Lady Gaga y organisacion Global Citizen a recauda $35 miyon pa lucha contra coronavirus y lo lansa un special di television cu Paul McCartney, Stevie Wonder y Billie Eilish pa combati e virus.
Gaga a bisa ayera cu a recauda e placa den shete dia, y lo beneficia Organisacion Mundial di Salud (WHO). E strea pop y Global Citizen tambe a anuncia ‘Un Mundo: Hunto na Cas’, un evento televisa cu meta pa combati coronavirus. Esaki lo ser transmiti dia 18 di april simultaneamente riba ABC, NBC, CBS, iHeartMedia, y Bell Media.
“Nos kier resalta e gravedad di e movemento cultural historico y sin precedente aki… y nos kier celebra y curasha e poder di espiritu humano”, Gaga a bisa durante un conferencia di prensa ayera.
E special di television di varios ora, cu tambe lo transmiti en bibo riba YouTube, Apple, Facebook, Instagram, Twitter y otro plataforma, lo inclui presentacion di Elton John, David Beckham, John Legend, Eddie Vedder, Kerry washington, Chris Martin di Coldplay, Lizzo, J Balvin, Andrea Bocelli y Maluma. Idris Elba y su esposa, Sabrina Elba, kende ambos a test positivo pa coronavirus, tambe lo participa den e special.
Gaga a bisa cu e tin plan pa recauda placa y a splica cu e special di television no ta pa recauda fondo. “Warda bo cartera… y djis relaha y disfruta e show cu boso tur merece.”
Stephen Colbert, Jimmy Fallon y Jimmy Kimmel lo ta anfitrion di ‘Un Mundo: Hunto na Cas’, cu tambe lo resalta esnan afecta pa e virus y celebra trahadonan di salud den linea frontal.
Otronan participando den e special di television ta inclui Billy Joe Armstrong di Green Day, Lang Lang, Kacey Musgraves, Alanis Morissette, Priyanka Chopra Jonas, Shah Rukh Khan, Keith Urban, Burna Boy y ruman productor di Eilish, Finneas.
