.
Na Bronx Zoo, Nadia, su ruman Azul, dos tiger Amur y tres leon Africano a desaroya tosamento seco, y algun di e pushinan a exhibi falta di apetito, segun Dr. Paul Calle, hefe veterinario di e zoologico.
E personal a figura cu por tin un splicacion rutinario pa e sintomanan, pero a haci test di coronavirus pa ‘due diligence y abundancia di cautela’, segun Breheny. Unicamente Nadia a haci test pasobra ta tuma anestesia pa haya un muestra di un felino grandi, y ya caba e tabata drumi pa haci examinacion medico.
E shete felino enfermo ta biba den dos area na e zoologico, y e animalnan tabata den contacto cu e mesun trahado, kende ta OK, segun oficialnan. Nan a bisa cu no tin señal di enfermedad den otro felino riba e propiedad.
Personal trahando cu e felinonan awo ta bisti ekipo di proteccion, manera esunnan cu ta cuida primate ta haci pa varios aña, pa motibo di e lasonan genetico cercano di e animalnan cu ser humano, Breheny a bisa.
