Te ainda, cacho ta e mascota mas popular na Aruba. Segun veterinario Ricardo Contreras, un 90% di nan clientenan ta cacho. E resto ta un 5% pushi y un otro 5% ta cabay, cabrito, baca y bestianan exotico, manera morocoy y parha.

Duranto e 26 aña cu e ta brindando su servicio profesional na Aruba, sr. Contreras ta haya cu tin un cambio di mentalidad positivo pa loke ta e trato y cuido di bestia riba nos isla, pero e proceso aki a bay hopi slow.

E ta reconoce cu no ta facil pa bin cu cierto cambio den e cultura di comunidad, pero e ta observa cu den e ultimo añanan tin ‘un tiki di mas consciencia pa e cuido di bestia, specialmente pa e parti di cacho’. E ta splica si cu ainda falta hopi pa haci riba cuido di cacho.

Mas pushi riba caya
Sinembargo un bestia cu a keda neglisha casi totalmente ta pushi. Un factor ta cu e bestia aki ta hopi independiente y e hendenan no ta worry mucho cu nan. E ta ripara cu dia pa dia y den tur bario, e poblacion di pushi riba caya a aumenta. Un splicacion por ta cu ora bo ta controla e cachonan riba caya, automaticamente e pushinan ta bay aumenta, pasobra cacho ta un depredador di pushi.

P’esey sr. Contreras ta kere cu mester bin mas control y conscientisacion di nos hendenan pa cuminsa sterilisa e pushinan, ya cu esaki tambe ta un asunto di salubridad publico mirando cu nan ta transmiti malesanan di cuero, parasito, etc..

Mester tene na consideracion cu pushi ta reproduci su mes mas cu cacho, ya cu nan por tin un promedio di dos parto y mey pa aña.

E no ta mira cu e problema aki ta bay caba, pero si ta importante pa mantene un vigilancia ariba dje y percura pa bin cu mehoracion tur aña.

Un contribucion hopi importante tabata e introduccion di e ley di cacho y esaki ta un di e cambionan relevante cu e por a mira den e ultimo añanan. Tambe gobierno a bin cu mas reglamentacion riba e importacion y comercialisacion di bestianan salvahe, cual ta yuda hopi pa e control di e mercado ilegal di bestianan salvahe na Aruba. Aunke tin caso cu ta wordo presenta ainda manera esun di un par di luna pasa caminda autoridad a confisca fei un boto un cantidad di bestia exotico y salvahe cu a bin for di Venezuela y Colombia. “Ainda e problema t’ey! Pero bo no ta wak nan hopi comun manera antes”, el a bisa na Bon Dia Aruba.

Recomendacionnan
Considerando cu cacho ta e mascota mas comun na Aruba el a trece cuater recomendacion basico pa cuida e bestia aki. E prome ta bon calidad di cuminda. E di dos recomendacion ta cu e cacho mester ta den un ambiente ideal, no mara ni cera. Nan mester ta los cu suficiente sombra y suficiente espacio pa e move den un area protegi. E di tres ta, e cacho mester haya su pildo contra bichi di curason tur luna.

E delaster recomendacion ta cu e cacho mester haya su vacuna regularmente y evita carpata y purga. Si bo ta sigui tur e recomendacion aki e ta sigura cu bo ta bay tin un cacho saludabel pa hopi tempo. Nan ta constata cu ora bo ta actua preventivo riba cuido di bo cacho of mascota, e ta sali bo mas barata y mas efectivo. Kiermen bo bestia ta bay sufri menos y ta miho pa bo mes tambe como doño di e bestia.

Awe den cuadro di Dia di Bestia, sr. Contreras a bisa cu pa esunnan cu tin bestia, e dia special aki mester ta tur dia, pasobra ora bo tin un bestia, nan ta exigi di bo 365 dia pa aña.

Prome cu bo ta tuma e decision pa tin un bestia, mester ta bon prepara pa e decision aki y na un forma consciente. Esaki paso nan ta ser bibo cu bo ta para responsabel pe pa e resto di su bida. Awe si bo kier mal cria bo bestia un tiki den cuadro di Dia di Bestia tene cuidao pasobra “tin biaha un cariño mal duna por pone bo bestia bira malo”, el a bisa.