Gobierno den su perspectiva economico 2021 cu a keda presenta pa minister di Finanzas y asunto Economico, Xiomara Maduro tin mas cu 300 miyon florin destina pa hinca den nos economia. Un economia cu a cay aña pasa cu mas cu 332.7% debi na e pandemia di Covid-19 su efecto riba nos principal pilar economico, esta turismo.
Sinembargo tin factornan cu ta hunga un rol, entre otro Hulanda pa asina pais Aruba por ricibi e fondo aki pa asina canalisa e recursonan y ayudo necesario pa nos empresarionan, specialmente mediano y chikito cu ta e musculo di nos economia.
E mandatario ta insisti cu pa e proceso aki por bira economicamente exitoso ta demanda di nos empresarionan pa nan ta mas creativo pa e parti di e vision, preparacion y etapanan pa e sector comercial. Pues con e comerciantenan –segun e mandatario- por ta mas creativo pa haci nan negoshi di otro manera. “Pasobra esaki no ta solamente warda riba gobierno. Of kico gobierno ta bay brinda,” el a declara.
Red tape
El a bisa cu esaki ta e motibo cu gobierno den su Master Plan ta trahando tambe pa agilisa procesonan pa elimina e problema conoci como red tape of excesivo burocracia pa un proceso. Segun minister Maduro tur gobierno a yega di papia pa elimina red tape. Pero e ta convenci cu nan si a haci hopi cos pa digitalisa entre otro departamento Economico, departamento di Impuesto (DIMP), y te hasta nan a bin recientemente cu un proyecto piloto pa bin cu un sistema digital pa loke ta e comprobante di seguro di auto.
E mandatario ta haya cu nan ta hopi logronan por ta chikito den nan embergadura, pero hunto nan ta haci un diferencia. Pero si nos empresarionan mester ta mas creativo den nan forma di haci negoshi, y asina nos por tene comercio na bida.
