Reportero Ricardo Coluccini pa Vice Italia a entrega un solicitud pa informacion tocante su data personal (GDPR), y a keda den shock pa mira ki data e plataforma tabata colectando.

2020 tabata aña di TikTok. Maske e plataforma di red social ya tabata popular pa fin di 2018, nada por a reforsa su base di usuario mas lihe cu nos sed pa distraccion for di e collapse inminente di sociedad. Y si tur prensa ta bon prensa, TikTok sigur a beneficia di atencion den medionan di comunicacion durante 2020, tumando posicion central den e bataya geopolitico entre China y Merca.

Diripiente tur hende a worry tocante ki data e compania mama di TikTok, ByteDance, tabata colecta. Pero a pesar di e declaracionnan di administracion di Trump cu China por ta spiona riba bo via bo app di video preferi, no tin evidencia cu bo data ta menos safe den man di e compania Chines cu den man di e ‘sospechosonan usual’ basa na Merca, manera Facebook y Amazon. De hecho, na juli 2020, Corte di Husticia Europeo a yega na un acuerdo entre Union Europeo y Merca, conoci como ‘Privacy Shield’, riba e base cu leynan di seguridad nacional Mericano tabata pone data di ciudadanonan Europeo den peliger.

Mirando esaki, Coluccini a bay den buskeda di claridad. Probechando e Regulacion General di Proteccion di Data di UE – GDPR 2016/679 ta un regulacion den ley di UE riba proteccion di data y privacidad den Union Europeo y Area Economico Europeo. Tambe ta dresa e transferencia di data personal pafo di areanan di UE y AEE – el a puntra TikTok pa manda tur e data cu nan tabatin di dje. Tur persona den UE por haci esaki.

Coluccini nunca a crea un cuenta di TikTok. Si bo habri e website riba bo browser, bo por scroll riba contenido sin mester registra, maske algun caracteristica – manera comentario, sigui cuenta y upload contenido – ta posibel solamente si tin un perfil. Algun usuario tambe por mira den e app sin un cuenta, mientras otronan ta rekeri pa registra. TikTok no a responde na un solicitud pa comentario riba e discrepancia aki. Maske e no a registra, el a usa e plataforma brevemente – pa alrededor di dos luna – pero casi tur dia. Manera su data a mustra despues, el a mira 30 video pa dia. Un cantidad considerabel, pero menos cu e averahe: e usuario tipico ta pasa alrededor di 46 minuut pa dia riba e plataforma, y mayoria di video ta 15 seconde largo, cual ta resulta den alrededor di 184 video.

Ora bo no tin un cuenta cu e compania, hopi biaha nan ta bisa cu no por identifica bo data pasobra nan no por verifica e persona haciendo e solicitud. Y TikTok inicialmente a rechasa solicitud di Coluccini. “Desafortunadamente nos no por a ubica un cuenta asocia cu e adres di email” nan a contesta. Nan a pidi mas detaye, manera nomber di usuario of ‘cualkier otro adres di email of number di telefon cu a usa pa registra pa un cuenta’.

Sinembargo, politica di privacidad di TikTok ta declara cu nan ta ‘colecta cierto informacion di bo ora bo usa e plataforma, incluyendo ora bo ta usando e app sin un cuenta’. E ‘informacion tecnico’ aki ta inclui bo adres IP, operador di telefon mobil, zona orario (‘timezone’) y mas.

A bin un acertijo: TikTok a colecta data cu nan tabata sa ta di aparato personal di Coluccini – identifica pa un cadena specifico di number – y pues di dje. Pero ya cu e no tin un cuenta pa proba su identidad, nan no lo comparti esaki cune. A pesr di esey, nan a continua usando su data den varios forma. Por ehemplo, Coluccini a haya sa cu nan a comparti informacion cu Facebook 595 biaha, manera Facebook a detaya den su seccion ‘Off-Facebook Activity’. E data di TikTok aki awo ta vincula na su perfil personal riba Facebook.

Na final, Coluccini a logra proba cu e ta e doño di e data door di agrega su adres IP na e solicitud hunto cu un codigo identificando su aparato iOS, conoci como e ID For Vendors (IDFV). E codigo aki ta permiti desaroyadornan di app reconoce e mesun aparato a traves di diferente app. Por ehemplo, si cuatro app di e mesun desaroyador ta instala riba un aparato (manera Facebook, WhatsApp, Instagram y Messenger), e desaroyador por mara tur perfil na e mesun usuario.

Despues di a ricibi e informacion aki, TikTok a bay di acuerdo pa manda Coluccini su data. A bis’e pa bishita su Hel Centre, selecta ‘Report a Problem’ y hinca e informacion den e seccion di feedback.

Dentro di dos luna di su solicitud original el a ricibi dos documento di Excel protegi cu password y un yabi pa habri nan den un email separa. E prome documento tabata consisti di un tabel cu casi 1,900 linea, registrando henter su historia di videonan mira, un pa un. E otro documento, ‘User Data & Activity’ tabata un tabel cu 15,886 linea y 24 kolom. Esey ta 381,264 unidad di data registrando su experiencia cortico riba e app, te e detaye mas chikito.

E documento di historia di video no tabata un sorpresa. Pero Coluccini tabata genuinamente den shock pa e cantidad di data cu a track y monitor mientras e tabata simplemente mirando video riba su celular. E documento a registra tur su accionnan riba e app y a pone un fecha y ora riba nan. Tambe tabata sa e tipo di aparato y resolucion di pantaya, operador di celular, sistema di operacion, adres IP y un otro codigo di identificacion di aparato (diferente na esun cu el a provee cu su solicitud).

Por ehemplo, a registra na momento cu e tabata buscando of mirando un video, tambe cantidad di otro variabel cu TikTok no a splica den su seccion di privacidad. Na 2018, Coluccini a solicita su data for di Amazon y a ricibi un tabel similar cu tur e productonan cu el a busca, click, cumpra of save.

Ta facil pa punta dede riba TikTok, Facebook of Amazon, pero en realidad tur app y website ta haci esaki. Cada swipe riba Tinder pa 3or di mainta, tur video mita mira riba TikTok, tur compra spontaneo – tur esaki ta monitorea. Esaki ta e naturalesa di e internet cu nos a haya nos mes habitando. Claro, companianan no mester colecta asina hopi data, ni warda esaki pa semper.

Politicanan di privacidad hopi biaha ta hustifica coleccion di data splicando cu esaki ta vincula cu seguridad. Companianan di Big Tech ta bisa cu tene track di bo actividadnan ta yuda nan haya y elimina cuentanan fraudulento. Nos ta haya tende cu companianan no ta bay usa e data contra nos interesnan, pero toch, e informacion ta keda warda un caminda, vulnerabel na atakenan cibernetico of cambionan di politica di privacidad cu por ta bo ta acepta sin paga tino. Tambe por (y hopi biaha ta) wordo solicita pa agencianan di cumplimento di ley durante investigacionnan. Manera Intercept a revela, FBI a obtene y monitor data di usuario di TikTok riba decenas di manifestante di e movemento Black Lives Matter na 2020.

Ya cu TikTok ta e plataforma preferi di Generacion Z, hende ta particularmente preocupa tocante kico ta bay pasa cu e data di usuarionan menor di edad. Dia 13 di januari 2021, TikTok a anuncia cu lo cambia e settings default pa usuarionan bao edad di 16 na priva. E decision ta yega despues cu un mucha Britanico di 12 aña di edad a demanda e plataforma, acusando e compania di usa data di mucha ilegalmente (bao ley di Reino Uni) pa duna poder na su aligoritmo.

Pa awo, nos tur sa cu plataformanan di rednan social tin basenan di dato amplio di nos actividad. Ta keda na cada ken pa dicidi si kier sigui usa TikTok of no. Djis corda – mira sin un cuenta no ta haci bo anonimo.

LEAVE A REPLY

Please enter your comment!
Please enter your name here